របាយការណ៍៖ លោក ចូ បៃដិន អាចនឹងប្រកាសពីការធ្វើពហិការផ្នែកការទូត ចំពោះព្រឹត្តិការណ៍ប្រកួតកីឡាអូឡាំពិករដូវរងានៅទីក្រុងប៉េកាំង
រដ្ឋបាលលោក ចូ បៃដិន អាចនឹងប្រកាសនៅក្នុងសប្តាហ៍នេះថា មន្ត្រីរដ្ឋាភិបាលអាមេរិកនឹងមិនទៅចូលរួមក្នុងពិធីបើកព្រឹត្តិការណ៍ប្រកួតកីឡាអូឡាំពិករដូវរងាឆ្នាំ២០២២ ដែលនឹងប្រព្រឹត្តិទៅនៅទីក្រុងប៉េកាំង ប្រទេសចិននោះទេ។ នេះបើតាមសារព័ត៌មានអាមេរិក CNN។
ពាក់ព័ន្ធនឹងបញ្ហានេះ សេតវិមានបានបដិសេធមិនធ្វើអត្ថាធិប្បាយណាមួយទៅលើរបាយការណ៍របស់ CNN នៅឡើយទេ។ បើតាមសារព័ត៌មាន CNN ការធ្វើពហិការរបស់សហរដ្ឋអាមេរិក គឺទៅលើផ្នែកការទូតប៉ុណ្ណោះ និងមិនមែនជាការរារាំងអត្តពលិករបស់ខ្លួនពីការចូលរួមប្រកួតនៅចិននោះទេ។ កាលពីខែវិច្ឆិកាកន្លងទៅ ប្រធានាធិបតីអាមេរិក លោក ចូ បៃដិន ធ្លាប់បានបង្ហើបថា លោកកំពុងពិចារណាក្នុងការធ្វើពហិការផ្នែកការទូត ចំពោះព្រឹត្តិការណ៍ប្រកួតកីឡាអូឡាំពិករដូវរងានៅទីក្រុងប៉េកាំង ប្រទេសចិន ដែលនឹងប្រព្រឹត្តទៅនៅឆ្នាំ២០២២ ខាងមុខនេះ ដើម្បីប្រឆាំងនឹងកំណត់ត្រាសិទ្ធិមនុស្សពាក់ព័ន្ធនឹងទីក្រុងប៉េកាំង។
ទន្ទឹមនេះ អង្គការមនុស្សធម៌ និងសមាជិកសភាអាមេរិកបានអំពាវនាវឱ្យធ្វើពហិការលើការរំលោភបំពានលើជនជាតិភាគតិចអ៊ុយហ្គ័រ ក្នុងនោះមានទាំងការបង្ក្រាបលើការតវ៉ានយោបាយនៅទីក្រុងហុងកុង និងការព្រួយបារម្ភជុំវិញសិទ្ធិបញ្ចេញមតិដោយសេរីនៅក្នុងប្រទេសចិន ដូចជាករណី “បាត់ខ្លួន” តារាវាយកូនបាល់ចិន Peng Shuai ជាដើម។ លើកចុងក្រោយដែលសហរដ្ឋអាមេរិកធ្វើពហិការទាំងស្រុងចំពោះកីឡាអូឡាំពិក គឺនៅឆ្នាំ 1980 នៅពេលដែលពួកគេធ្វើជាម្ចាស់ផ្ទះនៅទីក្រុងមូស្គូ ប្រទេសរុស្ស៊ី៕ ប្រភព៖ CNN