ហ្វីលីពីននឹងចាប់ផ្ដើមផ្គត់ផ្គង់ដល់យោធារបស់ខ្លួន កំពុងប្រចាំការនៅសមុទ្រចិនខាងត្បូង
ហ្វីលីពីននឹងចាប់ផ្ដើមបេសកកម្មក្នុងការផ្គត់ផ្គង់យោធារបស់ខ្លួន ដែលឈរជើងនៅតំបន់សមុទ្រចិនខាងត្បូងឡើងវិញ ក្រោយពីចិនបញ្ជូននាវាឆ្មាំសមុទ្រធ្វើទុក្ខបុកម្នេញដល់ទូកផ្គត់ផ្គង់សម្ភារៈយោធានេះ។ នេះបើតាមការលើកឡើងរបស់លោក Delfin Lorenzana រដ្ឋមន្ត្រីការពារជាតិហ្វីលីពីនកាលពីថ្ងៃអាទិត្យកន្លងទៅ។
កាលពីសប្ដាហ៍មុន ហ្វីលីពីនបានធ្វើការថ្កោលទោសទៅកាន់ខាងចិន ដោយហេតុថានាវាឆ្មាំសមុទ្ររបស់ចិនចំនួន ៣គ្រឿងបានធ្វើការរាំងខ្ទប់ និងប្រើកាណុងបាញ់ទឹក ទៅកាន់នាវាហ្វីលីពីនដែលផ្គត់ផ្គង់សម្ភារៈទំនុកបម្រុងដល់យោធាជើងទឹករបស់ខ្លួន ដែលឈរជើងត្រង់ចំណុចថ្មប៉ប្រះទឹក Second Thomas ដែលមានចម្ងាយប្រមាណ ២០០គីឡូម៉ែត្រពីឆ្នេរសមុទ្រហ្វីលីពីនខាងលិច។
រដ្ឋមន្ត្រីការពារជាតិហ្វីលីពីនបាននិយាយថា ក្រោយពីលោកជួបជាមួយឯកអគ្គរដ្ឋទូតចិនប្រចាំទីក្រុងម៉ានីលហើយ លោកធ្វើការធានាថា បេសកកម្មផ្គត់ផ្គង់ឱ្យកងទ័ពហ្វីលីពីននៅក្នុងសប្ដាហ៍នេះ នឹងមិនមានការជ្រៀតជ្រែកពីខាងចិនទៀតទេ។
លោក Lorenzana បានអះអាងថា លោកបានជួបជាមួយទូតចិនចាប់តាំងពីល្ងាចថ្ងៃទី១៦ ខែវិច្ឆិកា រហូតដល់ថ្ងៃសៅរ៍សប្ដាហ៍មុន។
យ៉ាងណាមិញ ខាងស្ថានទូតចិនមិនបានផ្ដល់នូវការបកស្រាយចំពោះការលើកឡើងនេះទេ។
មេបញ្ជាការភូមិភាគខាងលិចរបស់យោធាហ្វីលីពីនលោក Ramil Roberto Enriquez បានលើកឡើងថា នាវាឆ្មាំសមុទ្ររបស់ចិនបានដកថយបណ្ដើរៗហើយ កាលពីយប់ថ្ងៃសៅរ៍៕