មានករណីគ្រោះថ្នាក់ចរាចរណ៍រវាងរថយន្ដ១គ្រឿងម៉ាកព្រូសបុកជាមួយរថយន្តមួយគ្រឿងទៀតម៉ាកហ៊ីយ៉ាន់ដាយបណ្តាលឱ្យរងការខូចខាតយ៉ាងដំណំទាំងសងខាង រីឯមនុស្សរងរបួសចំនួន៦នាក់ ។
ហេតុការណ៍ខាងលើនេះបានកើតឡើងកាលពីវេលាម៉ោង៨និង២០នាទីព្រឹកថ្ងៃទី២៤ ធ្នូ ឆ្នាំ២០២១ លើផ្លូវជាតិលេខ៤ ចន្លោះគីឡូម៉ែត្រលេខ ១៦៤-១៦៥ ស្ថិតក្នុងភូមិតានៃ ឃុំតានៃ ស្រុកព្រៃនប់ ខេត្តព្រះសីហនុ ។
ភាគីខាងរថយន្ត១គ្រឿងម៉ាកព្រូស ពណ៌ស ពាក់ផ្លាកលេខ ភ្នំពេញ 2BL-8317 អ្នកបើកបរមិនស្គាល់អត្តសញ្ញាណ និងភាគីខាងរថយន្ដ១គ្រឿងទៀតម៉ាកហ៊ីយ៉ាន់ដាយ ពណ៌ស ពាក់ផ្លាកលេខ កំពង់ស្ពឺ 3A-8787 អ្នកបើកបរមិនស្គាល់អត្តសញ្ញាណ។
តាមប្រភពព័ត៌មានបានឱ្យដឹងថា មុនពេលកើតហេតុ រថយន្ដ១គ្រឿងម៉ាកព្រូស បានបើកបរក្នុងទិសដៅពីរាជធានីភ្នំពេញ ឆ្ពោះទៅ ខេត្តព្រះសីហនុ លុះមកដល់ចំណុចកើតហេតុខាងលើ ក៏បានវ៉ាជែងរថយន្ដ១គ្រឿង ខណៈពេលនោះក៏មានរថយន្ត១គ្រឿងទៀតម៉ាកហ៊ីយ៉ាន់ដាយ ដែលមានទិសដៅផ្ទុយគ្នាមកដល់ ក៏ជ្រុកបុ.កគ្នាយ៉ាងពេញទំហឹង បណ្តាលឱ្យមនុស្សរងរបួសចំនួន៦នាក់ (ស្រី២នាក់) ។ ចំណែករថយន្តបានរងការខូចខាតយ៉ាងដំណំទាំង២គ្រឿងតែម្តង ។
ក្រោយពេលកើតហេតុ ជនរងគ្រោះត្រូវបានបញ្ជូនទៅសម្រាកព្យាបាលនៅគ្លីនិកឯកជន ក្នុងឃុំវាលរេញ រីឯរថយន្តទាំង២គ្រឿងត្រូវបានយកមករក្សាទុកបណ្ដោះអាសន្ននៅអធិការដ្ឋាននគរបាលស្រុកព្រៃនប់ ដើម្បីរង់ចាំធ្វើការដោះស្រាយនៅពេលក្រោយទៀត ៕