អាមេរិក និងឥណ្ឌូនេស៊ីចុះ MOU លើកិច្ចសហប្រតិបត្តិការផ្លូវសមុទ្រ
សហរដ្ឋអាមេរិក និងឥណ្ឌូនេស៊ី កាលពីថ្ងៃអង្គារកន្លងទៅបានចុះអនុស្សរណៈយោគយល់ (MOU) លើកិច្ចសហប្រតិបត្តិការផ្លូវសមុទ្រ ដោយក្នុងនោះដែររួមមានការធ្វើសមយុទ្ធរួមរវាងកងទ័ពជើងទឹកប្រទេសទាំងពីរ និងការប្រយុទ្ធប្រឆាំងនឹងការនេសាទផ្លូវសមុទ្រខុសច្បាប់។
បន្ថែមពីនេះទៅទៀត ភាគីទាំងពីរក៏បានចុះ MOU ចំនួន ២បន្ថែមទៀតដោយក្នុងនោះរួមមាន ការបន្តកម្មវិធីទីភ្នាក់ងារសន្តិភាពអាមេរិក Peace Corps ដែលជាកម្មវិធីក្នុងការផ្ដល់ជំនួយអភិវឌ្ឍន៍ផ្នែកសង្គម និងសេដ្ឋកិច្ច ហើយ MOU មួយទៀតពាក់ព័ន្ធនឹងការពង្រីកកិច្ចសហប្រតិបត្តិការផ្នែកអប់រំ ដែលនឹងមានការផ្លាស់ប្ដូរទស្សនកិច្ចរវាងយុវជនក្មេងៗប្រទេសទាំងពីរ។
អនុស្សរណៈទាំងនេះត្រូវបានចុះហត្ថលេខាដោយរដ្ឋមន្ត្រីការបរទេសឥណ្ឌូនេស៊ី អ្នកស្រី រ៉េតណូ ម៉ារស៊ូឌី (Retno Marsudi) រដ្ឋមន្ត្រីអប់រំឥណ្ឌូនេស៊ីលោក Nadiem Makarim និងរដ្ឋមន្ត្រីការបរទេសអាមេរិកលោក អាន់តូនី ប្លីនកែន។
លោក ប្លីនកែន ប្រាប់អ្នកសារព័ត៌មានថា ការចុះ MOU ទាំងនេះនឹងជួយលើកកម្ពស់ឱ្យកិច្ចសហប្រតិបត្តិការរវាងប្រទេសទាំងពីរឱ្យទៅមុខមួយកម្រិតទៅទៀត។
ក្រៅពីនេះដែរ អ្នកស្រី ម៉ារស៊ូឌី ប្រាប់អ្នកសារពត៌មានថា ក្នុងគោលបំណងនៃការរឹតចំណងសន្តិសុខរវាងប្រទេសទាំងពីរ ឥណ្ឌូនេស៊ី និងអាមេរិកនឹងចាប់ផ្ដើមរៀបចំកិច្ចប្រជុំថ្នាក់ឧត្ដមមន្ត្រី ទម្រង់ ២+២ ដែលជាកិច្ចប្រជុំរវាងមន្ត្រីក្រសួងការបរទេស និងក្រសួងការពារជាតិ៕
ប្រភព៖ The Straits Times
