ផ្សិតប៉ាឬផ្សិតច្រម៉ាស់សម្បូរដុះនៅ រដូវរងាក្នុងតំបន់ភ្នំគូលែន
ខេត្តសៀមរាប៖នៅរៀងរាល់ដល់ខែរដូវរងាឈានចូលមកដល់ប្រជាសហគមន៍រស់នៅក្នុងតំបន់ការពារធម្មជាតិព្រៃធំពពេលស្ថិតនៅ ឃុំខ្នងភ្នំ ស្រុកស្វាយលើ ខេត្តសៀមរាបតែងនាំគ្នាចេញទៅរកផ្សិតម្យ៉ាងដែលអ្នកស្រុកហៅថា ផ្សិតប៉ា ឬផ្សិតច្រម៉ាស់ដើម្បីទុកលក់និងទុកបរិភោគពីព្រោះថាជាប្រភេទមានរស់ជាតិឆ្ងាញ់ពិសារខុសប្លែកពីផ្សិតដទៃទៀត។
បើតាមក្រុមប្រជាសហគមន៍ដែលចេញទៅរកផ្សិតនេះបានឱ្យដឹងថា ផ្សិតប៉ា ឬផ្សិតច្រម៉ាសនេះគឺវាបានដុះចេញមកពីដើមប៉ា ឬដើមច្រម៉ាស់ដែលដុះលើព្រៃភ្នំ ។នៅពេលដើមឈើប្រភេទនេះបានងាប់ពុកផុយច្រើនឆ្នាំ វាបានដុះចេញជាផ្សិតរៀងរាល់ដល់រដូវរងាឈានចូលមកដល់។
អ្នកស្រី អ៊ែម ហៀង ដែលបានចេញទៅរកផ្សិតប៉ាក្នុងព្រៃលើភ្នំគូលែនឃុំខ្នងភ្នំ ស្រុកស្វាយលើ ខេត្តសៀមរាបបានឱ្យដឹងថា ឱ្យតែដល់រដូវខែរងាជាពិសេសអំឡុងចុងខែវិច្ឆិកាដល់ខែមករាគាត់តែងចេញទៅរកដកផ្សិតប៉ាឬផ្សិតច្រម៉ាសនេះគ្រាន់ទុកធ្វើម្ហូបនិងលក់គ្រាន់ដោះស្រាយជីវភាពគ្រួសាររបស់គាត់។ក្នុងមួយថ្ងៃគាត់អាចដកផ្សិតនេះបានចាប់ពី១-៦គីឡូក្រាមហើយអាចលក់ក្នុងតម្លៃមួយគីឡូមក្រាមថ្លៃ ៨០០០រៀល។
ស្ត្រីអ្នកស្រុករស់នៅលើខ្នងភ្នំគូលែនរូបនេះបន្តឱ្យដឹងថា “ផ្សិតនេះដុះលើដើមឈើ ឬមែកឈើដែលងាប់ពុកផុយច្រើនឆ្នាំ។វាដុះប្រជ្រៀតគ្នាច្រើនដោយគេអាចដកបានច្រើនក្នុងមួយកន្លែងៗដែលវាដុះ ។ផ្សិតមួយបែបនេះវាដុះតែខែរងាទេ ហើយបើអស់រដូវរងាវាក៏លែងចេញផ្សិតបន្តទៀតដែរ”។
ទាក់ទិននឹងប្រភេទផ្សិតនេះអ្នកស្រី អ៊ែម ហៀង បានឱ្យដឹងបន្ថែមថា ផ្សិតប៉ា ឬផ្សិតច្រម៉ាស់គេអាចទុកបានតែមួយថ្ងៃឬពីរថ្ងៃយ៉ាងយូរវានឹងចាស់អស់ បរិភោគមិនកើតទេ។បើចង់ឱ្យផ្សិតនេះមិនងាយចាស់គេត្រូវកាត់ដើមវាចោលហើយបើគេមិនកាត់ចោលទេវាងាយចាស់បរិភោគទៅស្វិតមិនឆ្ងាញ់សោះឡើយ។
