អូស្ត្រាលី និងកូរ៉េខាងត្បូងចុះកិច្ចព្រមព្រៀងលើវិស័យការពារជាតិគិតជាទឹកប្រាក់ចំនួន ៧១៧ លានដុល្លារ
នាយករដ្ឋមន្ត្រីអូស្ត្រាលីលោក Scott Morrison និងប្រធានាធិបតីកូរ៉េខាងត្បូងលោក Moon Jae-in កាលពីថ្ងៃចន្ទចុះហត្ថលេខាលើកិច្ចព្រមព្រៀងលើវិស័យការពារជាតិគិតជាទឹកប្រាក់ចំនួន ៧១៧ លានដុល្លារ ក្នុងអំឡុងពេលដំណើរទស្សនកិច្ចរយៈពេលបួនថ្ងៃរបស់លោក Moon ទៅកាន់រដ្ឋធានីកង់បេរ៉ា។
ក្រោមកិច្ចព្រមព្រៀងថ្មី ក្រុមហ៊ុនការពារជាតិកូរ៉េខាងត្បូង Hanwha នឹងផ្តល់ដល់កងទ័ពអូស្ត្រាលីនូវអាវុធ កាំភ្លើងធំ យានជំនិះ និងរ៉ាដា។ វាគឺជាកិច្ចសន្យាការពារជាតិដ៏ធំបំផុត ខណៈពេលដែលភាពតានតឹងរវាងអូស្ត្រាលី និងចិនកើនឡើងកាន់តែខ្លាំង។
លោក Morrison និយាយថា កិច្ចព្រមព្រៀងនឹងបង្កើតការងារប្រហែល ៣០០ នៅក្នុងប្រទេសអូស្ត្រាលី។ លោកនិយាយថា៖ «កិច្ចសន្យាដែលយើងចុះហត្ថលេខាថ្ងៃនេះ ខ្ញុំគិតថានិយាយច្រើនអំពីអ្វីដែលយើងជឿថាជាសមត្ថភាពរបស់ឧស្សាហកម្មការពារជាតិកូរ៉េ»។
នាយករដ្ឋមន្ត្រីរូបនេះបន្តថា៖ «វាជាជំពូកសំខាន់បន្ថែមទៀតនៅក្នុងវិស័យឧស្សាហកម្មការពារជាតិអូស្ត្រាលី នៅពេលដែលយើងបន្តកសាងសមត្ថភាពអធិបតេយ្យភាពរបស់យើង ហើយកូរ៉េគឺជាដៃគូដ៏សំខាន់ក្នុងដំណើរនោះ ដោយមិនត្រឹមតែនៅក្នុងការរៀបចំសន្តិសុខរបស់យើងទេ ប៉ុន្តែក៏នៅក្នុងការកសាងសមត្ថភាពអធិបតេយ្យភាពរបស់យើង និងក្នុងការផលិតវិស័យការពារជាតិផងដែរ»។
លោកប្រធានាធិបតី Moon និយាយថា កូរ៉េខាងត្បូងស្រដៀងគ្នាទៅនឹងប្រទេសអូស្ត្រាលីដែរ នៅពេលនិយាយអំពីទស្សនវិស័យភូមិសាស្ត្រនយោបាយរបស់ខ្លួន។ មេដឹកនាំរូបនេះបន្តថា ដំណើរទស្សនកិច្ចនៅទីក្រុងកង់បេរ៉ារបស់លោកមានសារៈសំខាន់ខ្លាំងណាស់សម្រាប់ផលប្រយោជន៍ជាតិរបស់ប្រទេសកូរ៉េ និងដើម្បីលើកកម្ពស់សន្តិភាព និងវិបុលភាពនៅក្នុងតំបន់។
យ៉ាងណាមិញ លោក Moon ក៏និយាយផងដែរថា ទំនាក់ទំនងរបស់កូរ៉េខាងត្បូងជាមួយចិនក៏មានសារៈសំខាន់ ជាពិសេសនៅពេលនិយាយអំពីការបន្តសន្តិភាពជាមួយកូរ៉េខាងជើង។ លោកនិយាយថា៖ «ដូច្នេះ កូរ៉េខាងត្បូងផ្តោតលើសម្ព័ន្ធភាពដ៏រឹងមាំជាមួយសហរដ្ឋអាមេរិក និងជាមួយប្រទេសចិន។ យើងចង់បានទំនាក់ទំនងចុះសម្រុងគ្នា»។
នាពេលថ្មីៗនេះ អូស្ត្រាលីប្រកាសកិច្ចព្រមព្រៀងសាងសង់នាវាមុជទឹកដើរដោយថាមពលនុយក្លេអ៊ែរក្នុងភាពជាដៃគូមួយដែលមានឈ្មោះថា AUKUS ជាមួយសហរដ្ឋអាមេរិក និងចក្រភពអង់គ្លេស ដែលជាទង្វើរងការថ្កោលទោសយ៉ាងខ្លាំងពីសំណាក់ប្រទេសចិន។
ប្រភព៖ Aljazeera
