សហរដ្ឋអាមេរិកអញ្ជើញកោះតៃវ៉ាន់ឱ្យចូលរួមកិច្ចប្រជុំកំពូលលទ្ធិប្រជាធិបតេយ្យរបស់ខ្លួន ដែលបង្កកំហឹងពីចិន
រដ្ឋបាលលោក ចូ បៃដិន (Joe Biden) អញ្ជើញតៃវ៉ាន់ឱ្យចូលរួមកិច្ចប្រជុំកំពូលដើម្បីប្រជាធិបតេយ្យនៅខែក្រោយ បង្កការខឹងសម្បារពីចិន ដែលចាត់ទុកកោះតៃវ៉ាន់ថាជាផ្នែកមួយនៃទឹកដីរបស់ខ្លួន។
ជំនួបលើកដំបូងគឺជាការសាកល្បងនៃការអះអាងរបស់លោកបៃដិន ដែលប្រកាសក្នុងសុន្ទរកថាគោលនយោបាយការបរទេសលើកដំបូងរបស់លោកក្នុងការិយាល័យកាលពីខែកុម្ភៈថា លោកនឹងប្រគល់សហរដ្ឋអាមេរិកឱ្យត្រឡប់ទៅជាអ្នកដឹកនាំពិភពលោកវិញដើម្បីប្រឈមមុខនឹងកម្លាំងផ្តាច់ការដែលដឹកនាំដោយចិន និងរុស្ស៊ី។
ក្រសួងការបរទេសតៃវ៉ាន់និយាយថា រដ្ឋមន្ត្រីឌីជីថលលោក Audrey Tang និងអ្នកស្រី Hsiao Bi-khim ឯកអគ្គរដ្ឋទូតតៃវ៉ាន់ប្រចាំទីក្រុងវ៉ាស៊ីនតោននឹងតំណាងឱ្យរដ្ឋាភិបាលដើម្បីទៅចូលរួមកិច្ចប្រជុំ។ ក្រសួងនិយាយថា៖ «ការអញ្ជើញរបស់ប្រទេសរបស់យើងឱ្យចូលរួមក្នុងកិច្ចប្រជុំកំពូលដើម្បីលទ្ធិប្រជាធិបតេយ្យ គឺជាការបញ្ជាក់ពីកិច្ចខិតខំប្រឹងប្រែងរបស់តៃវ៉ាន់ក្នុងការលើកកម្ពស់តម្លៃនៃលទ្ធិប្រជាធិបតេយ្យ និងសិទ្ធិមនុស្សក្នុងរយៈពេលជាច្រើនឆ្នាំកន្លងមកនេះ»។
ក្រសួងការបរទេសចិនបាននិយាយថា ខ្លួនប្រឆាំងដាច់ខាតចំពោះការអញ្ជើញនេះ។ អ្នកនាំពាក្យក្រសួងលោក Zhao Lijian ប្រាប់អ្នកយកព័ត៌មាននៅទីក្រុងប៉េកាំងថា៖ «សកម្មភាពរបស់សហរដ្ឋអាមេរិកបង្ហាញថា លទ្ធិប្រជាធិបតេយ្យគ្រាន់តែជាការបិទបាំង និងជាឧបករណ៍សម្រាប់ជំរុញគោលបំណងភូមិសាស្ត្រនយោបាយរបស់ខ្លួន គាបសង្កត់ប្រទេសផ្សេងទៀត បែងចែកពិភពលោក និងបម្រើផលប្រយោជន៍របស់ខ្លួនប៉ុណ្ណេះ»។
ការអញ្ជើញកោះតៃវ៉ាន់ធ្វើឡើងនៅពេលដែលចិនបង្កើនសម្ពាធលើប្រទេសនានាឱ្យបំបែកទំនាក់ទំនងជាមួយកោះនេះ។ ប៉ុន្តែតៃវ៉ាន់និយាយថា ក្រុងប៉េកាំងគ្មានសិទ្ធិនិយាយសម្រាប់ខ្លួនទេ។ ភាពខុសគ្នាយ៉ាងខ្លាំងជុំវិញកោះតៃវ៉ាន់ កើតមានឡើងក្នុងអំឡុងពេលកិច្ចប្រជុំតាមប្រព័ន្ធវិឌីអូកាលពីដើមខែរវាងលោកបៃដិន និងប្រធានាធិបតីចិនលោក Xi Jinping។
នៅអាស៊ី សម្ព័ន្ធមិត្តរបស់អាមេរិកមួយចំនួនដូចជា ជប៉ុន និងកូរ៉េខាងត្បូងត្រូវបានអញ្ជើញ ខណៈប្រទេសផ្សេងទៀតដូចជាថៃ និងវៀតណាមមិនត្រូវបានអញ្ជើញ។ សម្ព័ន្ធមិត្តអាមេរិក ប្រទេសអេហ្ស៊ីបនិងសមាជិកណាតូតួកគីក៏អវត្តមាន ហើយមានតែប្រទេសមជ្ឈិមបូព៌ាពីរប៉ុណ្ណេះរួមមានអ៊ីស្រាអែល និងអ៊ីរ៉ាក់ ដែលត្រូវបានអញ្ជើញ។