សហរដ្ឋអាមេរិកព្រមានថា រុស្ស៊ីនឹងប្រឈមផលវិបាកធ្ងន់ធ្ងរ ប្រសិនបើហ៊ានឈ្លានពានអ៊ុយក្រែន
បរទេស៖ រដ្ឋមន្ត្រីការបរទេសអាមេរិក លោក អាន់តូនី ប្លីងខិន បានព្រមានសមភាគីរុស្ស៊ីលោក សឺហ្គៃ ឡាវរូវ ថា ទាហានរុស្ស៊ីចាំបាច់ត្រូវដកថយពីព្រំដែនជាមួយអ៊ុយក្រែន ហើយថា ទីក្រុងមូស្គូ អាចប្រឈមនឹង “ផលវិបាកធ្ងន់ធ្ងរ”។
លោក ប្លីងខិន បានថ្លែងព្រមានបែបនេះជាមួយលោក ឡាវរូវ នៅខាងក្រៅកិច្ចប្រជុំនៅទីក្រុង ស្តុកហូម (Stockholm) នៃអង្គការសន្តិសុខ និងកិច្ចសហប្រតិបត្តិការនៅអឺរ៉ុប ដែលហៅកាត់ថា OSCE។ កិច្ចប្រជុំលំដាប់ខ្ពស់រវាងរុស្ស៊ី និងសហរដ្ឋអាមេរិកនេះត្រូវបានធ្វើឡើងក្រោយមានភាពតានតឹងជាច្រើនសប្ដាហ៍ ជាមួយទីក្រុងកៀវ និងសម្ពន្ធមិត្តលោកខាងលិច ដែលបង្ហាញនូវក្តីព្រួយបារម្ភជុំវិញការប្រមូលផ្តុំកងទ័ពរុស្ស៊ីដ៏ធំនៅជិតព្រំប្រទល់ជាប់នឹងប្រទេសអ៊ុយក្រែន។ មន្ត្រីអ៊ុយក្រែនបាននិយាយថា ទាហានរុស្ស៊ីជាង ៩ម៉ឺននាក់បានប្រមូលផ្តុំគ្នានៅតាមព្រំដែន។ ពួកគេបានឃើញជនជាតិរុស្ស៊ីចូលលុកលុយក្នុងឆ្នាំ ២០១៤ បន្ទាប់មកបានចូលលុកលុយតំបន់ឧបទ្វីបគ្រីមៀ ហេតុដូច្នេះពួកគេខ្លាចកងទ័ពរុស្ស៊ីកំពុងរៀបចំសម្រាប់ការឈ្លានពានមួយផ្សេងទៀត។ ជុំវិញបញ្ហាខាងលើនេះ លោក ប្លីងខិន បាននិយាយថា ការប្រមូលផ្តុំកងទ័ពនេះបានដើរផ្ទុយនឹងកិច្ចព្រមព្រៀងរវាងប្រទេសរបស់ពួកគេសម្រាប់ទំនាក់ទំនងដែលមានស្ថិរភាព។
ទោះជាយ៉ាងណា ទីក្រុងមូស្គូ បដិសេធថា មិនបានរៀបផែនការឈ្លានពាន និងចោទអ៊ុយក្រែន ពីបទកងប្រមូលផ្តុំកងកម្លាំងខ្លួននៅភាគខាងកើតប្រទេស ជាទី ដែលកងកម្លាំងរដ្ឋាភិបាលបានប្រយុទ្ធគ្នាជាមួយពួកបះបោរគាំទ្រដោយរុស្ស៊ី ចាប់តាំងពីដើមឆ្នាំ២០១៤ ក្រោយទីក្រុងមូស្គូ យកតំបន់គ្រីមៀ ពីអ៊ុយក្រែនដាក់ចូលជាឧបសម្ព័ន្ធរបស់ខ្លួនមក៕ ប្រភព៖ NHK