ព្រឹកស្អែករដ្ឋសភាបន្តសម័យប្រជុំ ដោយមានរបៀបវារៈសំខាន់ចំនួនប្រាំមួយ
ភ្នំពេញៈរដ្ឋសភាជាតិនៃកម្ពុជានឹងបន្តសម័យប្រជុំរដ្ឋសភាលើកទី៦ នីតិកាលទី៦ នៅព្រឹកថ្ងៃទី២៥ ខែវិច្ឆិកា ឆ្នាំ២០២១ស្អែក នេះដោយមានរបៀបវារៈសំខាន់ចំនួនប្រាំមួយ។ក្នុងនោះ មានរបៀបវារៈបោះឆ្នោតជ្រើសតាំង ឯកឧត្តមកិត្តិសេដ្ឋាបណ្ឌិត ជាម យៀប ជាអនុប្រធានទី១ រដ្ឋសភាជំនួស ឯកឧត្តមកិត្តិនីតិកោសលបណ្ឌិត ងួន ញ៉ិល ដែលទទួលរមណភាព។
សម័យប្រជុំរដ្ឋសភានៅព្រឹកស្អែកនេះមានរបៀបវារៈមួយចំនួន។ក្នុងនេះ ១-ប្រកាសទទួលស្គាល់ ឯកឧត្តម អ៊ុន ប៊ុនហាន ជាតំណាងរាស្ត្រមណ្ឌលខេត្តកំពង់ធំ ជំនួស ឯកឧត្តមកិត្តិនីតិកោសលបណ្ឌិត ងួន ញ៉ិល ដែលទទួលរមណភាព។២- បោះឆ្នោតជ្រើសតាំង ឯកឧត្តមកិត្តិសេដ្ឋាបណ្ឌិត ជាម យៀប ជាអនុប្រធានទី១ រដ្ឋសភាជំនួសឯកឧត្តមកិត្តិនីតិកោសល បណ្ឌិត ងួន ញ៉ិល ដែលទទួលរមណភាព។៣-បោះឆ្នោតជ្រើសតាំង ឯកឧត្តម ឈាង វុន ជាសមាជិកគណៈកម្មសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា និង ឯកឧត្តម ជៀប ស៊ីវន ជាសមាជិកគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃរដ្ឋសភា។ ៤-ការពិភាក្សា និងអនុម័តសេចក្តីព្រាងច្បាប់ស្តីពី ការអនុម័តយល់ព្រមលើពិធីសារអាស៊ានស្តីពីការពង្រឹងយន្តការដោះស្រាយវិវាទ។៥-ការពិភាក្សា និងអនុម័ត សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២២។
ចំណែករបៀបវារៈទី៦-ការពិភាក្សា និងអនុម័ត សេចក្តីព្រាងច្បាប់ស្តីពីការទូទាត់ថវិកាទូទៅរបស់រដ្ខសម្រាប់ការគ្រប់គ្រងឆ្នាំ២០២០៕ដោយៈពលជ័យ