ក្រុងមូស្គូពិចារណាលើសំណើរបស់អង្គការណាតូ ដើម្បីចាប់ផ្ដើមការចរចានៅថ្ងៃ ១២ មករា
រុស្សីបានទទួល និងកំពុងពិចារណាសំណើរបស់អង្គការណាតូដើម្បីចាប់ផ្ដើមការចរចាអំពីការព្រួយបារម្ភផ្នែកសន្តិសុខ ដែលនឹងអាចប្រព្រឹត្តទៅនៅក្រុងមូស្គូនៅថ្ងៃទី ១២ ខែមករាខាងមុខនេះ នេះបើតាមការរាយការណ៍កាលពីថ្ងៃអាទិត្យ ទី២៦ ធ្នូ របស់ទីភ្នាក់ងារសារព័ត៌មានរដ្ឋរុស្សី TASS ផ្អែកលើប្រភពក្នុងក្រសួងការបរទេសរុស្សី។
សហរដ្ឋអាមេរិក និងអង្គការណាតូបានចោទប្រកាន់ថាការដាក់ពង្រាយទាហានរុស្សីរាប់ម៉ឺននាក់នៅតំបន់ព្រំដែនជាមួយអ៊ុយក្រែន គឺជាការត្រៀមវាយលុកចូលប្រទេសអ៊ុយក្រែននៅដើមឆ្នាំក្រោយ។ រុស្សីបានច្រានចោលការចោទប្រកាន់នេះ ហើយបាននិយាយថាការកសាងទំនាក់ទំនងយោធារវាងអ៊ុយក្រែន និងណាតូគឺជាការគំរាមកំហែងដល់សន្តិសុខរបស់ខ្លួន។
កាលពីសប្ដាហ៍មុនរុស្សីបានបញ្ជូនបញ្ជីទាមទារការធានាសន្តិសុខដែលខ្លួនចង់ចរចា ដែលរួមមានការសន្យាពីណាតូថានឹងមិនពង្រីកសមាជិកភាពបន្ថែមទៀតមករដ្ឋអតីតសហភាពសូវៀត ជាពិសេសប្រទេសអ៊ុយក្រែន។
កាលពីថ្ងៃព្រហស្បតិ៍ ប្រធានាធិបតីរុស្សីលោកវ្ល៉ាឌីមៀរ ពូទីនបាននិយាយថាប្រទេសរបស់លោកចង់ជៀសវាងជម្លោះ ប៉ុន្តែត្រូវការការឆ្លើយតបជាបន្ទាន់ពីសហរដ្ឋអាមេរិក និងសម្ព័ន្ធមិត្តពួកគេចំពោះការទាមទាររបស់ខ្លួនសម្រាប់ការធានាសន្តិសុខ។ ទីក្រុងមូស្គូបាននិយាយថា ខ្លួនរំពឹងថានឹងមានកិច្ចពិភាក្សាជាមួយមន្ត្រីអាមេរិកលើប្រធានបទនេះ នៅខែមករាក្នុងទីក្រុងហ្សឺណែវ។
រដ្ឋាភិបាលអាមេរិកបាននិយាយថាការទាមទារមួយចំនួនរបស់រុស្សីគឺពិតជាមិនអាចទទួលយកបាន ប៉ុន្តែក្រុងវ៉ាស៊ីនតោននឹងឆ្លើយតបជាមួយនឹងគំនិតជាក់ស្ដែងណាមួយសម្រាប់របៀបនៃការចរចា៕
ប្រភព៖ Reuters
