សម្ដេចតេជោ ៖ បេក្ខភាពនាយករដ្ឋមន្រ្តីនាពេលអនាគត មាន៤រូប និងថា ដំណើរការប្រជាធិបតេយ្យនៅកម្ពុជា នៅតែបន្ត គ្មានប្រែប្រួលនោះឡើយ
ព្រៃវែង៖ ក្នុងឱកាសពិធីសម្ពោធដាក់ឱ្យប្រើប្រាស់ជាផ្លូវការផ្លូវជាតិលេខ១១ (អ្នកលឿង-ថ្នល់ទទឺង) និងផ្លូវក្នុងខេត្តព្រៃវែង នៅព្រឹកថ្ងៃទី៦ ខែធ្នូ ឆ្នាំ២០២១ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានបញ្ជាក់ថា ដំណើរការប្រជាធិបតេយ្យនៅកម្ពុជា នៅតែបន្ត គ្មានការប្រែប្រួលនោះឡើយ។ សម្ដេចតេជោ បន្តថា ទោះបី ហ៊ុន ម៉ាណែត ត្រូវបានគាំទ្រជាបេក្ខភាពនាយករដ្ឋមន្ត្រី សម្រាប់គណបក្សប្រជាជនកម្ពុជាក៏ដោយ ក៏ត្រូវតែធ្វើឡើងតាមការបោះឆ្នោត ដោយសេរី ត្រឹមត្រូវ និងយុត្តិធម៌ ។
ក្រៅពីកូនប្រុសច្បង គឺឯកឧត្តម ហ៊ុន ម៉ាណែត, សម្ដេចតេជោ ហ៊ុន សែន នាយករដ្ឋមន្រ្តីកម្ពុជា បានប្រកាសបង្ហើបថា នៅក្នុងជួរគណបក្សប្រជាជនកម្ពុជា បេក្ខភាពនាយករដ្ឋមន្រ្តី នាពេលខាងមុខ មាន៤រូប។ សម្តេច ក៏ឲ្យបណ្តាមន្រ្តីជាន់ខ្ពស់ផ្សេងទៀតក្នុងជួររាជរដ្ឋាភិបាល ដាក់កូនៗរបស់ខ្លួន មកធ្វើជាបេក្ខភាពនាយករដ្ឋមន្រ្តីទៅ ដោយគ្មានការហាមឃាត់ឡើយ ។
ជាមួយគ្នានេះដែរ សម្តេចតេជោ នាយករដ្ឋមន្រ្តី ក៏បានប្រាប់សម្ដេច ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ចេញមុខបកស្រាយ និងវាយបកចំពោះការលើកឡើងរបស់ក្រុមអ្នកវិភាគ ក៏ដូចជាក្រុមប្រឆាំង ជុំវិញបេក្ខភាពនាយករដ្ឋមន្រ្តី នាពេលខាងមុខ។
សម្តេចតេជោ ហ៊ុន សែន បានបន្ថែមថា ក្រោយការប្រកាសរបស់សម្តេច កាលពីសប្តាហ៍មុនអំពីលទ្ធភាពឯកឧត្តម ហ៊ុន ម៉ាណែត ធ្វើនាយករដ្ឋមន្រ្តីនៅពេលអនាគត មានអ្នកប្រឆាំងនិងអ្នកវិភាគចេញមកវិភាគជាហូរហែរ ។ បើតាមសម្តេច មានបុគ្គលម្នាក់នោះ បានលើកពីសម្តេច ស ខេង សមធ្វើជានាយករដ្ឋមន្រ្តីជាង ដោយបុគ្គលនោះបានលើកពីសម្តេច ស ខេង ជាផ្កាយនាំសំណាង ជាងសម្តេចតេជោ ៕ ដោយ វណ្ណលុក