សហរដ្ឋអាមេរិក អង់គ្លេស កាណាដា និងអឺរ៉ុបដាក់ទណ្ឌកម្មថ្មីប្រឆាំងនឹងបេឡារុស ជុំវិញវិបត្តិជនភៀសខ្លួន
បរទេស៖ សហភាពអឺរ៉ុប កាណាដា ចក្រភពអង់គ្លេស និងសហរដ្ឋអាមេរិកបានដាក់បន្ថែមទណ្ឌកម្មថ្មីប្រឆាំងនឹងប្រទេសបេឡារុស ចំពោះការបង្កវិបត្តិជនភៀសខ្លួនដោយហេតុផលនយោបាយ នៅតាមព្រំដែនប្រទេសប៉ូឡូញដែលជាសមាជិករបស់សហភាពអឺរ៉ុប។
សេចក្តីថ្លែងការណ៍រួមមួយពីសហរដ្ឋអាមេរិក អង់គ្លេស កាណាដា និងសហភាពអឺរ៉ុបបានបញ្ជាក់ថា ការដាក់ទណ្ឌកម្មនេះ គឺដើម្បីឆ្លើយតបទៅនឹងការបន្តការវាយប្រហារលើសិទ្ធិមនុស្ស និងសេរីភាពជាមូលដ្ឋាននៅក្នុងប្រទេសបេឡារុស ការមិនយកចិត្តទុកដាក់ចំពោះបទដ្ឋានអន្តរជាតិ និងទង្វើនៃការគាបសង្កត់ម្តងហើយម្តងទៀត។ សេចក្តីថ្លែងការណ៍ដដែលនេះបានទាមទារឱ្យរបបដឹកនាំរបស់ប្រធានាធិបតីបេឡារុសលោក អាឡិចសាន់ឌ័រ លូកាសិនកូ បញ្ឈប់ជាបន្ទាន់ និងទាំងស្រុងនូវការរៀបចំការធ្វើចំណាកស្រុកមិនទៀងទាត់ឆ្លងកាត់ព្រំដែនរបស់ខ្លួនជាមួយសហភាពអឺរ៉ុប។ ទោះជាយ៉ាងណា ប្រទេសបេឡារុស តាមរយៈក្រសួងការបរទេសរបស់ខ្លួនបានធ្វើការរិះគន់ចំពោះការទណ្ឌកម្មនេះ។
គួរបញ្ជាក់ថា ទណ្ឌកម្មរបស់សហភាពអឺរ៉ុប និងប្រទេសទាំងបីខាងលើនេះ បានកំណត់គោលដៅទៅលើមន្ត្រីសន្តិសុខ និងយុត្តិធម៌ជាន់ខ្ពស់ ឥស្សរជនប្រព័ន្ធផ្សព្វផ្សាយល្បីៗ កូនប្រុសម្នាក់របស់លោកប្រធានាធិបតីបេឡារុស ក្រុមហ៊ុនពាក់ព័ន្ធនឹងក្រសួងការពារជាតិ និងក្រុមហ៊ុននាំចេញជីរដ៏ធំមួយ។ អ្នកជាប់ទណ្ឌកម្មដទៃទៀតគឺក្រុមហ៊ុនអាកាសចរណ៍រដ្ឋ Belavia ប្រតិបត្តិករទេសចរណ៍ និងសណ្ឋាគារដែលបានសហការជាមួយរដ្ឋាភិបាល ក្នុងការទាក់ទាញជនភៀសខ្លួនមជ្ឈិមបូព៌ារាប់ពាន់នាក់ទៅកាន់ព្រំដែនប៉ូឡូញ និងលីទុយអានី ដែលបង្កឱ្យមានវិបត្តិចំណាកស្រុក និងមនុស្សធម៌៕ ប្រភព៖ NHK