សម្តេចប៉ាបនិយាយថា ការធ្លាក់ចុះអត្រាកំណើតរបស់អ៊ីតាលីគឺជាសោកនាដកម្មមួយ
សម្តេចប៉ាបហ្រ្វង់ស័រ សម្តែងការសោកស្ដាយចំពោះការធ្លាក់ចុះនៃអត្រាកំណើតរបស់ប្រទេសអ៊ីតាលី ដោយព្រមានកាលពីថ្ងៃអាទិត្យថា ការធ្លាក់ចុះនេះតំណាងឱ្យការគំរាមកំហែងដល់អនាគតរបស់ប្រទេស។
ការិយាល័យស្ថិតិជាតិអ៊ីតាលី (ISTAT) និយាយនៅខែនេះថា ចំនួនកំណើតនៅអ៊ីតាលីកាលពីឆ្នាំមុនឈានដល់កម្រិតទាបបំផុតរបស់ខ្លួនចាប់តាំងពីការបង្រួបបង្រួមជាតិក្នុងឆ្នាំ ១៨៦១ ដោយតួលេខនេះបានធ្លាក់ចុះក្នុងរយៈពេល ១២ ឆ្នាំជាប់ៗគ្នា។
សម្តេចប៉ាបនិយាយនៅក្នុងសុន្ទរកថាប្រចាំសប្តាហ៍របស់លោកនៅមុខវិហារ St Peter’s Basilica ថា៖ «រដូវរងាប្រជាសាស្រ្តគឺជាការព្រួយបារម្ភពិតប្រាកដ នៅក្នុងប្រទេសអ៊ីតាលី»។ លោកបន្តថា៖ «វាហាក់បីដូចជាមនុស្សជាច្រើនបាត់បង់ការចង់បានកូន។ គូស្នេហ៍ជាច្រើនចូលចិត្តនៅមិនទាន់មានកូន ឬចង់មានកូនតែមួយ។ វាជាសោកនាដកម្មមួយ ដែលកើតឡើងប្រឆាំងនឹងគ្រួសារ ប្រទេស និងអនាគតរបស់យើង»។
ការិយាល័យស្ថិតិ ISTAT រៀបរាប់ថា អ៊ីតាលីមានកំណើតថ្មីចំនួន ៤០៤ ៨៩២ ក្នុងឆ្នាំ២០២០ ហើយវាធ្លាក់ចុះ ១៥ ១៩២ ប្រៀបធៀបនឹងឆ្នាំ ២០១៩ ប៉ុន្តែមានអ្នកស្លាប់រហូតដល់ ៧៤៦ ១៤៦ នាក់ ខណៈប្រទេសនេះមានប្រជាជនជាង ៥៩,៥ លាននាក់។ ការិយាល័យដដែលនិយាយថា ជំងឺរាតត្បាតកូវីដ១៩ ក៏ជាកត្តានៃការថយចុះ។
ប្រភព៖ CNA
