អ្នកនាំពាក្យៈ បើក្រសួងមហាផ្ទៃប្តឹងតំណាងស្ថាបនិកគណបក្សបេះដូងជាតិ គឺជាប់គុកហើយ
ភ្នំពេញៈ អ្នកនាំពាក្យក្រសួងមហាផ្ទៃបានបញ្ជាក់ថា លោក សៀម ភ្លុក តំណាងស្ថាបនិកគណបក្សបេះដូងជាតិប្រកាសប្តឹង ក្រសួងមហាផ្ទៃក៏ប្តឹងទៅមិនមានបញ្ហាអ្វីទេ គឺជាសិទ្ធិ។ប៉ុន្តែអ្នកនាំពាក្យក្រសួងមហាផ្ទៃបានផ្តាំទៅតំណាងស្ថាបនិក គណបក្សបេះដូងជាតិ កុំរត់ទៅសុំសិទ្ធិជ្រកកោននយោបាយ ពីព្រោះថា បើក្រសួងមហាផ្ទៃប្តឹងទៅតុលាការ គឺជាប់គុកហើយ។
ការបញ្ជាក់របស់អ្នកនាំពាក្យក្រសួងមហាផ្ទៃបានធ្វើឡើងបន្ទាប់ពីតំណាងស្ថាបនិកគណបក្សបេះដូងជាតិបានប្រកាស ប្តឹងក្រសួងមហាផ្ទៃទៅតុលាការកំពូល រឿងដែលក្រសួងមហាផ្ទៃមិនចុះបញ្ជីគណបក្សបេះដូងជាតិក្នុងបញ្ជីគណបក្សនយោ បាយនៅក្រសួងមហាផ្ទៃ។
នាយឧត្តមសេនីយ៍ សន្តិបណ្ឌិត ខៀវ សុភ័គ អ្នកនាំពាក្យក្រសួងមហាផ្ទៃ បានមានប្រសាសន៍ប្រាប់ AMS នៅល្ងាចថ្ងៃទី២២ ខែវិច្ឆិកានេះថា ក្រសួងមហាផ្ទៃមិនប្តឹងលោក សៀម ភ្លុក តំណាងស្ថាបនិកគណបក្សបេះដូងជាតិ គឺជារឿងមួយដែលក្រសួងមហាផ្ទៃយោគយល់អនុគ្រោះទៅហើយពាក់ព័ន្ធស្នាមមេដៃក្លែងបន្លំដែលដាក់មកក្រសួងមហាផ្ទៃស្នើសុំបញ្ជីគណបក្សគណបក្សបេះដូងជាតិ។
អ្នកនាំពាក្យក្រសួងមហាផ្ទៃបានមានប្រសាសន៍យ៉ាងដូច្នេះថា“ក្រសួងមហាផ្ទៃមិនប្តឹងគាត់ជារឿងមួយដែលក្រសួងមហាផ្ទៃ យោគយល់អនុគ្រោះទៅហើយស្នាមមេដៃក្លែងបន្លំ ដោយសារគុកវាចង្អៀតច្រើនណាស់អនុគ្រោះទៅគ្រាន់តែមិនចុះបញ្ជីទៅ បានហើយ។មិនបាច់ទាន់ប្តឹងទេហើយចាំមើលប្រតិកម្មគាត់ថាម៉េច?ដល់ឥឡូវគាត់ប្តឹង។ប្តឹងក៏ប្តឹងទៅមានអី។ប៉ុន្តែផ្តាំមុនឲ្យហើយ កុំសុំសិទ្ធិជ្រកកោននយោបាយ។ តែក្រសួងប្តឹងជាប់គុកហើយ។កុំយករឿងនឹង ជាសុំសិទ្ធិជ្រកកោមនយោបាយ បើចង់ប្តឹងយើងនឹងប្តឹងតបទៅវិញ”។