ដោយឡែកអ្នកស្រី គង់ផានី ដែលជាអ្នកទទួលទិញផ្សិតសម្រាប់លក់បន្តមួយរូបស្ថិតនៅក្នុងឃុំខ្នងភ្នំ ស្រុកស្វាយលើ ខេត្តសៀមរាប បានរៀបរាប់ឱ្យដឹងថាគាត់បានទទួលទិញផ្សិតនេះសម្រាប់យកទៅលក់បន្តទៅតាមភោជនីយដ្ឋាននិងបណ្តាខេត្តមួយចំនួនទៀតដោយក្នុងមួយថ្ងៃអាចទិញបាន១០-២០គីឡូក្រាម។ផ្សិតនេះគេចូលចិត្តទិញទៅបរិភោគ ពិសេសជនជាតិថៃចូលចិត្តទិញទៅបរិភោគខ្លាំងណាស់ ហើយតម្លៃប៉ុន្មានក៏គេហ៊ានទិញដែរ។
ស្ត្រីអ្នកទិញផ្សិតលក់រូបនេះបានបញ្ជាក់បន្ថែមថា ផ្សិតប៉ា ឬផ្សិតច្រម៉ាស់នេះគេអាចយកទៅធ្វើម្ហូបបានច្រើនមុខណាស់ដូចជា យកទៅឆា យកទៅធ្វើសម្លរប្រហើរ យកទៅធ្វើស៊ុប និងច្នៃធ្វើម្ហូបច្រើនប្រភេទទៀតតាមដែលគេចូលចិត្ត។
បើតាមលោក ឈឿម តាំង មេឃុំ ខ្នងភ្នំ ស្រុក ស្វាយលើ ខេត្តសៀមរាបបានឱ្យដឹងថាប្រជាពលរដ្ឋក្នុងសហគមន៍របស់លោកតែងរកអនុផលព្រៃឈើដូចជា ដកហូតផ្សិត រកទឹកឃ្មុំ និងចិញ្ចឹមសត្វដូចជាជ្រូកកណ្តុរ មាន់ទាសម្រាប់ផ្គត់ផ្គង់គ្រួសារ។តាមរយៈការអនុផលព្រៃឈើ និងការចិញ្ចឹមសត្វនេះបានជួយទ្រទ្រង់ជីវភាពគ្រួសាររបស់ពួកគាត់ កាន់តែប្រសើរឡើងនិងពួកគាត់លែងចូលព្រៃកាប់ឈើបរបាញ់សត្វដែលជាការបំផ្លាញធនធានធម្មជាតិដូចកាលពីមុនទៀតឡើយ។
សូមរំលឹកដែរថា គម្រោងនិរន្តរភាពតំបន់ទេសភាព និងទេសចរណ៍ធម្មជាតិកម្ពុជាបានគាំទ្រសហគមន៍តំបន់ការពារ
ធម្មជាតិចំនួនពីរគឺសហគមន៍ព្រៃធំពពេលនិងសហគមន៍ព្រៃធំអន្លង់ធំនៅលើឧទ្យានជាតិព្រះជ័យវរ្ម័ន-នរោត្តមភ្នំគូលែនដោយគម្រោងបានយកចិត្តទុកដាក់ពង្រឹងលើផ្នែកទេសចរណ៍ធម្មជាតិមានទាំងកិច្ចការងារបដិសណ្ឋារកិច្ចការនាំភ្ញៀវនិងការអភិរក្សជាដើម។លើសពីនេះគម្រោងក៏ជួយឲ្យមានកំណើនជីវភាពប្រជាសហគមន៍តាមរយ:បង្កើនការចិញ្វឹមសត្វជ្រូកកណ្តុរ ការចិញ្ចឹម មាន់និងឃ្មុំព្រៃផងដែរ៕ដោយ៖ម៉ាដេប៉ូ