លោកជំទាវ ទេពរង្ស៊ី-ខៀវកាញារីទ្ធ នាំយកទេយ្យទានប្រគេនព្រះសង្ឃវត្តរាជបូណ៌
សៀមរាប ៖ នៅព្រឹកថ្ងៃទី០៣ ខែធ្នូ ឆ្នាំ២០២១ លោកជំទាវ ទេព រង្ស៊ី ភរិយាឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន រួមទាំងសហការីជាពុទ្ធសាសនូបត្ថម្ភក៍ បាននាំយកទេយ្យទាន មានអង្ករ៥០០គក្រ សាដក ២ ទឹកពិសាបរិសុទ្ធ១០កេស មី ១០កេស ម៉ាស ៣៦០ម៉ាស កៅអៀក ១២០បន្ទះ ក្រូចផ្លុង ១ការ៉ុង និងមានបច្ច័យ មួយចំនួនទៀតផងដែរ ប្រគេនចំពោះព្រះសង្ឃ និងគណៈកម្មការអាចារ្យនៃវត្តរាជបូណ៌ក្រុងសៀមរាប ខេត្តសៀមរាប ដើម្បីបានតំកល់សទ្ធាទាំងនេះ ទុកជាប្រយោជន៍ សម្រាប់បំពេញតម្រូវការក្នុងទីអារាមតាមការគួរ ។ ក្នុងនេះដែរ ប្រការចាំបាច់ជាប្រចាំថ្ងែនោះ គឺការផ្គត់ផ្គង់ដល់សមណសិស្ស ដែលកំពុងគង់អាស្រ័យរៀនសូត្រធម្មវិន័យ អក្សរបាលី-បិដក នៅក្នុងទីអារាមនេះផងដែរ។
ពិធិវេរប្រគេនទេយ្យទាន ត្រូវបានស្ថិតក្រោមព្រះវត្តមាន ព្រះមហាវិមលធម្មសិរីសុវណ្ណោ ពិន សែម រាជាគណៈថ្នាក់ទោ គណៈមហានិកាយ ឧត្តមទីប្រឹក្សាគណៈសង្ឃនាយក សមាជិកថេរសភាព្រះពុទ្ធសាសនានៃព្រះរាជាណាចក្រកម្ពុជា និងជាព្រះគ្រូចៅអធិការវត្តរាជបូណ៌ ក្រុង-ខេត្តសៀមរាប។
ព្រះអង្គមានបន្ទូលថា ឱវាទរបស់ព្រះអង្គ បានសម្តែងថា អ្នកកាន់ព្រះពុទ្ធសាសនា ត្រូវតែប្រកាន់យកជំជឿ៤យ៉ាងដែលត្រីមត្រូវ គឺទី១ ត្រូវជឿលើការងារ ទី២ ត្រូវជឿលើផលការងារដែលបានធ្វើរួចមកហើយនោះ ទី៣ ត្រូវជឿថា យើងទាំងអស់គ្នាត្រូវតែធ្វើការងារដែលត្រូវធ្វើ មិនធ្វើការងារមិនអាចរស់បានទេ និងទី៤ ត្រូជឿលើបញ្ញាត្រាស់ដឹងនៃព្រះសម្មាសម្ពុទ្ធ ព្រះបរមគ្រូនៃយើង៕ ដោយ ស៊ាន សុផាត