លោកប្លីនខែន ថាប្រទេសកាតានឹងតំណាងសហរដ្ឋអាមេរិកនៅប្រទេសអាហ្វហ្គានីស្ថាន
កាលពីថ្ងៃសុក្រ ទី១២ វិច្ឆិកា រដ្ឋមន្ត្រីការបរទេសសហរដ្ឋអាមេរិកលោកអាន់តូនី ប្លីនខែន បាននិយាយថាប្រទេសមជ្ឈិមបូព៌ាកាតា នឹងដើរតួជាអ្នកតំណាងការទូតរបស់អាមេរិកនៅប្រទេសអាហ្វហ្គានីស្ថាន ដោយនឹងតំណាងផលប្រយោជន៍របស់អាមេរិក និងជួយដំណើរការពាក្យសំណើទិដ្ឋាការសម្រាប់មនុស្សរាប់នាក់ដែលចង់ភៀសខ្លួនពីការគ្រប់គ្រងរបស់ក្រុមតាលីបង់។
ក្នុងរយៈជាច្រើនឆ្នាំចុងក្រោយនេះ ប្រទេសកាតាបានដើរតួយ៉ាងសំខាន់ក្នុងទំនាក់ទំនងដ៏ផុយស្រួយរវាងក្រុមតាលីបង់ និងសហរដ្ឋអាមេរិក។ ប្រទេសមួយនេះបានជួយរៀបចំការចរចារវាងភាគីទាំងពីរដើម្បីបញ្ចប់សង្គ្រាម ហើយបានទទួលយកជនភៀសខ្លួនជាង ៦០.០០០ នាក់ពីប្រទេសអាហ្វហ្គានីស្ថានបន្ទាប់ពីក្រុមតាលីបង់ចូលកាន់អំណាចនៅខែសីហា។
សហរដ្ឋអាមេរិកមិនទទួលស្គាល់រដ្ឋាភិបាលរបស់ក្រុមតាលីបង់ថាស្របច្បាប់ទេ ហើយបានបិទស្ថានទូតនៅក្រុងកាប៊ុលក្នុងកំឡុងពេលនៃការជម្លៀសដ៏ច្របូកច្របល់។ លោកប្លីនខែនបាននិយាយថានៅក្រោមកិច្ចព្រមព្រៀងថ្មីនេះប្រទេសកាតានឹងទទួលភារកិច្ចការទូតអាមេរិកមួយចំនួនដូចជាសេវាស្ថានកុងស៊ុល និងឃ្លាំមើលស្ថានភាព និងសន្តិសុខនៃអចលនទ្រព្យរបស់អាមេរិកដែលត្រូវបានបោះបង់ចោលនៅអាហ្វហ្គានីស្ថាន។ យ៉ាងណាមិញ មន្ត្រីអាមេរិក និងតាលីបង់ បន្តជួបប្រជុំគ្នា ដោយរួមទាំងថ្មីៗនេះ នៅក្នុងប្រទេសប៉ាគីស្ថាន កាលពីថ្ងៃព្រហស្បតិ៍សប្ដាហ៍មុន ដើម្បីពិភាក្សាអំពីវិបត្តិមនុស្សធម៌ ដែលគំរាមកំហែងវាយលុកអាហ្វហ្គានីស្ថាន នៅរដូវរងាដែលជិតមកដល់៕
ប្រភព៖ New York Times
