សាមគ្គីជាកម្លាំងរួមគ្នាអភិវឌ្ឍន៍មូលដ្ឋាន
«តំណាងប្រជាជននឹងកើតចេញពីការគាំទ្ររបស់ប្រជាជន ហើយត្រូវបំពេញការងារចេញពីបេះដូង ក្នុងស្មារតីស្នហាជាតិ ប្រជាជន មាតុភូមិ និងការងារអភិវឌ្ឍន៍មូលដ្ឋាន» នេះជាការលើកឡើង របស់ ឯកឧត្តម អ៊ាង សុផល្លែត អនុប្រធានក្រុមការងារគណបក្សចុះមូលដ្ឋានខេត្តត្បូងឃ្មុំ និងជាប្រធានក្រុមការងារគណបក្សចុះមូលដ្ឋានស្រុកអូររាំងឪ ខេត្តត្បូងឃ្មុំ ក្នុងឱកាសអញ្ជើញចូលរួមពិនិត្យមើលការរៀបចំការបោះឆ្នោតស្ទាបស្ទង់ ដើម្បីជ្រើសរើសបេក្ខជនក្រុមប្រឹក្សាឃុំអាណត្តិទី៥ ឆ្នាំ២០២២ នៅក្នុងឃុំព្រះធាតុ ស្រុកអូររាំងឪ ខេត្តត្បូងឃ្មុំ នាថ្ងៃអាទិត្យ ទី២១ ខែ វិច្ឆិកា ឆ្នាំ២០២១។
ឯកឧត្តម បានបញ្ជាក់ថា ការបោះឆ្នោតបង្ហាញពីការសំដែងមតិតាមបែបប្រជាធិបតេយ្យពិតប្រាកដនៅកម្ពុជា។ ជាមួយគ្នានេះ ឯកឧត្តម អ៊ាង សុផល្លែត បានលើកទឹកចិត្តឱ្យបេក្ខជនទាំងអស់ ដែលឈរឈ្មោះតំណាងឱ្យប្រជាជននៅតាមមូលដ្ឋាន បន្តពង្រឹងសាមគ្គីភាព ដែលជាកម្លាំងរួមគ្នាអភិវឌ្ឍន៍មូលដ្ឋាន។
សូមបញ្ជាក់ផងដែរថា ជាមួយនឹងការចុះពិនិត្យ និងសំណេះសំណាលជាមួយអង្គបោះឆ្នោត និងបេក្ខជនឈរឈ្មោះបោះឆ្នោតស្ទាបស្ទង់ ដើម្បីជ្រើសរើសបេក្ខជនក្រុមប្រឹក្សាឃុំអាណត្តិទី៥ ឆ្នាំ២០២២ នៅក្នុងឃុំព្រះធាតុ ឯកឧត្តម អ៊ាងសុផល្លែត ក៏អញ្ជើញចូលរួមជួបសំណេះសំណាលនិងពិនិត្យការងារបោះឆ្នោតស្ទាបស្ទង់ ដើម្បីជ្រើសរើសបេក្ខជនក្រុមប្រឹក្សាឃុំអាណត្តិទី៥ ឆ្នាំ២០២២នៅតាមឃុំផ្សេងទៀត ក្នុងស្រុកអូររាំងឪ ខេត្តត្បូងឃ្មុំ ក្នុងថ្ងៃដដែលនេះផងដែរ៕