កម្ទេចខ្ទមអនាធិបតេយ្យរំលោភដីរដ្ឋជិត១០០ ក្រោយពីមិនអនុវត្តតាមកិច្ចសន្យា
យ៉ាងហោចណាស់ ខ្ទមអនាធិបតេយ្យហៅខ្ទមហោះខ្ទមហើរជាច្រើន ដែលសង់រំលោភលើដីរបស់រដ្ឋត្រូវបានអាជ្ញាធរប្រើធម៌ក្តៅវាយកម្ទេចគ្មានសល់ បន្ទាប់ពីមានមនុស្សមួយក្រុមដែលមានការចាត់តាំងត្រឹមត្រូវបាននាំគ្នារំលោភយកដីដើម្បីលក់បម្រើផលប្រយោជន៍របស់ពួកគេ។ ក្នុងប្រតិបត្តិការនេះដែរ ពុំមាននរណាម្នាក់ ត្រូវបានអាជ្ញាធរនិងសមត្ថកិច្ចឃាត់ខ្លួននោះទេ។
ប្រតិបត្តិការនេះ ធ្វើឡើងនៅថ្ងៃទី៣០ ខែធ្នូ នេះ នៅចំណុចដីក្រុមហ៊ុន HLH ស្ថិតនៅក្នុងស្រុកឱរ៉ាល់ខេត្តកំពង់ស្ពឺ។ ប្រភពបានឱ្យដឹងថា ក្រោយពីទទួលបានសេចក្តីរាយការណ៍ថា មានមនុស្សមួយក្រុមបាននាំគ្នាទៅកាប់ឆ្ការរានយកដីព្រៃរបស់រដ្ឋនៅចំណុចខាងលើ រដ្ឋបាលស្រុកតាមរយៈមន្ទីរកសិកម្មនិងបរិស្ថានបានចុះទៅធ្វើការណែនាំដល់ក្រុមមនុស្សចំនួន៣លើករួចមកហើយមុនពេលប្រតិបត្តិការចុះបង្ក្រាបនេះ ។
ក្រោយធ្វើកិច្ចសន្យាដែលដំបូងឡើយមានតែ៣០ខ្ទមប៉ុណ្ណោះ ស្រាប់តែក្រោយមកកើនឡើងដល់៨០ខ្ទម ទើបរដ្ឋបាលខេត្តដែលដឹកនាំដោយលោកសរ សុពុត្រា អភិបាលរងខេត្ត ចុះធ្វើការវាយកំទេចខ្ទមអានាធិបតេយ្យទាំងនោះតែម្ដង ។ ក្នុងប្រតិបត្តិការណ៍នេះដែរ តាមការបញ្ជាក់របស់មន្ត្រីនគរបាល តែស្ថិតនៅក្នុងរង្វង់ប្រតិបត្តិការបានប្រាប់ថា សមត្ថកិច្ចពុំមានឃាត់ខ្លួនជនណាម្នាក់ឡើយ តែបញ្ហាប្រឈមគឺមុនពេលដែលប្រតិបត្តិការក្រុមជនអនាធិបតេយ្យនោះបានត្រៀមដបសាំង និងដំបងដើម្បី
តតាំងជាមួយសមត្ថកិច្ច ជាពិសេសគឺពួកគេបំរុងប្រើសាំងដុតកម្ទេចគ្រឿងចក្រ តែសមត្ថកិច្ចបានធ្វើការពន្យល់អំពីនីតិវិធីនិងពន្យល់អំពីផ្លូវច្បាប់ដល់ក្រុមមនុស្សទាំងនោះឲ្យបានយល់ទើបពួកគេផ្អាកសកម្មភាពវិញហើយទុកពេលឱ្យសមត្ថកិច្ចបន្តនីតិវិធីដោយរលួន ។
ចំពោះក្រុមមនុស្សទាំងនោះ សមត្ថកិច្ចបានធ្វើការអប់រំពន្យល់ដល់ពួកគេដោយប្រាប់អំពីគោលការណ៍ ប្រសិនបើពួកគាត់អត់ដីរស់នៅពិតប្រាកដ ហើយរស់នៅភូមិឃុំណាសូមឲ្យទៅជួបភូមិឃុំដើម្បីស្នើសុំនីតិវិធីសុំដីសម្បទានសង្គមកិច្ចមិនមែនឲ្យពួកគាត់ដើរចាប់ដីបែបអនាធិបតេយ្យរបៀបនេះឡើយ។ បុរសម្នាក់ឈ្មោះង៉ែត តាំងគង់ ដែលគេស្គាល់ថាជាមេខ្លោងក្នុងការចាត់តាំងឲ្យមានការរំលោភបំពានយកដីរបស់រដ្ឋនេះបានលើកឡើងថាពួកគាត់ព្រោះតែអត់មានដីរស់នៅទើបនាំគ្នាមកចាប់ដីនៅទីនេះ បើអាជ្ញាធរធ្វើដូច្នេះមកលើពួកគាត់សូមធ្វើឱ្យបានស្មើគ្នា ម្យ៉ាងបើអនុវត្តច្បាប់ពិតប្រាកដសូមឲយអនុវត្តឲ្យមានភាពយុត្តិធម៌ដូចគ្នា ព្រោះតាមអ្វីដែលពួកគាត់ដឹងគឺនៅភូមិថ្មី(សូរិយា)ឃុំតាសាលស្រុកឱរ៉ាល់ ខេត្តកំពង់ស្ពឺ ដូចគ្នានេះ អ្នកមានលុយមានអំណាចមួយក្រុមបានឃុបឃិតគ្នាឈូសរំលោភយកដីព្រៃរបស់រដ្ឋរាប់រយហិកតាចែកគ្នាលក់ក្នុងមួយហិចតា 2.500ដុល្លារមានទាំងប៉ូលិសទាហានប៉េអឹមបើពលរដ្ឋក៏ជាអ្នកមានលុយដែរ។
ពួកគាត់មិនដែលឃើញអស់លោកអាជ្ញាធរនិងស្ថាប័នណាមួយចូលទៅបង្ក្រាបឬដេញអ្នកទាំងនោះចេញបានម្ដងណាឡើយដោយឡែក ពួកគាត់ដែលជាអ្នកទន់ខ្សោយគ្មានអំណាចបែរជាត្រូវបង្ក្រាបយ៉ាងតក់ក្រហល់ទៅវិញ។ តាមអ្វីដែលពួកគាត់ដឹង
គឺដីនៅចំណុចភូមិថ្មី(សូរិយា)គេកំពុងរៀបចំឯកសារដើម្បីកុហក់ថ្នាក់ដឹកនាំស្នើសុំកាត់ឆ្វៀលទៀតផងម្យ៉ាងដីនោះក៏ជាដីរដ្ឋដែលស្ថិតនៅក្នុងការគ្រប់គ្រងរបស់ជំនាញដូចគ្នា។ ពួកគាត់សង្ឃឹមថា អាជ្ញាធរនឹងមិនប្រើធម៌ក្តៅចំពោះតែពលរដ្ឋទន់ខ្សោយប៉ុណ្ណោះទេ អាជ្ញាធរក៏នឹងប្រើធមក្តៅទៅលើក្រុមមនុស្សដែលមានលុយនិងមន្ត្រីប៉ូលិសទាហានប៉េអឹមដែលកំពុងតែរំលោភបំពានយកដីរបស់រដ្ឋដូចគ្នានៅចំណុចភូមិថ្មី(សុរិយា) ដើម្បីបង្ហាញឲ្យមហាជនបានឃើញថា ភាពយុត្តិធម៌គឺមិនលំអៀងនោះ
ទេ៕