អេម៉ារ៉ាត់អារ៉ាប់រួមព្យួរបញ្ជាទិញអាវុធរាប់ពាន់លានដុល្លារ ជាសញ្ញាធុញទ្រាន់នឹងភាពតានតឹងរវាចិន និងអាមេរិក
អេម៉ារ៉ាត់អារ៉ាប់រួម (UAE) បានព្យួរកិច្ចព្រមព្រៀងរាប់ពាន់លានដុល្លារដើម្បីបញ្ជាទិញយន្តហោះចម្បាំង F-35 របស់អាមេរិក ដែលសញ្ញាមួយបង្ហាញថាក្រុងអាប៊ូដាប៊ីកំពុងធុញទ្រាន់នឹងការប៉ុនប៉ងរបស់ក្រុងវ៉ាស៊ីនតោនដើម្បីរារាំងការនាំចូលបច្ចេកវិទ្យារបស់ប្រទេសចិនចូលក្នុងប្រទេសអារ៉ាប់នេះ។
«UAE បានជូនដំណឹងដល់សហរដ្ឋអាមេរិកថា ខ្លួននឹងព្យួរការពិភាក្សាដើម្បីបញ្ជាទិញយន្តហោះ F-35» មន្ត្រីនៃUAEមួយរូប បានប្រាប់សារព័ត៌មានស៊ីអិនអិន បែបនេះ ហើយបន្តទៀតថា៖ «តម្រូវការបច្ចេកទេស ការរឹតបន្តឹងប្រតិបត្តិការអធិបតេយ្យភាព និងការវិភាគតម្លៃ/អត្ថប្រយោជន៍ បាននាំឱ្យមានការពិចារណាឡើងវិញនេះ»។
មន្ត្រីរូបនេះបានបន្ថែមទៀតថា៖ «សហរដ្ឋអាមេរិកគឺនៅតែជាអ្នកផ្គត់ផ្គង់ចម្បងរបស់ UAE សម្រាប់តម្រូវការការពារជាតិជាន់ខ្ពស់ ហើយការពិភាក្សាសម្រាប់ F-35 អាចបើកឡើងវិញនៅពេលអនាគត»។
ការជាប់គាំងនេះគឺបង្កឡើងដោយសារច្បាប់អាមេរិកបានដាក់តម្រូវការលើអ្នកនាំចូលអាវុធទំនើបៗពីអាមេរិកឱ្យជួយការពារ និងថែរក្សាបច្ចេកវិទ្យាសម្ងាត់ក្នុងអាវុធទាំងនេះ។ រដ្ឋាភិបាលអាមេរិកបានដាក់សម្ពាធម្ដងហើយម្ដងទៀតទៅលើ UAE ឱ្យដកបច្ចេកវិទ្យារបស់ក្រុមហ៊ុនចិន Huawei ចេញពីបណ្ដាញទូរគមនាគមន៍របស់ខ្លួន ដោយអះអាងថាបច្ចេកវិទ្យាក្រុមហ៊ុននេះអាចបង្កហានិភ័យសន្តិសុខដល់ប្រព័ន្ធអាវុធទាំងនេះ។
ប៉ុន្តែមន្ត្រី UAE មិនសូវជឿការអះអាងរបស់អាមេរិកអំពីបញ្ហាសន្តិសុខទាំងនេះ ហើយបានបង្ហាញការព្រួយបារម្ភអំពីការបង្ខំឱ្យពាក់ព័ន្ធក្នុង «សង្គ្រាមត្រជាក់ថ្មី» រវាងដៃគូពាណិជ្ជកម្មធំបំផុត និងសម្ព័ន្ធមិត្តសំខាន់បំផុត៕
ប្រភព៖ CNN