សូមជម្រាបថាក្រសួងមហាផ្ទៃបានបដិសេធចំពោះសំណើសុំចុះបញ្ជីគណបក្សបេះដូងជាតិក្នុងបញ្ជីគណបក្សនយោបាយនៅ ក្រសួងមហាផ្ទៃនិងសម្រេចឲ្យអគ្គស្នងការដ្ឋាននគរបាលជាតិធ្វើការស្រាវជ្រាវបុគ្គលដែលមានចេតនាទុច្ចរិតក្នុងការផ្តិតស្នាម មេដៃជំនួស ការក្លែងបន្លំអត្តសញ្ញាណបុគ្គល និងការផ្តិតស្នាមមេដៃឲ្យខូចគុណភាពនិងសម្រេចដាក់ពាក្យប្តឹងតំណាង ស្ថាបនិកគគណបក្សបេះដូងជាតិ ទៅតុលាកការដើម្បីចាត់វិធានការតាមផ្លូវច្បាប់។
យោងតាមលិខិតរបស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីកក្រសួងមហាផ្ទៃ ចុះថ្ងៃទី១៥ ខែកញ្ញា ឆ្នាំ២០២១ ជម្រាបទៅលោក សៀម ភ្លុក តំណាងស្ថាបនិកគណបក្សបេះដូងជាតិថាក្រសួងមហាផ្ទៃបានធ្វើការរំលឹក ចំនួន២ (ពីរ) លើករួចមកហើយ ចំពោះ “គណបក្សបេះដូងជាតិ” ដើម្បីឲ្យធ្វើការកែសម្រួលខ្លឹមសារ នៃលក្ខន្តិកៈ គណបក្សតាមលិខិតដូចចុះក្នុងយោងខាងលើ។ ប៉ុន្តែគណបក្សនេះ នៅតែមិនអនុវត្តតាមស្មារតី នៃលិខិតជូនដំណឹងរបស់ក្រសួងមហាផ្ទៃ ដោយពុំកំណត់អំពីវិធាន នៃការបញ្ចូលសមាជិកភាព ទៅក្នុងលក្ខន្តិកៈគណបក្ស ស្របតាមបញ្ញត្តិមាត្រា១០ ត្រង់ចំណុច៤ នៃច្បាប់ស្តីពីគណបក្សនយោបាយ។ ដូច្នេះ ក្រសួងមហាផ្ទៃស្នើឲ្យគណបក្សបេះដូងជាតិ ធ្វើការកែសម្រួលខ្លឹមសារក្នុងលក្ខន្តិកៈគណបក្ស ឲ្យបានត្រឹមត្រូវស្របតាមបញ្ញត្តិមាត្រា១០ ត្រង់ចំណុច៤ នៃច្បាប់ស្តីពីគណបក្សនយោបាយ រួចហើយត្រូវផ្ញើជូនមកក្រសួងមហាផ្ទៃវិញ ក្នុងរយៈពេលយ៉ាងយូរ១៥(ដប់ប្រាំ)ថ្ងៃ ចាប់ពីថ្ងៃទទួលលិខិតជូនដំណឹងនេះ ជាកំហិត។ ក្នុងករណីនៅតែមិនអនុវត្តតាមស្មារតី នៃលិខិតជូនដំណឹងនេះ ក្រសួងមហាផ្ទៃនឹងសម្រេចមិនចុះឈ្មោះ “គណបក្សបេះដូងជាតិ” ក្នុងបញ្ជីគណបក្សនយោបាយនៅក្រសួងមហាផ្ទៃនោះឡើយ។
សូមជម្រាបថា សម្តេចក្រឡាហោម ស ខេង កាលពីថ្ងៃទី២១ ខែមិថុនា ឆ្នាំ២០២១ បានអនុញ្ញាតឲ្យបង្កើត “គណបក្សបេះដូងជាតិ” បន្ទាប់ពីតំណាងស្ថាបនិកគណបក្សបេះដូងជាតិ បានដាក់ពាក្យស្នើសុំបង្កើតកាលពីថ្ងៃទី៣ ខែមិថុនា ឆ្នាំ២០២១៕ ដោយៈ ពលជ័យ
