រុស្សីចោទប្រកាន់លោកខាងលិចថាបង្កឱ្យមានភាពតានតឹងនៅអ៊ុយក្រែនដោយសិប្បនិម្មិត
កាលពីថ្ងៃអាទិត្យនេះ វិមានក្រឹមឡាំងបានចោទប្រកាន់លោកខាងលិចថាបានបង្កឱ្យមានភាពតានតឹងជុំវិញបញ្ហាអ៊ុយក្រែនដោយសិប្បនិម្មិត តាមរយៈការលើកឡើងម្ដងហើយម្ដងទៀតថាប្រទេសរុស្សីកំពុងត្រៀមខ្លួនឈ្លានពានអ្នកជិតខាងរបស់ខ្លួន ហើយបានប្រាប់ក្រុងវ៉ាស៊ីនតោន និងសម្ព័ន្ធមិត្តរបស់ពួកគេឱ្យបញ្ឈប់ការប្រមូលផ្ដុំយោធានៅជិតទីនោះ។
កាលពីថ្ងៃសៅរ៍រដ្ឋមន្ត្រីការបរទេសអាមេរិកលោកអាន់តូនី ប្លីនខែនប្រទេសរបស់លោកមានការព្រួយបារម្ភពិតប្រាកដ ដែលត្រូវបានចែករំលែកយ៉ាងទូលំទូលាយជាមួយដៃគូនៅអឺរ៉ុប ជុំវិញសកម្មភាពរបស់រុស្ស៊ីនៅព្រំដែនអ៊ុយក្រែន បន្ទាប់ពីអ៊ុយក្រែនបាននិយាយថា ខ្លួនបារម្ភថារុស្ស៊ីអាចនឹងរៀបចំការវាយប្រហារ។
ក្នុងរយៈពេលពីរសប្ដាហ៍ចុងក្រោយនេះ មន្ត្រីអាមេរិក អង្គការណាតូ និងអ៊ុយក្រែន ក៏បានធ្វើលើកឡើងស្រដៀងលោកប្លីខែនផងដែរ ដោយនិយាយសំដៅទៅលើអ្វីដែលគេនិយាយថាជាចលនាទ័ពរុស្ស៊ីមិនធម្មតានៅជិតអ៊ុយក្រែន។ មន្ត្រីចារកម្មអ៊ុយក្រែនបានអះអាងថាទាហានរុស្សីច្រើនជាង ៩០.០០០ នាក់បានប្រមូលផ្ដុំនៅតំបន់ព្រំដែនជាមួយខ្លួន។
ក្រុងមូស្គូបានច្រានចោលការចោទប្រកាន់ទាំងនេះថាជាការអុជអាល ហើយបានរិះគន់ការកើនឡើងសកម្មភាពរបស់អង្គការណាតូនៅក្នុងតំបន់នេះ។
កាលពីថ្ងៃអាទិត្យអ្នកនាំពាក្យវិមានក្រឹមឡាំងលោកឌីមីទ្រី ប៉េស្កូវបាននិយាយថា៖ «ភាពច្របូកច្របល់នេះកំពុងត្រូវបានបង្កឡើងដោយសិប្បនិម្មិត។ យើងកំពុងត្រូវបានចោទប្រកាន់ពីប្រភេទនៃសកម្មភាពយោធាមិនធម្មតានៅលើទឹកដីរបស់យើងដោយអ្នកដែលបាននាំយកកងកម្លាំងប្រដាប់អាវុធរបស់ពួកគេឆ្លងកាត់មហាសមុទ្រ។ នោះគឺសហរដ្ឋអាមេរិក»។