មហាសេដ្ឋីអូស្ត្រាលីសន្យាជួយក្រុមហ៊ុនប្រព័ន្ធផ្សព្វផ្សាយតូចៗចរចាជាមួយ Google និង Facebook
មហាសេដ្ឋីមានជាងគេនៅប្រទេសអូស្ត្រាលី និងជាម្ចាស់ភាគហ៊ុនធំបំផុតនៃក្រុមហ៊ុនរ៉ែដែក Fortescue Metals Group លោក Andrew Forrest នឹងជួយក្រុមហ៊ុនប្រព័ន្ធផ្សព្វផ្សាយតូចៗចំនួន ១៨ស្ថាប័នក្នុងការចរចារួមជាមួយនឹងក្រុមហ៊ុនបច្ចេកវិទ្យាយក្ស Google និង Facebook ដើម្បីធានាឱ្យបាននូវកិច្ចព្រមព្រៀងផ្គត់ផ្គង់ព័ត៌មាននៅក្នុងប្រព័ន្ធអ៊ីនធឺណែតអូស្ត្រាលី ឱ្យស្របតាមច្បាប់បច្ចេកវិទ្យារបស់ប្រទេសនេះ។
អូស្ត្រាលីកាលពីដើមឆ្នាំ២០២១នេះ បានចេញច្បាប់មួយ ដោយតម្រូវឱ្យក្រុមហ៊ុនធំៗដូចជា Google និង Facebook បង់ប្រាក់ទៅឱ្យក្រុមហ៊ុនព័ត៌មានក្នុងស្រុកអូស្ត្រាលី ដែលកំពុងដំណើរការលើប្រព័ន្ធក្រុមហ៊ុនធំៗទាំងពីរនេះ។ ខាងអូស្ត្រាលីយល់ឃើញថា ការធ្វើបែបនេះអាចជួយឱ្យក្រុមហ៊ុនប្រព័ន្ធផ្សព្វផ្សាយក្នុងស្រុកអាចឈរជើងបាន ស្របពេលដែលមនុស្សភាគច្រើនទទួលបានព័ត៌មានលើប្រព័ន្ធអ៊ីនធឺណែត។
ចាប់តាំងពីអូស្ត្រាលីចេញច្បាប់នេះមក ក្រុមហ៊ុន Facebook និង Google បានទៅចរចាជាមួយក្រុមហ៊ុនព័ត៌មានអូស្ត្រាលីធំៗអស់ហើយ នៅឡើយតែក្រុមហ៊ុនតូចៗប៉ុណ្ណោះ។ ប្រសិនបើក្រុមហ៊ុនយក្សទាំងពីរនេះមិនចរចាជាមួយក្រុមហ៊ុនតូចៗនោះទេ រដ្ឋាភិបាលនឹងចូលទៅចរចាជំនួសវិញ។
ស្ថិតក្នុងស្ថានភាពបែបនេះហើយ មូលនិធិ Minderoo ស្ថិតក្រោមការគ្រប់គ្រងរបស់ក្រុមហ៊ុនរបស់លោក Forrest បានលើកឡើងកាលពីថ្ងៃច័ន្ទថា ខ្លួននឹងដាក់ពាក្យទៅកាន់គណៈកម្មាធិការនៃការប្រកួតប្រជែង និងអ្នកប្រើប្រាស់អូស្ត្រាលី (ACCC) ដែលជានិយ័តករលើបញ្ហា ដើម្បីធានាថាក្រុមហ៊ុនព័ត៌មានតូចៗទាំង ១៨នោះ មិនល្មើសច្បាប់នៃការប្រកួតប្រជែងរបស់អូស្ត្រាលី។
ក្រុមហ៊ុនប្រព័ន្ធផ្សព្វផ្សាយទាំង ១៨នេះ ជាក្រុមហ៊ុនព័ត៌មានដែលផ្ដោតលើបញ្ហានៅក្នុងស្រុក និងបញ្ហានៅក្នុងតំបន់៕
