អាល្លឺម៉ង់៖ អាជ្ញាធរវាយឆ្មក់លើក្រុមជ្រុលនិយមកូវីដ ជុំវិញការគំរាមសម្លាប់អភិបាលរដ្ឋ Saxony
ប៉ូលីសនៅក្នុងរដ្ឋ Saxony ភាគខាងកើតនៃប្រទេសអាល្លឺម៉ង់ បើកការវាយឆ្មក់ជាបន្តបន្ទាប់លើសកម្មជនប្រឆាំងវ៉ាក់សាំងស្ដាំជ្រុលនិយមក្រោយពីមានការគំរាមសម្លាប់អភិបាលរដ្ឋនេះគឺលោក Michael Kretschmer ចំពោះការគាំទ្រវិធានការទប់ស្កាត់កូវីដ-១៩របស់លោក។
Saxony គឺជារដ្ឋដែលមានអត្រាចាក់វ៉ាក់សាំងកូវីដទាបបំផុតនៅក្នុងប្រទេសអាល្លឺម៉ង់។ ប៉ូលីសក្នុងរដ្ឋ Saxony និយាយថា កងកម្លាំងសន្តិសុខរួមទាំងអង្គភាពពិសេសប្រឆាំងក្រុមជ្រុលនិយម Soko Rex កំពុងវាយឆ្មក់ទីតាំងជាច្រើន ដើម្បីឆ្លើយតបទៅនឹងការគំរាមកំហែងដែលធ្វើឡើងប្រឆាំងនឹងអភិបាលរដ្ឋ។
អ្នកនាំពាក្យការិយាល័យប៉ូលិសព្រហ្មទណ្ឌរដ្ឋ (LKA) រដ្ឋ Saxony និយាយថា លំនៅដ្ឋានចំនួនប្រាំ និងកន្លែងធ្វើការមួយត្រូវបានឆែកឆេរ ហើយប៉ូលិសបានរឹបអូសអាវុធ បំណែកនៃអាវុធមួយចំនួន។
សារគំរាមលោក Kretschmer ត្រូវបានចែកចាយក្នុងកម្មវិធីតេឡេក្រាម។ លោក Kretschmer និយាយថាគ្រប់មធ្យោបាយផ្លូវច្បាប់គួរតែត្រូវបានប្រើប្រាស់ប្រឆាំងនឹងការគំរាមកំហែងបែបនេះ។ លោកបន្តថា៖ «អ្នកនៅការិយាល័យសាធារណៈមិនគួរខ្លាចក្នុងការនិយាយពីគំនិតរបស់ខ្លួន និងធ្វើការងាររបស់ខ្លួនឡើយ»។
លោក Kretschmer សមាជិកនៃគណបក្សប្រជាធិបតេយ្យគ្រិស្តសាសនាកណ្តាល ដែលស្ថិតក្នុងជួររដ្ឋាភិបាលជាតិរហូតដល់សប្តាហ៍មុន ដើមឡើយប្រឆាំងនឹងវិធានការរឹតបន្តឹងកូវីដ។ ប៉ុន្តែចាប់តាំងពី Saxony ក្លាយជារដ្ឋមួយក្នុងចំនោមរដ្ឋអាល្លឺម៉ង់ដែលរងគ្រោះខ្លាំងបំផុតដោយវីរុសនេះ លោកក៏ផ្លាស់ប្តូរចិត្តវិញ។
កាលពីសប្តាហ៍មុន រដ្ឋាភិបាលថ្មីរបស់អាឡឺម៉ង់ដាក់សេចក្តីព្រាងច្បាប់មួយតម្រូវឱ្យបុគ្គលិកសុខាភិបាល និងទាហានទាំងអស់ទទួលវ៉ាក់សាំងនៅនិទាឃរដូវក្រោយ ហើយលោកអធិការបតី Scholz គាំទ្រឱ្យមនុស្សពេញវ័យទាំងអស់ទទួលវ៉ាក់សាំងនៅដើមឆ្នាំ ២០២២។
ការណ៍នេះ បណ្ដាលឱ្យមានការតវ៉ាជាច្រើនក្នុងប្រទេសអាល្លឺម៉ង់ប្រឆាំងនឹងវិធានការណ៍រឹតបន្តឹងរបស់អាជ្ញាធរ។ កាលពីយប់ថ្ងៃចន្ទ មានពលរដ្ឋប្រហែល ៣៥០០ នាក់ បានធ្វើបាតុកម្មនៅទីក្រុង Magdeburg ភាគខាងកើត ដោយស្រែកថា «សន្តិភាព សេរីភាព គ្មានរបបផ្តាច់ការ»។ របាយការណ៍និយាយថា យ៉ាងហោចណាស់សារគំរាមកំហែងរាប់សិបត្រូវបានផ្ញើទៅកាន់អ្នកនយោបាយ ប្រព័ន្ធផ្សព្វផ្សាយ និងស្ថាប័នសាធារណៈផងដែរ។
ប្រភព៖ BBC
