អ៊ីរ៉ង់ថាអឺរ៉ុបមិនបានផ្ដល់ដំណោះស្រាយល្អ សម្រាប់ការស្ដារកិច្ចព្រមព្រៀងនុយក្លេអ៊ែរទេ
កាលពីថ្ងៃអាទិត្យនេះ ប្រទេសអ៊ីរ៉ង់បាននិយាយថាភាគីប្រទេសអឺរ៉ុបចំនួនបីរួមមាន បារាំង អាល្លឺម៉ង់ និងអង់គ្លេស បរាជ័យក្នុងការផ្ដល់ដំណោះស្រាយដែលអាចធ្វើទៅបាន សម្រាប់ការស្ដារកិច្ចព្រមព្រៀងនុយក្លេអ៊ែរឆ្នាំ ២០១៥។
អនុរដ្ឋមន្ត្រីការបរទេសអ៊ីរ៉ង់ និងអ្នកចរចាលោកអាលី បាហ្គារី កានីបាននិយាយបានសារព័ត៌មានរដ្ឋអ៊ីរ៉ង់ថា៖ «ភាគីអឺរ៉ុបបរាជ័យក្នុងការបង្កើតគំនិតផ្តួចផ្តើមណាមួយដើម្បីដោះស្រាយការខ្វែងគំនិតគ្នាជុំវិញការដកទណ្ឌកម្ម»។
ការអត្ថាធិប្បាយរបស់លោកធ្វើឡើងបន្ទាប់ពីភាគីអង់គ្លេសនិយាយថាអ៊ីរ៉ង់នៅតែមានពេលវេលាដើម្បីជួយសង្គ្រោះកិច្ចព្រមព្រៀងនុយក្លេអ៊ែរ ដែលហៅកាត់ថា JCPOA ប៉ុន្តែនេះគឺជា «ឱកាសចុងក្រោយ» របស់ពួកគេ។
រដ្ឋមន្ត្រីការបរទេសអង់គ្លេសលោកស្រីលីស ត្រាស់បាននិយាយថា៖ «នេះគឺជាឱកាសចុងក្រោយសម្រាប់អ៊ីរ៉ង់ក្នុងការចូលមកតុចរចាជាមួយនឹងដំណោះស្រាយជាក់ស្ដែងលើបញ្ហានេះ ដែលត្រូវស្របតាមលក្ខខណ្ឌនៃ JCPOA។ នេះជាឱកាសចុងក្រោយរបស់ពួកគេ ហើយវាសំខាន់ណាស់ដែលពួកគេធ្វើដូច្នេះ។ យើងនឹងមិនអនុញ្ញាតឱ្យអ៊ីរ៉ង់ទទួលបានអាវុធនុយក្លេអ៊ែរទេ»។
ភាគីបារាំង អាល្លឺម៉ង់ និង អង់គ្លេសបាននិយាយថាអ៊ីរ៉ង់ធ្វើសំណើថ្មី បន្ទាប់ពីសំណើកាលពីពីរសប្ដាហ៍ត្រូវបានពួកគេរិះគន់ថាមិនអាចទទួលយកបាន ដែលធ្វើឱ្យមានការព្យួរការចរចាដើម្បីអនុញ្ញាតឱ្យអ្នកចរចាធ្វើដំណើរទៅពិគ្រោះយោបល់ជាមួយរដ្ឋាភិបាលរាងខ្លួន។ ការចរចាកាលពីថ្ងៃព្រហស្បតិ៍សប្ដាហ៍មុន បានបញ្ចប់មួយម៉ោងក្រោយពីបានចាប់ផ្ដើមវិញ បន្ទាប់ពីភាពតានតឹងកើនឡើងជុំវិញការទាមទាររបស់អ៊ីរ៉ង់៕
ប្រភព៖ The Times of Israel