ក្រុមម្ចាស់ផ្ទះអង្គរថាយហ្គឺរ បាត់បង់កម្លាំងសំខាន់ពីររូប គឺ ខ្សែការពារ សឿត បារាំង និង ខ្សែប្រយុទ្ធ ឡុង ម៉េងហាវ ដែលកំពុងជាប់ចត្តាឡីស័កនៅមជ្ឈមណ្ឌលបាលទាត់ជាតិបាទី ក្រោយត្រលប់មកពីបេសកកម្មក្រុម U23 ជម្រើសជាតិកាលថ្ងៃទី ២៦ តុលា កន្លងទៅ។ ចំណែក វិសាខា ត្រូវអវត្តមាន ខ្សែការពារ ទេស សម្បត្តិ និង ស៊ិន កក្កដា ដែលកំពុងចត្តាឡីស័កនៅមជ្ឈមណ្ឌលបាលទាត់ជាតិជាមួយគ្នា។

DA CRUZ ៖ ខ្សែប្រយុទ្ធប្រធានក្រុមសញ្ជាតិប្រេស៊ីលរូបនេះជាកីឡាករចូលលេងបានច្រើននាទីជាងគេសម្រាប់អង្គរថាយហ្គឺរ (គឺ១៣០០ នាទី) ក្នុងការប្រកួត ១៦ លើក និង ជាអ្នករកគ្រាប់បានច្រើនជាងគេសម្រាប់ក្រុមផងដែរ (៧គ្រាប់)។ គេពូកែទាញកម្លាំង , ហក់តែត និង ការទាត់បាល់ហ្វ្រីឃីកជាដើម។ ហ្វ្រីឃីកដែលចងចាំបំផុតពេលទាត់យកឈ្នះ កងយោធពលខេមរភូមិន្ទ ២-១ ក្នុងចម្ងាយប្រមាណ ៣៥ ម៉ែត្រ។ ខ្សែប្រយុទ្ធរូបនេះ នឹងធ្វើព្យុះ។

HABER MARCUS ៖ មិនខុសគ្នាប៉ុន្មាន ខ្សែប្រយុទ្ធសញ្ជាតិកាណាដា ជំនាញហក់តែតបាល់ខ្ពស់, ការអូសទាញនិងប្រជែងបាល់ និង ការប្រើបច្ចេកទេសផ្ទាល់ខ្លួនយ៉ាងល្អ។ គេជាអ្នកស៊ុតបញ្ចូលទីបានច្រើនជាងគេឲ្យ វិសាខា (១៥ គ្រាប់) តាមពីក្រោយកីឡាករកំពូលតារាងទាត់បញ្ចូលទី Marcio Oliveira ចំនួន ៥ គ្រាប់។ ថ្ងៃនេះជាឱកាសរបស់ Marcus ដើម្បីតាមប្រជែងស្បែកជើងមាស ព្រោះការប្រកួតនៅសល់ ៣ លើកទៀតរួមទាំងការប្រកួតនេះ។