អ៊ុយក្រែនអះអាងថារុស្សីបានប្រមូលផ្ដុំទាហានជិត ១០០.០០០ នាក់នៅតំបន់ព្រំដែន
ប្រធានាធិបតីអ៊ុយក្រែនលោកវ៉ុលឌីមៀរ ហ្សេលេនស្គីបានអះអាងថាប្រទេសរុស្សីប្រមូលផ្ដុំទាហានជិត ១០០.០០០ នាក់នៅតំបន់ជាប់ព្រំដែនជាមួយប្រទេសរបស់លោក ខណៈពេលដែលការព្រួយបារម្ភអំពីការវាយលុកកើនឡើង។
ក្នុងវីដេអូនៃការថ្លែងសុន្ទរកថាមួយកាលពីថ្ងៃពុធ ទី១០ វិច្ឆិកាលោកហ្សេលេនស្គីបាននិយាយថាសកម្មភាពនេះបានបញ្ជាក់យ៉ាងច្បាស់ដល់ពិភពលោកថា «អ្នកណាពិតជាចង់បានសន្តិភាព ហើយអ្នកណាដែលកំពុងប្រមូលកម្លាំងទាហានជិត ១០ ម៉ឺននាក់នៅព្រំដែនយើង»។
ប្រទេសរុស្សីបានច្រានចោលការចោតប្រកាន់ទាំងនេះថាជាការបង្កហេតុ ហើយបានរិះគន់ការកើនឡើងសកម្មភាពរបស់សម្ព័ន្ធភាពយោធាលោកខាងលិចណាតូ (NATO) នៅក្នុងតំបន់។ គេមិនទាន់ដឹងអំពីគោលដៅនៃការដាក់ពង្រាយទាហានរបស់រុស្សីនៅឡើយទេ។
រូបភាពផ្កាយរណបចេញផ្សាយកាលពីថ្ងៃទី៨ វិច្ឆិកា បានបង្ហាញការដាក់ពង្រាយកងទ័ពនៅដែនដីរុស្សីជាប់ព្រំដែនជាមួយប្រទេសអ៊ុយក្រែន ដែលគេប៉ាន់ស្មានថាមានទំហំយ៉ាងហោចណាស់ ៩០.០០០ នាក់។ សមាជិកសភាអាមេរិកមួយចំនួនមកពីគណបក្សសាធារណរដ្ឋបានជំរុញលោកប្រធានាធិបតីចូ បៃដិនឱ្យធ្វើការឆ្លើយតប ដោយដាក់ពង្រាយទាហានអាមេរិកទៅតំបន់នេះវិញ។មន្ត្រីអាមេរិកបានពិគ្រោះជាមួយសម្ព័ន្ធមិត្តអឺរ៉ុបអំពីស្ថានភាពនេះ ដោយព្រមានថារុស្ស៊ីអាចប៉ុនប៉ងឈ្លានពានប្រទេសនេះក្នុងពេលដ៏ខ្លីខាងមុខ៕
ប្រភព៖ Fox News