ឥណ្ឌាកាត់ផ្តាច់ការផ្តល់មូលនិធិពីបរទេសនៃអង្គការសប្បុរសធម៌របស់អ្នកម្តាយថេរ៉េសា
រដ្ឋាភិបាលឥណ្ឌាកាត់ផ្ដាច់ការផ្ដល់មូលនិធិនៃអង្គការសប្បុរសធម៌ដែលបង្កើតឡើងដោយអ្នកម្តាយថេរ៉េសា (Mother Teresa) ពីការទទួលយកការបរិច្ចាគពីបរទេស សម្រាប់ការងារមនុស្សធម៌របស់ខ្លួន។
គេមិនទាន់ដឹងច្បាស់ថាហេតុអ្វីបានជារដ្ឋាភិបាលបដិសេធកាលពីថ្ងៃច័ន្ទក្នុងការបន្តអាជ្ញាប័ណ្ណរបស់អង្គការ Missionaries of Charity ក្រោមច្បាប់ស្តីពីការរួមចំណែកបរទេសរបស់ប្រទេសនេះ។ ក្រុមនេះអាចប្តឹងឧទ្ធរណ៍ ប៉ុន្តែសម្រាប់ពេលនេះ ប្រភពថវិកាសំខាន់មួយត្រូវបានកាត់ផ្តាច់។
រដ្ឋាភិបាលនិយាយថា ខ្លួនកត់សម្គាល់នូវលំហូរចូលនៃធាតុមិនល្អមួយចំនួន ខណៈពេលដែលពិនិត្យមើលពាក្យស្នើសុំរបស់អង្គការសប្បុរសធម៌សម្រាប់ការបន្តអាជ្ញាប័ណ្ណ ប៉ុន្តែមិនបញ្ជាក់លម្អិតនោះទេ។
មូលនិធិអ្នកម្ដាយថេរ៉េសារ ទាក់ទាញការបរិច្ចាគពីជុំវិញពិភពលោក ហើយធ្វើការរៃអង្គាសថវិកាជាសាកលដើម្បីចំណាយលើមន្ទីរពេទ្យបង្អែក កន្លែងមនុស្សឃ្លង់ និងមណ្ឌលកុមារកំព្រាដែលដំណើរការនៅទូទាំងប្រទេសឥណ្ឌា។
ការកាត់ផ្ដាច់មូលនិធីថ្មីនេះ ធ្វើឡើងចំរដូវកាលណូអែល ខណៈដែលព្រះវិហារជាច្រើនត្រូវបានបំផ្លាយ និងយាយាដោយពួកហិណ្ឌូស្តាំនិយមរាប់រយនាក់នៅទូទាំងប្រទេស។ កំណើននៃការវាយប្រហារលើគ្រិស្តបរិស័ទដែលមានចំនួនប្រហែល ២ ភាគរយនៃចំនួនប្រជាជនឥណ្ឌា គឺជាផ្នែកមួយនៃការផ្លាស់ប្តូរដ៏ធំដែលក្រុមកាន់សាសនាភាគតិចមានអារម្មណ៍ថាមិនសូវមានសុវត្ថិភាព។
ក្រុមហិណ្ឌូស្តាំនិយមក៏ប្រឈមមុខនឹងអ្នកកាន់សាសនាអ៊ិស្លាមក្នុងអំឡុងពេលអធិស្ឋានថ្ងៃសុក្រនៅរដ្ឋ Haryana ភាគខាងជើងក្នុងប៉ុន្មានខែថ្មីៗនេះ។ ក្នុងសន្និសិទមួយកាលពីសប្តាហ៍មុន ព្រះសង្ឃហិណ្ឌូស្តាំនិយមរាប់រយអង្គ អំពាវនាវជាចំហឱ្យសម្លាប់អ្នកកាន់សាសនាឥស្លាម ដើម្បីប្រែក្លាយប្រទេសឥណ្ឌាទៅជាប្រទេសហិណ្ឌូ។
ក្រោមរដ្ឋាភិបាលរបស់លោក ណារិនដ្រា ម៉ូឌី ឥណ្ឌាបានរឹតបន្តឹងច្បាប់ស្តីពីការផ្តល់មូលនិធិបរទេសរបស់អង្គការក្រៅរដ្ឋាភិបាល។ ប្រទេសនេះដាក់កំហិតលើអង្គការមិនរកប្រាក់ចំណេញជាច្រើនរបស់គ្រិស្តសាសនិក និងមូស្លីម ហើយដាក់អ្នកផ្សេងទៀតនៅក្នុងបញ្ជីតាមដានសម្រាប់ការបំពានច្បាប់របស់ឥណ្ឌា ជាពិសេសច្បាប់ទាក់ទងនឹងការបញ្ជុះបញ្ចូលឱ្យជឿសាសនា។
ប្រភព៖ New York Times
