របាយការណ៍៖ សហរដ្ឋអាមេរិកកំពុងពិចារណាបញ្ឈប់ការនាំចូលស្មាតហ្វូន យន្តហោះ និងគ្រឿងបន្លាស់រថយន្តរបស់រុស្ស៊ី ជុំវិញបញ្ហាអ៊ុយក្រែន
វ៉ាស៊ីនតោន៖ កាសែតរ៉យទ័របានរាយការណ៍ដោយដកស្រង់សម្តីមន្ត្រីរដ្ឋបាលលោក ចូ បៃដិន ថា មន្ត្រីអាមេរិកនឹងជួបគ្នានៅថ្ងៃអង្គារសប្តាហ៍ក្រោយនេះ ដើម្បីពិភាក្សាអំពីវិធានការប្រឆាំងនឹងរុស្ស៊ី ប្រសិនបើទីក្រុងម៉ូស្គូឈ្លានពានអ៊ុយក្រែន ក្នុងនោះមានទាំងការហាមឃាត់ការនាំចូលស្មាតហ្វូន យន្តហោះ គ្រឿងបន្លាស់រថយន្ត និងសម្ភារៈសំខាន់ៗដទៃទៀតនៃវិស័យផ្សេងៗគ្នា។
របាយការណ៍បានបញ្ជាក់ថា មន្ត្រីអាមេរិកក៏នឹងធ្វើការពិភាក្សាជាមួយដៃគូសំខាន់ៗនៅអឺរ៉ុប និងអាស៊ី ដែលអាចរងផលប៉ះពាល់ដោយសារតែវិធានការទាំងនេះផងដែរ។ បើតាមរបាយការណ៍ដដែលនេះ សហរដ្ឋអាមេរិកនឹងប្រើប្រាស់វិធានការត្រួតពិនិត្យការនាំចេញជាវិសាមញ្ញ ដើម្បីការពាររុស្ស៊ីពីការនាំចូលបច្ចេកវិទ្យាឧស្សាហកម្ម និងអ្នកប្រើប្រាស់ ដែលអាចជះឥទ្ធិពលយ៉ាងខ្លាំងដល់អ្នកប្រើប្រាស់រុស្ស៊ី ប្រតិបត្តិការឧស្សាហកម្ម និងការធ្វើការងារជាដើម។ របាយការណ៍ដដែលបន្ថែមថា រដ្ឋបាលលោក បៃដិន នឹងប្រើប្រាស់ជាពិសេសនូវយុទ្ធសាស្រ្តដូចគ្នាដែលរដ្ឋបាលលោក ដូណាល់ ត្រាំ បានប្រើ ដើម្បីហាមប្រាមក្រុមហ៊ុនទូរគមនាគមន៍ចិន ហូវៃ ពីការនាំចូលឧបករណ៍បច្ចេកវិទ្យាកម្រិតខ្ពស់មួយចំនួន។ គួរបញ្ជាក់ថា ភាពតានតឹងជុំវិញអ៊ុយក្រែនកាន់តែធ្ងន់ធ្ងរឡើងក្នុងរយៈពេលប៉ុន្មានសប្តាហ៍កន្លងទៅនេះ ដោយសារការចោទប្រកាន់ថា មានការដាក់ពង្រាយទាហានរុស្ស៊ីរាប់ម៉ឺននាក់នៅជិតព្រំដែនអ៊ុយក្រែន និងការអះអាងពីការត្រៀមខ្លួនសម្រាប់ការឈ្លានពាន។
ទីក្រុងម៉ូស្គូបានបដិសេធម្តងហើយម្តងទៀតនូវការចោទប្រកាន់ទាំងនោះ ដោយចង្អុលទៅលើសកម្មភាពយោធារបស់អង្គការណាតូនៅជិតព្រំដែនរុស្ស៊ី ដែលទីក្រុងម៉ូស្គូចាត់ទុកថា ជាការគំរាមកំហែងដល់សន្តិសុខជាតិរបស់រុស្ស៊ី។ រុស្ស៊ីក៏បាននិយាយដែរថា ទីក្រុងម៉ូស្គូមានសិទ្ធិផ្លាស់ទីកងកម្លាំងក្នុងទឹកដីប្រទេសរបស់ខ្លួន៕ ប្រភព៖ Sputniknews