សហរដ្ឋអាមេរិកនឹងមិនដាក់ទណ្ឌកម្មលើកងទ័ព ចំពោះការវាយប្រហារដោយដ្រូននៅទីក្រុងកាប៊ុលនោះទេ
រដ្ឋមន្ត្រីការពារជាតិអាមេរិកលោក Lloyd Austin សម្រេចចិត្តប្រឆាំងនឹងការដាក់វិន័យលើសមាជិកណាមួយនៃយោធាសហរដ្ឋអាមេរិក ចំពោះការវាយប្រហារដោយដ្រូនកាលពីខែសីហានៅរដ្ឋធានីកាប៊ុល ដែលសម្លាប់ជនស៊ីវិល ១០ នាក់ រួមទាំងក្មេង ៧ នាក់ក្នុងចំណោមនោះ។ នេះបើតាមការចុះផ្សាយរបស់កាសែតញូវយ៉កថែមស៍កាលពីថ្ងៃចន្ទ។
មន្ត្រីជាន់ខ្ពស់មន្ទីរបញ្ចកោណនិយាយប្រាប់កាសែតញូវយ៉កថែមស៍ជាអនាមិកថា ការសម្រេចចិត្តរបស់លោករដ្ឋមន្រ្តី Austin ធ្វើឡើងក្រោមអនុសាសន៍ពីមេបញ្ជាការយោធាអាមេរិកពីរនាក់រួមមានលោក Kenneth F. McKenzie Jr. ប្រធានបញ្ជាការយោធាកណ្តាល និងលោក Richard D. Clarke ប្រធានបញ្ជាការប្រតិបត្តិការពិសេស ដែលមិនឱ្យដាក់វិន័យលើបុគ្គលិកណាពាក់ព័ន្ធនឹងការវាយប្រហារ។
ការត្រួតពិនិត្យផ្ទៃមួយក្នុងរបស់មន្ទីរបញ្ចកោណកាលពីខែមុននិយាយថា ការទម្លាក់គ្រាប់បែកកាលពីថ្ងៃទី ២៩ ខែសីហានៅក្នុងរដ្ឋធានីអាហ្វហ្គានីស្ថាន មិនបំពានច្បាប់នៃសង្គ្រាមទេ ហើយក៏មិនបណ្តាលមកពីការប្រព្រឹត្តខុសឬការធ្វេសប្រហែសព្រហ្មទណ្ឌដែរ។
លោក John Kirby អ្នកនាំពាក្យមន្ទីរបញ្ចកោណ និយាយក្នុងអំឡុងពេលសន្និសីទសារព័ត៌មានកាលពីថ្ងៃចន្ទថា ការត្រួតពិនិត្យកាលពីខែមុនគឺជាភារកិច្ចរបស់មេបញ្ជាការអាមេរិក ក្នុងការស្តីបន្ទោសមន្ត្រីយោធាជុំវិញការវាយប្រហារដោយដ្រូនប្រសិនបើចាំបាច់។
អ្នកនាំពាក្យរូបនេះនិយាយថា៖ «អ្វីដែលយើងឃើញនៅទីនេះ គឺជាការបំបែកដំណើរការ និងការប្រតិបត្តិតាមនីតិវិធី មិនមែនជាលទ្ធផលនៃការធ្វេសប្រហែស លទ្ធផលនៃការប្រព្រឹត្តខុស ឬលទ្ធផលនៃការដឹកនាំមិនល្អនោះទេ»។ លោកបន្តថា៖ «ដូច្នេះ បន្តខ្ញុំមិននឹកថា មានបញ្ហានៃទំនួលខុសត្រូវផ្ទាល់ខ្លួនដែលត្រូវធ្វើទាក់ទងនឹងការវាយប្រហារតាមអាកាសនៅថ្ងៃទី ២៩ ខែសីហានោះទេ»។
យ៉ាងណាមិញ រដ្ឋបាលរបស់លោកប្រធានាធិបតី ចូ បៃដិន (Joe Biden) ទទួលស្គាល់កាលពីខែកញ្ញាថា ការវាយប្រហារដោយដ្រូន បានសម្លាប់ជនស៊ីវិលពិតមែន។ ប៉ុន្តែដំបូងឡើយ ក្រុមយោធាការពារការវាយប្រហារនេះដោយនិយាយថា វាជាការវាយប្រហារដោយសុចរិតលើក្រុមដែលពាក់ព័ន្ធជាមួយក្រុមអាយស៊ីស (ISIS) ដែលកំពុងរៀបចំផែនការវាយប្រហារលើអាកាសយានដ្ឋានក្រុងកាប៊ុល ជាកន្លែងដែលទាហានអាមេរិកកំពុងធ្វើប្រតិបត្តិការជម្លៀសខ្លួនដ៏ធំមួយ។
លោករដ្ឋមន្រ្តី Austin ផ្ទាល់ ក៏សុំទោសចំពោះការបំផ្ទុះគ្រាប់បែកនេះ ហើយសន្យាថានឹងមានការពិនិត្យយ៉ាងហ្មត់ចត់អំពីឧប្បត្តិហេតុ។
