អាមេរិកដាក់ក្រុមហ៊ុនមួយចំនួន ដែលពាក់ព័ន្ធនឹងយោធាចិន ប៉ាគីស្ថាន និងរុស្ស៊ីក្នុងបញ្ជីខ្មៅ
អាជ្ញាធរនៃក្រសួងពាណិជ្ជកម្មអាមេរិកកាលពីថ្ងៃពុធបានដាក់ក្រុមហ៊ុន ឬ ស្ថាប័នចំនួន ២៧ ដែលមានមូលដ្ឋាននៅចិន ជប៉ុន ប៉ាគីស្ថាន និងសិង្ហបុរី ដាក់ចូលក្នុងបញ្ជីអង្គភាព (Entity List) និងស្ថាប័នមួយមកពីប្រទេសរុស្ស៊ីដាក់ចូលក្នុងបញ្ជីអង្គភាពដែលផ្ដល់ប្រយោជន៍ឱ្យយោធា (Military End User)។
អាមេរិកបានចាត់ទុកថា ក្រុមហ៊ុនចំនួន ៨ ដែលមានមូលដ្ឋាននៅស្រុកចិន បានប្រើប្រាស់ផលិតអាមេរិក ដើម្បីគាំទ្រដល់ទំនើបកម្មយោធាចិន។ ចំណែកឯក្រុមហ៊ុនចំនួន ១៦ ដែលស្ថិតនៅចិន និងប៉ាគីស្ថាន បានបម្រើដល់កម្មវិធីផលិតនុយក្លេអ៊ែរ ឬ មីស៊ីលបាលីស្ទិកនៅប៉ាគីស្ថានដែលមិនមានការការពារត្រឹមត្រូវ។ ចំណែកឯក្រុមហ៊ុនចំនួន ៣ទៀត ដែលមានមូលដ្ឋាននៅចិន ជប៉ុន និងសិង្ហបុរី បានប្រើប្រាស់បច្ចេកវិទ្យាអាមេរិក និងសម្ព័ន្ធមិត្ត សម្រាប់យោធាអ៊ីរ៉ង់ ក្រុមហ៊ុនរបស់កូរ៉េខាងជើង ក៏ដូចជា ក្រុមហ៊ុនឧស្សាហកម្មបុត្រសម្ព័ន្ធរបស់រដ្ឋាភិបាលចិន។
រីឯអង្គភាពមួយរបស់រុស្ស៊ីគឺ វិទ្យាស្ថានមូស្គូនៃរូបវិទ្យា និងបច្ចេកវិទ្យា បម្រើដល់ផលិតកម្មនូវបរិក្ខារយោធា សម្រាប់ភាគីយោធាណាមួយ។
បើក្រុមហ៊ុនណាមួយជាប់ក្នុងបញ្ជីអង្គភាព នោះការិយាល័យឧស្សាហកម្ម និងសន្តិសុខនៃក្រសួងពាណិជ្ជកម្មអាមេរិកនឹងធ្វើការរឹតបន្តឹងការនាំចេញ ឬ ការផ្ទេរទំនិញក្រោមរូបភាពណាមួយពីសំណាក់ក្រុមហ៊ុនអាមេរិក ទៅកាន់ក្រុមហ៊ុនទាំងអស់នោះ។
ចំណែកឯបញ្ជីអង្គភាពបម្រើដល់ប្រយោជន៍យោធា ជាបញ្ជីដែលអាមេរិកចាត់ទុកថា អង្គភាពទាំងនោះពាក់ព័ន្ធដោយផ្ទាល់នឹងទាហានរបស់ចិន រុស្ស៊ី វេណេហ្ស៊ុយអេឡា និងមីយ៉ាន់ម៉ា។
ក្រុមហ៊ុនអាមេរិកទាំងអស់ ត្រូវតែសុំការអនុញ្ញាតពីក្រសួងពាណិជ្ជកម្មចំពោះការនាំចេញទំនិញណាដែលមិនប៉ះពាល់ដល់សន្តិសុខជាតិ ទៅកាន់ក្រុមហ៊ុនដែលជាប់ក្នុងបញ្ជីទាំងនោះ៕