តាលីបង់តែងតាំងសមាជិក ៤៤ នាក់ជាអភិបាលខេត្ត និងស្នងការប៉ូលិសនៅជុំវិញអាហ្វហ្គានីស្ថាន
កាលពីថ្ងៃអាទិត្យ ទី៧ វិច្ឆិកាក្រុមតាលីបង់បានធ្វើការតែងតាំងសមាជិក ៤៤ នាក់ឱ្យកាន់តំណែងសំខាន់ៗដូចជាអភិបាលខេត្ត និងស្នងការប៉ូលិស ដែលជាជំហានដ៏សំខាន់មួយក្នុងការពង្រឹងអភិបាលកិច្ចរបស់ខ្លួន ខណៈពេលដែលប្រទេសអាហ្វហ្គានីស្ថានកំពុងឆ្លងកាត់វិបត្តិសន្តិសុខ និងសេដ្ឋកិច្ចដ៏ធ្ងន់ធ្ងរ។
នេះគឺជាការប្រកាសតែងតាំងខ្នាតធំចុងក្រោយបំផុត បន្ទាប់ពីការប្រកាសបង្កើតគណៈរដ្ឋមន្ត្រីស្ដីទីកាលពីខែកញ្ញា។ ចាប់តាំងពីចូលកាន់កាប់អំណាចនៅប្រទេសអាហ្វហ្គានីស្ថានកាលពីថ្ងៃ១៥ សីហា ក្រុមតាលីបង់បានប្រឈមការលំបាកជាច្រើនក្នុងការបំពេញការសន្យាស្ដារសណ្ដាប់ធ្នាប់ និងសន្តិសុខឡើងវិញ បន្ទាប់ពីឆ្លងកាត់សង្គ្រាមជិតពីរទសវត្ស។
ក្រុមភេរវកម្ម ISIS-K បានធ្វើការវាយប្រហារពាសពេញប្រទេស ខណៈសេដ្ឋកិច្ចធ្លាក់ក្នុងវិបត្តិ។ មេបញ្ជាការកងកម្លាំងសន្តិសុខក្រុមតាលីបង់ប្រចាំក្រុងកាប៊ុលលោកម៉ាឡាវី ហាំឌុឡា ម៉ូគ្លីស ត្រូវបានសម្លាប់ក្នុងការវាយប្រហារភេរវកម្មទៅលើមន្ទីរពេទ្យយោធាក្រុងកាប៊ុល។
យ៉ាងណាមិញ មានការទាមទារពីប្រទេសមួយចំនួននៅជុំវិញពិភពលោកឱ្យក្រុមតាលីបង់ធ្វើការចរចាជាមួយភាគីនយោបាយផ្សេងទៀតដើម្បីបង្កើតរដ្ឋាភិបាលដែលរួមបញ្ចូលគ្រប់ភាគី ជាពិសេសក្រុមជនជាតិភាគតិច និងស្ត្រី ជាជាងការកាន់តែខ្លួនឯង។ ប៉ុន្តែការវិវឌ្ឍន៍ទៅមុខធំដុំណាមួយនៅមិនទាន់បានសម្រេចបាននៅឡើយ៕
