កងកម្លាំងស៊ូដង់បាញ់ឧស្ម័នបង្ហូរទឹកភ្នែក ដើម្បីបំបែកក្រុមបាតុករប្រឆាំងរដ្ឋប្រហារ
កងកម្លាំងសន្តិសុខស៊ូដង់បាញ់ឧស្ម័នបង្ហូរទឹកភ្នែកដើម្បីបំបែកក្រុមបាតុករនៅក្នុងរដ្ឋធានីខាទុំកាលពីថ្ងៃសៅរ៍ ខណៈដែលបាតុករស៊ូដង់រាប់ម៉ឺននាក់ដង្ហែរក្បួនទូទាំងប្រទេសដើម្បីតវ៉ាប្រឆាំងនឹងក្រុមយោធាដែលធ្វើរដ្ឋប្រហារកាលពីខែតុលាកន្លងទៅនេះ។
ក្រុមបាតុករចង់ឱ្យយោធាដកខ្លួន មិនឱ្យជាប់ពាក់ព័ន្ធនឹងតួនាទីអ្វីនៅក្នុងរដ្ឋាភិបាល បើទោះបីជាលោកនាយករដ្ឋមន្រ្តី Abdallah Hamdok ដែលត្រូវបានដកដំណែងក្នុងថ្ងៃធ្វើរដ្ឋប្រហារ ត្រឡប់មកកាន់ដំណែងដូចដើមកាលពីខែវិច្ឆិកាថ្មីៗនេះវិញ ក្រោមកិច្ចព្រមព្រៀងមួយហើយក្ដី។ ក្រុមអ្នកតវ៉ាទាមទារឱ្យទាហានត្រឡប់ទៅបន្ទាយរបស់ខ្លួនវិញ និងអំពាវនាវឱ្យមានការផ្លាស់ប្តូរទៅរកការគ្រប់គ្រងបែបស៊ីវិល។
ទីភ្នាក់ងារសារព័ត៌មានរដ្ឋ SUNA រាយការណ៍ថា ក្រុមបាតុករបានដើរតាមដងផ្លូវ ដោយសូម្បីតែអាជ្ញាធររឹតបន្តឹងសន្តិសុខនៅទូទាំងរាជធានី ដោយដាក់ពង្រាយកងទ័ព និងបិទស្ពានទាំងអស់នៅលើទន្លេនីលដែលភ្ជាប់ពីរដ្ឋធានីខាទុំ និងក្រុង Omdurman ដែលនៅត្រើយម្ខាងក្ដី។
គណៈកម្មាធិការវេជ្ជបណ្ឌិត ដែលជាផ្នែកមួយនៃចលនាគាំទ្រលទ្ធិប្រជាធិបតេយ្យរាយការណ៍ថា កងកម្លាំងសន្តិសុខថែមទាំងបាញ់ឧស្ម័នបង្ហូរទឹកភ្នែកចូលទៅក្នុងមន្ទីរពេទ្យមួយចំនួន ដោយវាយប្រហារក្រុមគ្រូពេទ្យ ក៏ដូចជាអ្នករបួសដទៃទៀត។ តាមរបាយការណ៍របស់គណៈកម្មការដដែល មនុស្សយ៉ាងហោចណាស់ ១៧៨ នាក់បានរងរបួសក្នុងហេតុការណ៍កាលពីថ្ងៃសៅរ៍។
អាជ្ញាធរបានព្រមានក្រុមអ្នកតវ៉ាប្រឆាំងនឹងការចូលទៅជិតតំបន់អធិបតេយ្យភាព និងយុទ្ធសាស្ត្រនៅកណ្តាលរដ្ឋធានីខាទុំ ដែលមានអគាររដ្ឋបាលសំខាន់ៗរបស់ប្រទេស។ SUNA ស្រង់សម្ដីរបស់គណៈកម្មាធិការសម្របសម្រួលសន្តិសុខថា ការរំលោភលើអធិបតេយ្យភាព និងទីតាំងយុទ្ធសាស្ត្រ រួមទាំងការឈ្លាតចេញពី[បាតុកម្ម]អហិង្សា គឺជាការបំពានច្បាប់»។
កាលពីចុងសប្តាហ៍មុន កម្លាំងសន្តិសុខបានបំបែកក្រុមបាតុករយ៉ាងហិង្សានៅពេលដែលពួកគេប៉ុនប៉ងធ្វើបាតុកម្មនៅជិតវិមានប្រធានាធិបតី ដែលបណ្ដាលឱ្យយ៉ាងហោចណាស់បាតុករបីនាក់ស្លាប់ និងជាង ៣០០ នាក់រងរបួស។
ប្រភព៖ Aljazeera