ខណៈពេលក្ដីសង្ឃឹមកិច្ចព្រមព្រៀងនុយក្លេអ៊ែររសាត់ អ៊ីរ៉ង់ក៏ផ្ដើមកសាងវិញ ហើយហានិភ័យកើនឡើង
ក្នុងរយៈពេលជាង ២០ ខែចុងក្រោយនេះភ្នាក់ងារចារកម្មអ៊ីស្រាអែលបានធ្វើឃាតអ្នកវិទ្យាសាស្ត្រនុយក្លេអ៊ែររបស់អ៊ីរ៉ង់ ហើយបានបង្កការផ្ទុះធំៗនៅឯរោងចក្រនុយក្លេអ៊ែរ និងមីស៊ីលរបស់អ៊ីរ៉ង់ចំនួន ៤ ក្នុងគោលបំណងបំផ្លាញសមត្ថភាពរបស់អ៊ីរ៉ង់ក្នុងការផលិតវត្ថុធាតុដើមនុយក្លេអ៊ែរ និងពន្យារពេលដែលរដ្ឋាភិបាលថ្មីអាចបង្កើតអាវុធ។
ប៉ុន្តែមន្ត្រីចារកម្មអាមេរិក និងនិយតករអន្តរជាតិ បាននិយាយថាអ៊ីរ៉ង់បានសាងសង់រោងចក្រទាំងនេះឡើងវិញយ៉ាងឆាប់រហ័ស ដោយជារឿយៗបានដំឡើងម៉ាស៊ីនថ្មីៗ ដែលមានសមត្ថភាពបន្សុទ្ធសារធាតុអ៊ុយរ៉ាន្យោមលឿនជាងមុនទៅទៀត។ នៅពេលដែលរោងចក្រដំឡើងម៉ាស៊ីនបន្សុទ្ធបានទទួលរងនូវអ្វីដែលមើលទៅដូចជាការផ្ទុះដ៏អាក្រក់ដែលបំផ្លាញស្តុកគ្រឿងបន្លាស់ ក៏ដូចជាកាមេរ៉ារបស់អង្គការឃ្លាំមើលអន្តរជាតិ ផលិតកម្មបានចាប់ផ្ដើមឡើងវិញក្នុងរយៈពេលប៉ុន្មានខែប៉ុណ្ណោះ។
សារពត៌មានញូយ៉កថាមស៍ រាយការណ៍ថាការពិភាក្សាពីក្រោយឆាកមន្ត្រីអាមេរិកបានព្រមានភាគីអ៊ីស្រាអែលថា ការវាយប្រហារបែបនេះម្ដងហើយម្ដងទៀតលើគោលដៅនុយក្លេអ៊ែររបស់អ៊ីរ៉ង់អាចបំពេញអារម្មណ៍របស់ពួកគេនៅពេលនេះ ប៉ុន្តែចុងក្រោយគឺមិនមានផលប្រយោជន៍អ្វីទេ ហើយនឹងធ្វើឱ្យបញ្ហាកាន់តែលំបាក។ ប៉ុន្តែមន្ត្រីអ៊ីស្រាអែលបាននិយាយថាពួកគេនឹងមិនបោះបង់ចោលការវាយប្រហារទាំងនេះទេ ដោយច្រានចោលព្រមានថាការវាយប្រហារទាំងបានជួយពន្លឿនកម្មវិធីនុយក្លេអ៊ែររបស់អ៊ីរ៉ង់។ បញ្ហានេះគឺជាចំណុចមួយនៃការខ្វែងគំនិតគ្នារវាងសហរដ្ឋអាមេរិក និងអ៊ីស្រាអែលជុំវិញការប្រើប្រាស់មធ្យោបាយការទូត ជាជាងការប្រើកម្លាំងបាយ។
យ៉ាងណាមិញ ការវាយប្រហារ និងការសាងសង់ឡើងវិញទាំងនេះ គឺគ្រាន់តែជាផ្នែកមួយនៃការកើនឡើងភាពតានតឹងរវាងអ៊ីរ៉ង់ និងលោកខាងលិច ដែលជាថ្មីម្ដងទៀតនឹងមានការប្រឈមមុខដាក់គ្នានៅទីក្រុងវីយ៉ែនណាប្រទេសអូទ្រីស។ ជាលើកដំបូងចាប់តាំងពីប្រធានាធិបតីអភិរក្សនិយមលោកអ៊ីប្រាហ៊ីម រ៉ៃស៊ីចូលកាន់អំណាច អ្នកចរចាអ៊ីរ៉ង់គ្រោងនឹងជួបជាមួយសមភាគីអឺរ៉ុប ចិន និងរុស្ស៊ីនៅចុងខែនេះ ដើម្បីពិភាក្សាអំពីអនាគតនៃកិច្ចព្រមព្រៀងនុយក្លេអ៊ែរឆ្នាំ ២០១៥ ដែលកំណត់សកម្មភាពរបស់អ៊ីរ៉ង់យ៉ាងខ្លាំងជាថ្នូរនឹងការដកទណ្ឌកម្ម។
