តុលាការ ICC ផ្អាកធ្វើការស៊ើបអង្កេតយុទ្ធនាការសង្គ្រាមប្រឆាំងនឹងគ្រឿងញៀននៅហ្វីលីពីនបណ្ដោះអាសន្ន
អយ្យការអមតុលាការព្រហ្មទណ្ឌអន្តរជាតិហៅកាត់ថា ICC បានប្រកាសកាលពីថ្ងៃសៅរ៍អំពីការផ្អាកការស៊ើបអង្កេតជាបណ្ដោះអាសន្នទៅលើយុទ្ធនាការសង្គ្រាមប្រឆាំងនឹងគ្រឿងញៀននៅក្នុងប្រទេសហ្វីលីពីន។ យុទ្ធនាការនេះជាគោលនយោបាយមួយរបស់លោក រ៉ូឌ្រីហ្គោ ឌូតឺតេ ប្រធានាធិបតីហ្វីលីពីន ដែលសម្លាប់អ្នកប្រើប្រាស់ និងអ្នកជួញដូរគ្រឿងញៀនក្រៅផ្លូវតុលាការ។
ខាងតុលាការ ICC បានបញ្ជាក់ពីហេតុផលក្នុងការផ្អាកនេះថា ដោយសារតែរដ្ឋាភិបាលហ្វីលីពីនបានដាក់សំណើមកកាន់ខ្លួនក្នុងការពន្យារពេលនៃការស៊ើបអង្កេត។ ក្នុងលិខិតនោះដែរ រដ្ឋាភិបាលហ្វីលីពីនបានលើកឡើងថា ខ្លួនបានចាប់ផ្ដើមធ្វើការស្រាវជ្រាវពីករណីនៃការសម្លាប់មនុស្សក្នុងយុទ្ធនាការប្រឆាំងនឹងគ្រឿងញៀននេះហើយ។
យ៉ាងណាក៏ដោយ រឿងរ៉ាវនេះធ្វើឱ្យគ្រួសារជនរងគ្រោះបង្ហាញពីការមិនសប្បាយចិត្តយ៉ាងខ្លាំង។ លោកស្រី Normita Lopez អាយុ ៥៧ឆ្នាំ ហើយមានកូនប្រុសម្នាក់បានស្លាប់ក្នុងយុទ្ធនាការខាងលើនេះ បានប្រាប់សារព័ត៌មានរ៉យទ័រថា៖ «ខ្ញុំពោរពេញទៅដោយកំហឹងខ្លាំងណាស់។ ខ្ញុំស្ទើរតែគប់ទូរស័ព្ទខ្ញុំចោលទៅហើយ នៅពេលដែលខ្ញុំឃើញព័ត៌មាននេះ»។
តុលាការព្រហ្មទណ្ឌអន្តរជាតិបានប្រកាសកាលពីខែកញ្ញាថា ខ្លួននឹងធ្វើការស៊ើបអង្កេតពីការសម្លាប់រង្គាល ដោយសារតែយុទ្ធនាការប្រឆាំងគ្រឿងញៀននៅហ្វីលីពីន។ ចាប់តាំងពីពេលនោះមក អាជ្ញាធររបស់រដ្ឋការលោក ឌូតឹរតេ បានចាប់ផ្ដើមត្រួតពិនិត្យ ៥០ករណីពាក់ព័ន្ធនឹងការសម្លាប់នេះ។
រដ្ឋមន្ត្រីក្រសួងយុត្តិធម៌ប្រទេសហ្វីលីពីន លោក Menardo Guevarra បានលើកទឹកចិត្តឱ្យគ្រួសារជនរងគ្រោះដាក់ពាក្យបណ្ដឹងដោយផ្ទាល់ទៅកាន់ក្រសួង ដើម្បីធ្វើការស៊ើបអង្កេតស្វែងរកយុត្តិធម៌៕
