ទឹកធ្លាក់អន្លង់រុនជាតំបន់ទេសចរណ៍គួរចូលកម្សាន្តមួយកន្លែងនៅលើខ្នងភ្នំគូលែន
ខេត្តសៀមរាប៖ភ្នំគូលែនជាទីតាំងប្រវត្តិសាស្ត្រ និង ក៏ជាភ្នំសក្ការបូជានៅក្នុងប្រទេសកម្ពុជា។នៅទីតាំងដ៏ពិសិដ្ឋមួយនេះបានបន្សល់ទុកនូវប្រាសាទបុរាណ និងស្ថានីយ៍បុរាណជាច្រើនកន្លែង។ក្រៅពីនេះក៏មានតំបន់ទឹកធ្លាក់គួរជាទីកម្សាន្តមនោរម្យជាច្រើនកន្លែងទៀត។
អ្នកទេសចរកាលបើបានទៅកម្សាន្តនៅ លើខ្នងភ្នំ គូលែន ហើយមិនគួរមើលរំលងទឹកធ្លាក់ អន្លង់រុនដែលបានបង្កប់ទៅដោយកន្លែងកម្សាន្តដ៏ពិសេសមួយផងដែរ។ទឹកធ្លាក់មួយកន្លែងនេះសព្វថ្ងៃមានទីតាំងស្ថិតនៅ ភូមិពពេល ឃុំខ្នងភ្នំ ស្រុកស្វាយលើ ខេត្តសៀមរាប។
ដោយសារមានអំណោយផលល្អ មានទេសភាពស្រស់ត្រកាល អមដោយព្រៃឈើសងខាង និងទឹកហូរកាត់ថ្មថ្លាឈ្វេង ត្រជាក់ស្រេង គេអាចចុះងូតលេងយ៉ាងសប្បាយរីករាយ។ ជាមួយនឹងជម្រៅទឹករាក់ៗ ហូរជ្រែកចង្វែកផ្ទាំងថ្មធ្លាក់មកក្រោមឮសូរសម្លេងឥតដាច់ដូចជាសង្វាក់តន្ត្រីធ្វើឱ្យអ្នកទេសចររំភើបហើយមិនចង់ឃ្លាតឆ្ងាយសោះឡើយ។
ទីកន្លែងនេះក្រៅពីមានកញ្ចុះដែលប្រជាសហគមន៍នៅក្នុងតំបន់ការពារធម្មជាតិព្រៃធំពពេលបានសាងសង់ឡើងសម្រាប់ទទួលភ្ញៀវទេសចរហើយ អ្នកទេសចរអាចអង្គុយតាមផ្ទាំងថ្មធំៗក្រោមប្លម់ដើមឈើ បរិភោគអាហារ ឬអង្គុយគយគន់ទេសភាពនៅកន្លែងនេះដោយក្តីយ៉ាងសប្បាយរីករាយ។
ក្រៅពីនេះនៅផ្នែកខាងក្រោមមិនឆ្ងាយប៉ុន្មាន មានទីវាលលេងជាដីខ្សាច់ម៉ត់សស្អាតដែលមានទឹកធ្លាក់ពីលើថ្មបែកទឹកសំពោងយើងអាចចុះងូតលេងបាន។នៅទីវាលកន្លែងនេះយើងក៏អាចអង្គុយញ៉ាំបាយក្រោមដើមឈើធំៗចោលម្លប់ត្រឈឹងត្រឈៃ ផ្តល់នូវអារម្មណ៍យ៉ាងស្រស់ស្រាយ ជាលក្ខណៈគ្រួសារ មិត្តភក្តិ និងគូស្នេហ៍។
លោក លាស់ ឆាត គណៈកម្មាធិការសហគមន៍ធំពពេលបានឱ្យដឹងថាអ្នកទេសចរមកកម្សាន្តទឹកធ្លាក់អន្លង់រុនអាចបោះតង់ សម្រាកនៅពេលយប់នៅកន្លែងនេះបានដោយមានសុវត្តិភាព។ក្រៅពីនេះគេអាចកុម្ម៉ង់អាហារដូចជា ជ្រូកកណ្តុរអាំង មាន់អាំងដែលជាប្រភេទអាហារពិសេសប្រចាំសហគមន៍បរិភោគបានទៀតផង។
ជាមួយគ្នានេះលោក លាស់ វណ្ណា ប្រធានមណ្ឌលព័ត៌មានទេសចរណ៍ពពេល បានបញ្ជាក់ប្រាប់ឱ្យដឹងដែរថា បច្ចុប្បន្នទឹកធ្លាក់អន្លង់រុន មានភ្ញៀវទេសចរចូលកម្សាន្តបន្តបន្ទាប់ តែមិនច្រើនទេ។
លោកចង់ឱ្យភ្ញៀវទេសចរងាកមកចាប់អារម្មណ៍តំបន់កម្សាន្តទឹកធ្លាក់កន្លែងពីព្រោះថាមានទីកម្សាន្តទឹកធ្លាក់ ទេសភាពព្រៃភ្នំ សម្លេងសត្វព្រៃនិងបរិយាកាសប្រកបដោយបរិសុទ្ធ។
លោក ឈឿម តាំង មេឃុំ ខ្នងភ្នំ ស្រុក ស្វាយលើ ខេត្តសៀមរាបបានបញ្ជាក់ប្រាប់ឱ្យដឹងផងថា បច្ចុប្បន្នក្នុងនាមអាជ្ញាធរមូលដ្ឋាន លោកបានជំរុញឱ្យប្រជាសហគមន៍រូមគ្នាសម្អាតអនាម័យ និងមិនត្រូវចោលសំរាមផ្តេសផ្តាសនោះឡើយ។លោកចាត់ទុកថាការដែលបរិស្ថានស្អាតនឹងធ្វើឱ្យទាក់ទាញភ្ញៀវទេសចរ ដែលទាំងនេះសុទ្ធសឹងតែគេនាំចំណូលមកសហគមន៍ទាំងអស់។
គួរបញ្ជាក់ថា គម្រោងនិរន្តរភាពតំបន់ទេសភាព និងទេសចរណ៍ធម្មជាតិកម្ពុជា បានគាំទ្រសហគមន៍តំបន់ការពារធម្មជាតិចំនួនពីរគឺសហគមន៍ព្រៃធំពពេល និងសហគមន៍ព្រៃធំអន្លង់ធំនៅលើឧទ្យានជាតិ ព្រះជ័យវរ្ម័ន-នរោត្តមភ្នំគូលែនដោយគម្រោងបានយកចិត្តទុកដាក់ពង្រឹងលើផ្នែកទេសចរណ៍ធម្មជាតិ មានទាំងកិច្ចការងារបដិសណ្ឋារកិច្ច ការនាំភ្ញៀវនិងការអភិរក្សជាដើម។លើសពីនេះគម្រោងក៏ជួយឲ្យមានកំណើនជីវភាពប្រជាសហគមន៍តាមរយ:បង្កើនការចិញ្វឹមសត្វជ្រូកកណ្តុរ ការចិញ្ចឹម មាន់និងឃ្មុំព្រៃផងដែរ៕ដោយ៖ម៉ាដេប៉ូ