រដ្ឋមន្ត្រីក្រសួងការបរទេសមីយ៉ាន់ម៉ា អញ្ជើញបំពេញទស្សនកិច្ចនៅកម្ពុជា
ភ្នំពេញ៖ ឯកឧត្តម វុន ម៉ោងលីន (Wunna Maung Lwin) រដ្ឋមន្ត្រីក្រសួងការបរទេសនៃសាធារណរដ្ឋសហភាពមីយ៉ាន់ម៉ា អញ្ជើញមកបំពេញទស្សនកិច្ចផ្លូវការនៅកម្ពុជារយៈពេលពីរថ្ងៃ គឺនៅថ្ងៃទី៦ និងទី៧ ខែធ្នូ ឆ្នាំ២០២១។ ឯកឧត្តមនឹងអញ្ជើញមកដល់កម្ពុជានៅម៉ោងជាង១០ព្រឹក ថ្ងៃទី៦ ខែធ្នូនេះ។
តាមកម្មវិធីដែលគ្រោងទុកនៅព្រឹកថ្ងៃទី៧ ខែធ្នូស្អែកនេះ ឯកឧត្តម វុន ម៉ោងលីន អញ្ជើញជួបសម្តែងការគួរសម និងពិភាក្សាការងារជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជានៅវិមានសន្តិភាព។ បន្ទាប់ពីជួបពិភាក្សាការងារជាមួយសម្តេចតេជោ ហ៊ុន សែន រួច ឯកឧត្តម វុន ម៉ោងលីន នឹងអញ្ជើញជួបពិភាក្សាជាមួយឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ នៅក្រសួងការបរទេស។
ទស្សនកិច្ចរបស់ឯកឧត្តមរដ្ឋមន្ត្រីការបរទេសមីយ៉ាន់ម៉ានៅកម្ពុជានាពេលនេះ ផ្តោតលើការស្វែងរកដំណោះស្រាយនៅប្រទេសភូមា នៅក្នុងសហគមន៍អាស៊ាន ខណៈដែលកម្ពុជានឹងធ្វើជាប្រធានអាស៊ាននៅឆ្នាំក្រោយ។
សម្តេចតេជោនាយករដ្ឋមន្ត្រីនៃកម្ពុជានៅក្នុងពិធីសម្ពោធដាក់ឱ្យប្រើប្រាស់ជាផ្លូវការហេដ្ឋារចនាសម្ព័ន្ធផ្លូវចំនួន៣៧ខ្សែ និងអាងប្រព្រឹត្តកម្មទឹកកខ្វក់ចំនួន២ និងសមិទ្ធផលនានាក្នុងក្រុងព្រះសីហនុកាលព្រឹកថ្ងៃទី២ ខែធ្នូកន្លងទៅបានថ្លែងថា៖«នៅថ្ងៃទី៦ ទី៧ ខែធ្នូនេះ ឯកឧត្តមរដ្ឋមន្ត្រីការបរទេសមីយ៉ាន់ម៉ា មកកាន់កម្ពុជា ហើយពេលនោះខ្ញុំនឹងជជែកខ្ញុំត្រៀមខ្លួនជាស្រេចដើម្បីធ្វើដំណើរទៅកាន់មីយ៉ាន់ម៉ាដោយមិនដាក់លក្ខខណ្ឌទុកជាមុន ទៅក្នុងរូបភាពជានាយករដ្ឋមន្ត្រីកម្ពុជា។ ខ្ញុំទៅក្នុងនាមនាយករដ្ឋមន្ត្រីកម្ពុជា ប៉ុន្តែខ្ញុំអត់ធ្វើសកម្មភាពនៅពេលនេះទេ»។
សម្តេចតេជោនាយករដ្ឋមន្ត្រីបន្តថា «ថ្ងៃ១មករា, ញញួរគ្រាន់តែបានយកមកទេ តែមិនទាន់បានប្រើទេ។ អ៊ីចឹងបើអាស៊ានតែ៩ ម៉េចបានហៅអាស៊ានទៅកើត? អាស៊ានត្រូវមាន កុងសង់ស៊ីស។ អ៊ីចឹងដែលមានកុងសង់ស៊ីសត្រូវតែមាន១០ ធម្មនុញ្ញអាស៊ានមិនតម្រូវឱ្យដេញសមាជិកណាមួយចេញទេ។ នេះជាការបង្ហើបការគិតគូរខ្លះរបស់អនាគតប្រធានអាស៊ាននៅតែប៉ុន្មានថ្ងៃទៀតដល់ប្រធានអាស៊ានត្រូវធ្វើការ…»។
សម្តេចតេជោនាយករដ្ឋមន្ត្រីបានបន្តថា តើយើងគួរពង្រឹងផ្ទះខ្លួនឯង?។ ផ្ទះវាមានជើងសសរ១០។ ឥឡូវសសរមួយបាក់តើទុកឱ្យវាបាត់អ៊ីចឹងដើម្បីបំពេញចិត្តដៃគូខាងក្រៅឬក៏ត្រូវរៀបចំផ្ទះខ្លួនឯង?បើផ្ទះខ្លួនឯងរៀបចំមិនបានអ្វីទៅដែលហៅថាសាមគ្គីភាពក្នុងអាស៊ាន ឬមជ្ឈភាពរបស់អាស៊ាននេះជាចំណោទបញ្ហាដែលខ្ញុំលើកជាមួយនាយករដ្ឋមន្ត្រីជប៉ុន។ ខ្ញុំលើកជាមួយលោកជំទាវរដ្ឋមន្ត្រីការបរទេសឥណ្ឌូនេស៊ី។
សូមបញ្ជាក់ថា នៅក្នុងកិច្ចប្រជុំកំពួលអាស៊ាននៅក្នុងប្រទេសព្រុយណេថ្នាក់ដឹកនាំអាស៊ានបានឯកភាពមិនអញ្ជើញមេដឹកនាំមីយ៉ាន់ម៉ាឱ្យចូលរួមកិច្ចប្រជុំនោះទេ តែបានអនុញ្ញាតឱ្យតំណាងមិនមែន មន្ត្រីរដ្ឋាភិបាលមកចូលរួមបាន។ ប៉ុន្តែរដ្ឋាភិបាលមីយ៉ាន់ម៉ាមិនបញ្ជូនមន្ត្រីមកចូលរួមឡើយ៕
ដោយ:ពលជ័យ