កាលថ្ងៃទី ០៣ ខែវិច្ឆិកា អគ្គអធិការកងទ័ពអាកាសអាមេរិកលោក Sami Said និយាយថា ការទម្លាក់គ្រាប់បែកនេះគឺជា «កំហុសសុទ្ធសាធ» ដែលបណ្តាលមកពីកំហុសប្រតិបត្តិជាបន្តបន្ទាប់ រួមទាំងបញ្ហាទំនាក់ទំនងផងដែរ។ យ៉ាងណាមិញលោក Said និយាយនៅពេលនោះថា៖ «ប៉ុន្តែវាមិនមែនជាការប្រព្រឹត្តឧក្រិដ្ឋកម្ម ការប្រព្រឹត្តដោយចៃដន្យ ឬការធ្វេសប្រហែសនោះទេ»។
ការលើកឡើងរបស់លោក Said រងការរិះគន់យ៉ាងខ្លាំងពីសំណាក់ក្រុមសិទ្ធិមនុស្ស រួមទាំងសហភាពសេរីភាពស៊ីវិលអាមេរិកដែលនិយាយថា ការរកឃើញនេះមិនបានផ្តល់ឱ្យគ្រួសារជនរងគ្រោះនូវតម្លាភាព និងការទទួលខុសត្រូវចំពោះការសម្លាប់មនុស្សជាទីស្រឡាញ់របស់ខ្លួន ដោយសារតែកំហុសរបស់យោធាអាមេរិកនោះទេ។
សមាជិកគ្រួសារនៃជនរងគ្រោះនិយាយប្រាប់សារព័ត៌មានបន្ទាប់ពីការវាយប្រហារថា មនុស្ស ១០ នាក់ដែលស្លាប់មានអាយុចន្លោះពី ២ ទៅ ៤០ ឆ្នាំ។ លោក Zemari Ahmadi ដែលធ្លាប់ធ្វើការឱ្យទីភ្នាក់ងារជំនួយអាហារូបត្ថម្ភ និងការអប់រំអន្តរជាតិ (NEI) មានមូលដ្ឋាននៅសហរដ្ឋអាមេរិក ត្រូវបានយោធាអាមេរិកសង្ស័យថាលោកជាប់ពាក់ព័ន្ធនឹងក្រុមសកម្មប្រយុទ្ធ ហើយមានផ្ទុកជាតិផ្ទុះក្នុងឡានដើម្បីធ្វើការវាយប្រហារលើយោធាខ្លួននៅព្រលានយន្តហោះក្រុងកាប៊ុល។
តាមសម្ដីលោក Aimal Ahmadi ដែលជាប្អូនប្រុសលោក Zemari ជនរងគ្រោះរូបនេះស្លាប់ជាមួយកូនៗ ៧ នាក់ រួមទាំងសមាជិកគ្រួសារលោកពីរនាក់ទៀត នៅពេលបើកឡានចូលផ្ទះ ហើយមានកូនៗរត់មកទទួល មុនពេលការវាយប្រហារកើតឡើង។
ស្ថាបនិក និងប្រធានអង្គការ NEI លោក Steven Kwon ថ្កោលទោសការសម្រេចចិត្តរបស់មន្ទីរបញ្ចកោណ ដែលមិនដាក់បុគ្គលិកយោធាអាមេរិកណាម្នាក់ឱ្យទទួលខុសត្រូវចំពោះការទម្លាក់គ្រាប់បែកនេះ ហើយនិយាយថា វាជារឿងគួរឱ្យភ្ញាក់ផ្អើល។
លោកនិយាយកាលពីថ្ងៃចន្ទថា៖ «តើយោធារបស់យើងឆក់យកជីវិតប្រជាជនអាហ្វហ្គានីស្ថានដ៏មានតម្លៃ១០នាក់ដោយសារកំហុសឆ្គង ថែមទាំងមិនមាននរណាម្នាក់ទទួលខុសត្រូវតាមវិធីណាមួយ ដោយរបៀបណា?»។
ទោះបីយ៉ាងនេះក្ដី លោក Kirby ប្រាប់អ្នកយកព័ត៌មានថា មន្ទីរបញ្ចកោណកំពុងធ្វើការជាមួយអង្គការ NEI ដើម្បីប្រញាប់ផ្លាស់ទីសមាជិកគ្រួសារដែលនៅរស់រានមានជីវិតចេញពីប្រទេសអាហ្វហ្គានីស្ថាន និងផ្តល់ការទូទាត់សំណងដល់ពួកគេ ដោយមិនបានបញ្ជាក់ចំនួននោះទេ។
ការវាយប្រហារដោយដ្រូនក្នុងខែសីហា កើតឡើងប៉ុន្មានថ្ងៃបន្ទាប់ពីការបំផ្ទុះគ្រាប់បែកអត្តឃាតនៅជិតអាកាសយានដ្ឋានក្នុងក្រុងកាប៊ុលដោយក្រុមរដ្ឋអ៊ីស្លាមក្នុងខេត្ត Khorasan ISKP (ISIS-K) ដែលសម្លាប់ជនជាតិអាហ្វហ្គានីស្ថានជាង ១៥០ នាក់ រួមទាំងសមាជិកបុគ្គលិកអាមេរិកចំនួន ១៣ នាក់ផងដែរ។
ប្រភព៖ Aljazeera