ប្រមុខការទូតអាមេរិក៖ ទីក្រុងវ៉ាស៊ីនតោននឹងពិភាក្សាយ៉ាងជិតស្និទ្ធជាមួយអ៊ុយក្រែន និងអង្គការណាតូ ស្តីពីការចូលរួមផ្នែកការទូតជាមួយរុស្ស៊ី
វ៉ាស៊ីនតោន៖ រដ្ឋមន្ត្រីការបរទេសអាមេរិកលោក អាន់តូនី ប្លីងខិន បាននិយាយ ក្រោយធ្វើកិច្ចសន្ទនាតាមទូរស័ព្ទជាមួយប្រធានាធិបតីអ៊ុយក្រែនលោក វ៉ូឡូឌីមី ហ្សេឡិនស្គី នៅថ្ងៃពុធថា សហរដ្ឋអាមេរិកនឹងរក្សាទំនាក់ទំនងយ៉ាងជិតស្និទ្ធជាមួយទីក្រុងគៀវ និងសម្ព័ន្ធមិត្តណាតូលើទំនាក់ទំនងផ្នែកការទូតជាមួយរុស្ស៊ី។
លោក ប្លីងខិន បានបង្ហោះសារនៅលើបណ្តាញសង្គមធ្វីតធើ ដោយបញ្ជាក់ឡើងវិញនូវការគាំទ្រពេញលេញរបស់សហរដ្ឋអាមេរិកសម្រាប់អ៊ុយក្រែន នៅក្នុងការជជែកទូរស័ព្ទរបស់គាត់ជាមួយប្រធានាធិបតីអ៊ុយក្រែន។ លោកបន្តថា យើងនឹងបន្តពិភាក្សាយ៉ាងជិតស្និទ្ធជាមួយអ៊ុយក្រែន ព្រមទាំងសម្ព័ន្ធមិត្តណាតូ និងដៃគូក្នុងកិច្ចខិតខំប្រឹងប្រែងផ្នែកការទូតរបស់យើង ដើម្បីទប់ស្កាត់ការឈ្លានពានរបស់រុស្ស៊ីបន្ថែមទៀត។ ទន្ទឹមនេះ អ្នកនាំពាក្យក្រសួងការបរទេសអាមេរិកលោក ណេត ប្រាយដ៍ បាននិយាយបន្ទាប់ពីការសន្ទនាទូរស័ព្ទរវាងលោក ប្លីងខិន និងលោក ហ្សេឡិនស្គី ថា អ្នកទាំងពីរបានពិភាក្សាគ្នាអំពីកិច្ចខិតខំប្រឹងប្រែង ដើម្បីដោះស្រាយជម្លោះដោយសន្តិវិធីនៅភាគខាងកើតអ៊ុយក្រែន និងទំនាក់ទំនងការទូតនាពេលខាងមុខជាមួយរុស្ស៊ី។ គួរបញ្ជាក់ថា ភាពតានតឹងរវាងរុស្ស៊ី និងអ៊ុយក្រែនបានកើនឡើងក្នុងរយៈពេលប៉ុន្មានសប្តាហ៍កន្លងមកនេះ ចំពេលមានការចោទប្រកាន់ថា មានការដំឡើងទាហានរុស្ស៊ីនៅព្រំដែនអ៊ុយក្រែន និងការអះអាងពីការត្រៀមខ្លួនសម្រាប់ការឈ្លានពាន។
ទីក្រុងម៉ូស្គូបានបដិសេធម្តងហើយម្តងទៀតនូវការចោទប្រកាន់នេះ ដោយនិយាយថា រុស្ស៊ីមានសិទ្ធិផ្លាស់ប្តូរទីតាំងកងទ័ពនៅក្នុងទឹកដីរបស់ខ្លួនតាមការសម្រេចចិត្តរបស់ខ្លួន ខណៈដែលសកម្មភាពយោធារបស់ណាតូនៅជិតព្រំដែនរុស្ស៊ីបង្កការគំរាមកំហែងដល់សន្តិសុខប្រទេសរបស់ខ្លួន៕ ប្រភព៖ Sputniknews