ភ្នំពេញ ៖ បុរសជនជាតិបរទេសម្នាក់ បើកបររថយន្តមួយគ្រឿង បត់ត្រឡប់ក្រោយជ្រុលបុកបង្គោលភ្លើងពេញទំហឹង បណ្តាលឱ្យរងការខូចខាតបាក់បង្គោលភ្លើងអស់មួយដើម និងរថយន្តរងការខូចខាតយ៉ាងដំណំ តែសំណាងល្អ មិនបណ្ដាលឱ្យមានមនុស្សរងរបួសនោះទេ។ ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៥ និង៤៥នាទីព្រឹក ថ្ងៃទី១៤ ខែធ្នូ ឆ្នាំ២០២១ ស្ថិតនៅតាមបណ្តោយផ្លូវសបិត ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។

តាមប្រភពព័ត៌មាននៅកន្លែងកើតហេតុ បានឱ្យដឹងថា នៅមុនពេលកើតហេតុ គេឃើញរថយន្តមួយគ្រឿង ម៉ាកឡុចស៊ីស RX.៣០០ ពណ៌ខ្មៅ ពាក់ស្លាកលេខ ភ្នំពេញ 2AY-3534 បើកបរដោយបុរសជនជាតិបរទេសម្នាក់ បានធ្វើដំណើរតាមបណ្ដោយផ្លូវសបិត ទិសដៅពីជើងមកត្បូង ខណៈមកដល់ត្រង់ចំណុចកើតហេតុខាងលើ ក៏ស្រាប់តែបានបត់ឆ្វេងដៃត្រឡប់ក្រោយវិញ ជ្រុលទៅបុកបង្គោលភ្លើងពេញទំហឹង បណ្ដាលឱ្យរងការខូចខាតបាក់បង្គោលភ្លើងអស់មួយដើម និងរថយន្តរងការខូចខាតផ្នែកខាងមុខយ៉ាងដំណំ តែសំណាងល្អ ក្នុងករណីគ្រោះថ្នាក់ចរាចរណ៍នេះ មិនបណ្ដាលឱ្យមានមនុស្សរងរបួសនោះទេ។

ក្រោយពេលកើតហេតុ សមត្ថកិច្ចមូលដ្ឋាន បានចុះមកដល់ទីតាំងកន្លែងកើតហេតុខាងលើ ដោយមើលឃើញថាខូចខាតដល់ទ្រព្យសម្បត្តិរបស់រដ្ឋ ក៏បានធ្វើការទំនាក់ទំនងទៅខាងសមត្ថកិច្ចជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ចុះមកធ្វើការវាស់វែងយករថយន្តបង្កទៅរក្សាទុក ដើម្បីរង់ចាំធ្វើការដោះស្រាយគ្នានៅពេលក្រោយ៕ ដោយ/ ឆៃហួត