អ្នកចរចាអាមេរិកនឹងចូលរួមក្នុងកិច្ចប្រជុំក្រុងវីយ៉ែនណាដោយប្រយោល ដោយសារអ៊ីរ៉ង់បដិសេធមិនចង់ជួបជាមួយភាគីអាមេរិកបន្ទាប់ពីអតីតប្រធានាធិបតីអាមេរិកលោកដូណាល់ ត្រាំបានដកខ្លួនចេញពីកិច្ចព្រមព្រៀងកាលពីឆ្នាំ ២០១៨ ហើយដាក់ទណ្ឌកម្មដ៏ធ្ងន់ធ្ងរជាបន្តបន្ទាប់ទៅលើអ៊ីរ៉ង់។
ខណៈកាលពីប្រាំខែមុនមុខមន្ត្រីមានសុទិដ្ឋិនិយមថាការចរចានឹងជួយស្ដារកិច្ចព្រមព្រៀងឆ្នាំ ២០១៥ឡើងវិញ ដោយលាយលក្ខណ៍អក្សរភាគច្រើនត្រូវបានយល់ស្របដោយភាគីទាំងអស់ ឥឡូវនេះពួកគេបានត្រឡប់ទៅក្រុងវីយ៉ែនណាពោរពេញទៅដោយទុទ្ទិដ្ឋិនិយម បើប្រៀបធៀបទៅនឹងពេលដែលពួកគេបានចាកចេញកាលពីខែមិថុនា។ ឥឡូវនេះការចរចាហាក់បីដូចជាបានជាប់គាំងរួចទៅហើយ ហើយគោលដៅរបស់ប្រធានាធិបតីអាមេរិកចូ បៃដិននៃការស្ដារកិច្ចព្រមព្រៀងក្នុងឆ្នាំកាន់អំណាចទីមួយរបស់លោកហាក់ដូចជារសាត់រសាយអស់។
នៅក្នុងសញ្ញានៃការផ្លាស់ប្ដូរអារម្មណ៍អ្នកចរចាថ្មីរបស់អ៊ីរ៉ង់លោកអាលី បាហ្គារី កានីបានឈប់ហៅការចរចានេះថាជា «ការចរចានុយក្លេអ៊ែរ» ផ្ទុយទៅវិញលោកបានហៅការចរចានេះថាជា «ការចរចាដកទណ្ឌកម្មខុសច្បាប់ និងអមនុស្សធម៌»។ អ៊ីរ៉ង់និយាយថា ខ្លួននឹងទទូចលើការដកទណ្ឌកម្មទាំងនុយក្លេអ៊ែរ និងមិនមែននុយក្លេអ៊ែរ ហើយទាមទារលក្ខខណ្ឌហាមឃាត់ការបោះបង់កិច្ចព្រមព្រៀងជាឯកតោភាគី ដូចដែលលោកត្រាំបានធ្វើ។ រដ្ឋបាលលោកបៃដិន បាននិយាយថាពួកគេមិនធ្វើការប្ដេជ្ញាតាមការទាមទារទាំងនេះទេ។
រដ្ឋាភិបាលអាមេរិក ជាសាធារណៈមិនទាន់បានបង្ហាញសញ្ញាថាប្រសិនបើអ៊ីរ៉ង់ពន្យារការចរចា ពួកគេនឹងដាក់បន្ថែមទៀត។ ប៉ុន្តែនៅក្នុងសេតវិមានមានការប្រញាប់ប្រញាល់ក្នុងប៉ុន្មានថ្ងៃថ្មីៗនេះ ដើម្បីពិចារណាអំពីកិច្ចព្រមព្រៀងបណ្តោះអាសន្នមួយចំនួនដែលអាចបង្កកការផលិតអ៊ុយរ៉ាន្យោមកម្រិតសុទ្ធខ្ពស់របស់អ៊ីរ៉ង់ និងការបំប្លែងរ៉ែទាំងនេះទៅជាទម្រង់លោហធាតុ ដែលជាជំហានចាំបាច់ក្នុងការផលិតក្បាលគ្រាប់។ ជាការតបស្នងវិញ សហរដ្ឋអាមេរិកអាចនឹងបន្ធូរបន្ថយទណ្ឌកម្មមួយចំនួន។ វិធានការនឹងមិនដោះស្រាយបញ្ហានោះទេ ប៉ុន្តែវាអាចផ្ដល់ពេលវេលាបន្ថែមសម្រាប់ការចរចា ខណៈពេលដែលពួកគេអាចរារាំងការគំរាមកំហែងរបស់អ៊ីស្រាអែលក្នុងការវាយប្រហាររោងចក្ររបស់អ៊ីរ៉ង់៕
