យោធាស៊ូដង់តែងតាំងនាយករដ្ឋមន្ត្រីឡើងវិញ ប៉ុន្តែការតវ៉ានៅតែបន្ត
ខាទុំ៖ យោធាស៊ូដង់តែងតាំងតំណែងរបស់នាយករដ្ឋមន្ត្រី Abdalla Hamdok ឡើងវិញកាលពីថ្ងៃអាទិត្យ ហើយសន្យាថានឹងដោះលែងអ្នកជាប់ឃុំនយោបាយទាំងអស់បន្ទាប់ពីភាពចលាចលដែលបង្កឡើងក្រោយរដ្ឋប្រហារជាច្រើនសប្តាហ៍ ប៉ុន្តែហ្វូងមនុស្សយ៉ាងច្រើននៅតែបន្តដើរតាមផ្លូវតវ៉ាដើម្បីបដិសេធកិច្ចព្រមព្រៀងណាមួយដែលពាក់ព័ន្ធនឹងកងទ័ព។
ក្រោមកិច្ចព្រមព្រៀងមួយដែលចុះហត្ថលេខាជាមួយមេដឹកនាំយោធាឧត្តមសេនីយ៍ Abdel Fattah al-Burhan លោកនាយករដ្ឋមន្រ្តី Hamdok ដែលត្រូវបានតែងតាំងដំបូងបន្ទាប់ពីរបបផ្តាច់ការរបស់លោក Omar al-Bashir ត្រូវបានផ្ដួលរំលំនៅក្នុងការបះបោរឆ្នាំ ២០១៩ នឹងដឹកនាំរដ្ឋាភិបាលស៊ីវិល។
កិច្ចព្រមព្រៀងនេះប្រឈមនឹងការប្រឆាំងពីក្រុមគាំទ្រលទ្ធិប្រជាធិបតេយ្យ និងរងប្រតិកម្មចំពោះការស្លាប់របស់បាតុកររាប់សិបនាក់ចាប់តាំងពីរដ្ឋប្រហារថ្ងៃទី ២៥ ខែតុលា។
ក្រុមអ្នកតវ៉ាស្រែកបន្ទាប់ពីកិច្ចព្រមព្រៀងនេះត្រូវបានប្រកាសថា៖ «លោក Hamdok លក់បដិវត្តន៍»។ សមាគមវិជ្ជាជីវៈស៊ូដង់ (SPA) ដែលជាក្រុមតវ៉ាឈានមុខគេហៅកិច្ចព្រមព្រៀងថា «ក្បត់ជាតិ»។
មនុស្សរាប់ម៉ឺននាក់ចូលរួមការប្រមូលផ្តុំដែលគ្រោងទុកនៅរដ្ឋធានីខាទុំ (Khartoum) ក្រុង Omdurman និង Bahri ។ សាក្សីនិយាយថា កងកម្លាំងសន្តិសុខបាញ់គ្រាប់កាំភ្លើង និងឧស្ម័នបង្ហូរទឹកភ្នែក ដើម្បីបំបែកហ្វូងមនុស្ស។ គណៈកម្មាធិការកណ្តាលនៃក្រុមគ្រូពេទ្យស៊ូដង់និយាយថា អ្នកតវ៉ាអាយុ ១៦ ឆ្នាំម្នាក់នៅក្រុង Omdurman បានស្លាប់ដោយសារត្រូវគ្រាប់កាំភ្លើង។
បាតុករម្នាក់ឈ្មោះ Omar Ibrahim អាយុ ២៦ ឆ្នាំដែលធ្វើការតវ៉ានៅទីក្រុង Khartoum និយាយថា៖ «លោក Hamdok បានធ្វើឱ្យយើងខកចិត្ត។ ជម្រើសតែមួយគត់របស់យើងគឺ[ការតវ៉ាតាម]ផ្លូវ»។
លោកនាយករដ្ឋមន្រ្តី Hamdok លោកយល់ព្រមលើកិច្ចព្រមព្រៀងនេះ ដើម្បីការពារកុំឱ្យមានអ្នកស្លាប់ និងរបួសបន្ថែមទៀត។ លោកនិយាយក្នុងពិធីចុះហត្ថលេខាលើកញ្ចក់ទូរទស្សន៍រដ្ឋថា៖ «ឈាមប្រជាជនស៊ូដង់មានតម្លៃថ្លៃ។ ចូរយើងបញ្ឈប់ការបង្ហូរឈាម និងដឹកនាំថាមពលរបស់យុវជនក្នុងការកសាង និងអភិវឌ្ឍន៍»។
យ៉ាងណាមិញ កិច្ចព្រមព្រៀងថ្មីមិនបាននិយាយអំពីកងកម្លាំងនៃសេរីភាព និងការផ្លាស់ប្តូរ (FFC) សម្ព័ន្ធស៊ីវិលដែលរួមអំណាចជាមួយយោធាមុនរដ្ឋប្រហារក្នុងឆ្នាំ២០១៩នោះទេ។ មនុស្សមួយចំនួននៅក្នុងពិធីចុះហត្ថលេខានេះទៀតសោត ក៏មានទំនាក់ទំនងនយោបាយជាមួយអតីតមេដឹកនាំផ្ដាច់ការលោក Bashir ។
សម្ព័ន្ធស៊ីវិល FFC អះអាងថា ខ្លួនមិនទទួលស្គាល់កិច្ចព្រមព្រៀងណាមួយជាមួយយោធាទេ។ គណបក្សសមាជស៊ូដង់ ដែលជាសមាជិក FFC ឈានមុខគេ ដែលមានមេដឹកនាំមួយចំនួនត្រូវបានឃុំខ្លួន ហៅការចូលរួមក្នុងកិច្ចព្រមព្រៀងរបស់លោក Hamdok ថា «ខុសច្បាប់ និងអធម្មនុញ្ញ» និងផ្តល់ការបិទបាំងនយោបាយសម្រាប់រដ្ឋប្រហារ។គណកម្មាធិការតស៊ូជាច្រើនដែលរៀបចំការតវ៉ាក៏ចេញសេចក្តីថ្លែងការណ៍បដិសេធរាល់កិច្ចព្រមព្រៀងជាមួយយោធា។
លោកនាយករដ្ឋមន្រ្តី Hamdok ត្រូវបានគេឃុំខ្លួនក្នុងផ្ទះនៅពេលពួកយោធាកាន់កាប់អំណាចកាលពីខែតុលាឆ្នាំនេះ ហើយវាជាសកម្មភាពដែលសហគមន៍អន្តរជាតិនានាចេញមុខថ្កោលទោសថាជាការធ្វើរដ្ឋប្រហារបែបយោធា។
