ការប្រកួតពានរង្វាន់សម្តេចតេជោ ហ៊ុន សែន លើកទី១៥ រដូវកាល ២០២១ វគ្គ១៦ក្រុមថ្នាក់ជាតិបានបញ្ចប់៤ប្រកួត ដោយ៤ក្រុម គឺវិសាខា ណាហ្គាវើលដ៍ ភ្នំពេញក្រោន និងព្រះខ័នរាជស្វាយរៀង បានឡើងទៅវគ្គ៨ក្រុមចុងក្រោយ បន្ទាប់ពីបានយកឈ្នះពីគូប្រជែងរៀងៗខ្លួន កាលពីល្ងាចថ្ងៃទី៩ ខែវិច្ឆិកា ឆ្នាំ២០២១។

៤ប្រកួតវគ្គ១៦ក្រុមថ្នាក់ជាតិនេះរួមមាន៖ ក្រុមវិសាខាបានយកឈ្នះក្រុមខេត្តបន្ទាយមានជ័យ (លេខ៣ថ្នាក់ខេត្ត) ដោយលទ្ធផល ៨ទល់០, ណាហ្គាវើលដ៍ប្រកួតឈ្នះនគរបាលជាតិ ៤ទល់២ នៅក្នុងការប៉េណាល់ទីកាត់សេចក្តី ក្រោយក្រុមទាំងពីររក្សាលទ្ធផលស្មើគ្នាពេញម៉ោង៩០នាទី ១ទល់១, ភ្នំពេញក្រោយបានយកឈ្នះក្រុមចំណាត់ថ្នាក់លេខ២ថ្នាក់ខេត្ត មន្ទីរអប់រំ យុវជន និងកីឡាខេត្តត្បួងឃ្មុំ ៧ទល់០ ខណៈព្រះខ័នរាជស្វាយរៀងបានយកឈ្នះក្រុមជើងឯកថ្នាក់ខេត្ត កោះកុង អេហ្វ.ស៊ី ក្នុងលទ្ធផល ៦ទល់១។

ដោយឡែក៤ប្រកួតផ្សេងទៀតវគ្គ១៦ក្រុមថ្នាក់ជាតិនឹងត្រូវប៉ះគ្នា នៅរសៀល ថ្ងៃទី១០ ខែវិច្ឆិកា ឆ្នាំ២០២១ ដើម្បីស្វែងរក៤ក្រុមជ័យលាភីឡើងទៅវគ្គ៨ក្រុមចុងក្រោយ។

សូមបញ្ជាក់ថា ការប្រកួតវគ្គ១៦ក្រុមថ្នាក់ជាតិ និងវគ្គ៨ក្រុមចុងក្រោយ ត្រូវបានគណៈកម្មការប្រកួតបាល់ទាត់ជាតិកម្ពុជា (CNCC) កំណត់ការប្រកួតចំនួនតែ១ជើងប៉ុណ្ណោះ ដោយក្រុមណាចាញ់គឺធ្លាក់ចេញពីការប្រកួតតែម្តង ដើម្បីបង្រួមពេលវេលាឲ្យខ្លី ក្នុងវិបត្តិជំងឺកូវីដ-១៩ ដោយការប្រកួតកន្លងមកបានលើកពេលជាច្រើនលើក។ សម្រាប់វគ្គពាក់កណ្ដាលផ្ដាច់ព្រ័ត្រ ឬវគ្គ១/២ គឺ២ក្រុមឈ្នះៗនឹងត្រូវឡើងទៅប្រកួតប្រជែងជើងឯក ខណៈ២ក្រុមចាញ់ៗនឹងត្រូវប្រកួតដណ្ដើមចំណាត់ថ្នាក់លេខ៣ ដោយការប្រកួតបញ្ចប់នៅវគ្គផ្តាច់ព្រ័ត្រគ្រោងធ្វើឡើង នាថ្ងៃទី២៥ ខែវិច្ឆិកា ឆ្នាំ២០២១៕