អង្គការសង្គ្រោះកុមារបាត់បុគ្គលិក ២នាក់ ក្នុងព្រឹត្តិការណ៍ប៉ះទង្គិចគ្នានៅរដ្ឋភាគខាងកើតមីយ៉ាន់ម៉ា
អង្គការសង្គ្រោះកុមារ (Save the Children) បញ្ជាក់ថាមានបុគ្គលិកបាត់ខ្លួនចំនួន ២នាក់ អំឡុងពេលព្រឹត្តិការណ៍ប៉ះទង្គិចគ្នានៅរដ្ឋកាយ៉ា ដែលស្ថិតនៅភាគខាងកើតប្រទេសមីយ៉ាន់ម៉ា កាលពីយប់ថ្ងៃសុក្រ សប្ដាហ៍មុន។
ក្នុងព្រឹត្តិការណ៍នេះដែរ ភាគីយោធាបានសម្លាប់មនុស្សប្រមាណ ៣០នាក់ ដោយសាកសពទាំងនេះត្រូវបានរកឃើញក្នុងសភាពផេះផង់ នៅព្រឹកបន្ទាប់ថ្ងៃសៅរ៍។ សាកសពទាំងនេះភាគច្រើនជាមនុស្សចាស់ ស្ត្រី និងកុមារ ហើយក្រុមសិទ្ធិមនុស្សការ៉ែននី ក៏ដូចជាក្រុមប្រដាប់អាវុធជនជាតិការ៉ែននីបានអះអាងថា សាកសពទាំងនេះជាជនស៊ីវិល ដែលភៀសខ្លួនពីសង្គ្រាមប៉ុណ្ណោះ។
ជាមួយគ្នានេះដែរ បុគ្គលិកអង្គការសង្គ្រោះកុមារចំនួន ២នាក់ ដែលត្រលប់ទៅផ្ទះវិញ ក្រោយពេលធ្វើការមនុស្សធម៌នៅតំបន់ក្បែរខាង ក៏បានស្ថិតក្នុងហេតុការណ៍នៃការប៉ះទង្គិចគ្នាផងដែរ។ នេះបើតាមសេចក្ដីថ្លែងការណ៍របស់អង្គការអន្តរជាតិក្រៅរដ្ឋាភិបាលមួយនេះ។
ប្រភពខាងលើបានឱ្យដឹងថា រថយន្តឯកជនរបស់ពួកគេទាំង ២ ត្រូវបានរងការវាយប្រហារ ហើយដុតកម្ទេច។
សារព័ត៌មានយោធាមីយ៉ាន់ម៉ាក៏បានចុះផ្សាយពាក់ព័ន្ធនឹងបញ្ហានេះផងដែរ ដោយអះអាងថា រថយន្ត៧គ្រឿង ដែលមានដឹកក្រុមប្រដាប់អាវុធជនជាតិការ៉ែននី និងក្រុមប្រដាប់អាវុធក្រុមប្រឆាំងបានបដិសេធមិនឈប់តាមបញ្ជារបស់ខ្លួន។ ជាការឆ្លើយតបខ្លួនបានធ្វើការបាញ់រះ និងដុតកម្ទេចរថយន្តតាមក្រោយ តែសារព័ត៌មានយោធាមិនបានផ្ដល់ព័ត៌មានលម្អិតពាក់ព័ន្ធនឹងការស្លាប់នោះទេ៕
ប្រភព៖ Nikkie Asia