ក្រសួងការបរទេសរុស្ស៊ី៖ ជម្រើសទាំងអស់នៅលើតុ ប្រសិនបើអង្គការណាតូបដិសេធមិនពិភាក្សាលើសំណើសន្តិសុខ
ម៉ូស្គូ៖ កាលពីដើមខែនេះ រុស្ស៊ីបានដាក់ចេញនូវសំណើសន្តិសុខមួយទៅកាន់លោកខាងលិច ដើម្បីកាត់បន្ថយស្ថានការណ៍ភាពតានតឹងនៅជិតព្រំដែនអ៊ុយក្រែន។ ក្នុងចំណោមសំណើទាំងនេះ មានការធានាពីអង្គការណាតូមិនឱ្យដាក់ពង្រាយអាវុធនៅអឺរ៉ុបខាងកើត និងជាពិសេសនៅអ៊ុយក្រែន។
ក្រសួងការបរទេសរុស្ស៊ីនៅថ្ងៃអង្គារនេះបញ្ជាក់ថា ជម្រើសទាំងអស់ រួមទាំងការដាក់ពង្រាយអាវុធនុយក្លេអ៊ែរនៅក្នុងប្រទេសបេឡារុស នឹងត្រូវបានពិចារណានៅក្នុងព្រឹត្តិការណ៍នៃការបដិសេធរបស់អង្គការណាតូ ក្នុងការពិភាក្សាលើសំណើសន្តិសុខ។ ក្រសួងការបរទេសរុស្ស៊ីក៏បានបញ្ជាក់ដែរថា ការបញ្ជូនកម្លាំងយោធាអាមេរិកទៅកាន់អ៊ុយក្រែន នឹងធ្វើឱ្យស្ថានការណ៍កាន់តែតានតឹងឡើង ដោយកត់សម្គាល់ថា ទីក្រុងម៉ូស្គូសង្ឃឹមថា ទីក្រុងវ៉ាស៊ីនតោនយល់ពីផលវិបាកដ៏គ្រោះថ្នាក់នៃការធ្វើដូច្នេះ។ អនុរដ្ឋមន្ត្រីការបរទេសរុស្ស៊ីលោក អង់ដ្រេ រូដេនកូ បានប្រាប់អ្នកយកព័ត៌មានថា មកទល់ពេលនេះ សេចក្តីព្រាងកិច្ចព្រមព្រៀងរបស់យើងត្រូវបានបញ្ជូនទៅតែភាគីទាំងពីរគឺសហរដ្ឋអាមេរិក និងអង្គការណាតូ។
យើងមិនបានបញ្ជូនអ្វីទៅអ៊ុយក្រែនទេ ប៉ុន្តែជាការពិតណាស់ អ៊ុយក្រែនក៏ដឹងអំពីវាដូចអ្នកដទៃទៀតដែរ។ យើងមើលមិនឃើញពីតម្រូវការសម្រាប់ការចូលរួមរបស់ពួកគេទេ។ លោក រូដេនកូ បន្ថែមថា ទីក្រុងម៉ូស្គូកំពុងរង់ចាំការឆ្លើយតបជាផ្លូវការពីសហរដ្ឋអាមេរិក និងអង្គការណាតូលើសំណើសន្តិសុខ ដែលរួមមានការទាមទារឱ្យណាតូមិនដាក់ពង្រាយអាវុធវាយលុកនៅក្នុងប្រទេសជិតខាងរុស្ស៊ី៕ ប្រភព៖ Sputniknews
