រុស្ស៊ីជំទាស់សេចក្តីសម្រេចរបស់អង្គការសហប្រជាជាតិ ពាក់ព័ន្ធនឹងការប្រែប្រួលអាកាសធាតុនិងបញ្ហាសន្តិសុខ
ប្រទេសរុស្ស៊ីកាលពីថ្ងៃចន្ទ ជំទាស់លើដំណោះស្រាយក្រុមប្រឹក្សាសន្តិសុខអង្គការសហប្រជាជាតិដែលបង្ហាញថាការប្រែប្រួលអាកាសធាតុជាការគំរាមកំហែងដល់សន្តិភាព និងសន្តិសុខអន្តរជាតិ។
សេចក្ដីជំទាស់កើតមានឡើងបន្ទាប់ពីមានសំណើដឹកនាំដោយអៀរឡង់ និងនីហ្សេ អំពាវនាវឱ្យមានការបញ្ចូលព័ត៌មានស្តីពីផលប៉ះពាល់សន្តិសុខនៃការប្រែប្រួលអាកាសធាតុ ទៅក្នុងយុទ្ធសាស្ត្ររបស់ក្រុមប្រឹក្សាសម្រាប់ការគ្រប់គ្រងជម្លោះ និងចូលទៅក្នុងប្រតិបត្តិការរក្សាសន្តិភាព និងបេសកកម្មនយោបាយ ត្រូវបានបោះឆ្នោតព្រមព្រៀងភាគច្រើនដោយប្រទេសចំនួន ១១៣ លើ ១៩៣ នៃសមាជិករបស់អង្គការសហប្រជាជនជាតិគាំទ្រសេចក្ដីសម្រេចនេះ។
វិធានការស្នើឱ្យអគ្គលេខាធិការអង្គការសហប្រជាជាតិយកហានិភ័យសន្តិសុខទាក់ទងនឹងអាកាសធាតុធ្វើជា «ធាតុផ្សំសំខាន់» នៃកិច្ចខិតខំប្រឹងប្រែងការពារជម្លោះ និងរាយការណ៍អំពីរបៀបដោះស្រាយហានិភ័យទាំងនោះនៅក្នុងចំណុចក្តៅជាក់លាក់។
សេចក្តីសម្រេចដែលស្នើឡើងនិយាយថា ខ្យល់ព្យុះខ្លាំង ការកើនឡើងនៃនីវ៉ូទឹកសមុទ្រ ទឹកជំនន់ញឹកញាប់ និងគ្រោះរាំងស្ងួត និងឥទ្ធិពលផ្សេងទៀតនៃការឡើងកំដៅ អាចបង្កឱ្យមានភាពតានតឹងក្នុងសង្គម និងជម្លោះដែលអាច «បង្កហានិភ័យដ៏សំខាន់ដល់សន្តិភាព សន្តិសុខ និងស្ថិរភាពពិភពលោក»។
ឯកអគ្គរដ្ឋទូតរុស្ស៊ីលោក Vassily Nebenzia ត្អូញត្អែរថាដំណោះស្រាយដែលស្នើឡើងកាលពីថ្ងៃចន្ទ នឹងប្រែក្លាយជាបញ្ហាវិទ្យាសាស្ត្រ និងសេដ្ឋកិច្ច ទៅជាសំណួរនយោបាយ ដោយបង្វែរការយកចិត្តទុកដាក់របស់ក្រុមប្រឹក្សាពីប្រភពនៃជម្លោះនៅកន្លែងផ្សេងៗពិតប្រាកដ ហើយផ្តល់ឱ្យក្រុមប្រឹក្សានូវលេសដើម្បីធ្វើអន្តរាគមន៍លើប្រទេសស្ទើរតែគ្រប់ទាំងអស់នៅលើភពផែនដី។
យ៉ាងណាមិញ អ្នកស្រី Byrne Nason អ្នកការទូតអៀរឡង់និយាយថា៖ «ថ្ងៃនេះគឺជាឱកាសមួយសម្រាប់ក្រុមប្រឹក្សាដើម្បីទទួលស្គាល់ ជាលើកដំបូងនូវការពិតនៃពិភពលោកដែលយើងកំពុងរស់នៅ ហើយថាការប្រែប្រួលអាកាសធាតុកំពុងបង្កើនអសន្តិសុខ និងអស្ថិរភាព»។
លោក Abdou Abarry ឯកអគ្គរដ្ឋទូតនីហ្សេនិយាយថា៖ «កម្លាំងនៃការជំទាស់អាចរារាំងការអនុម័ត។ ប៉ុន្តែមិនអាចលាក់តថភាពរបស់យើងបានទេ»។
ប្រភព៖ ABC News
