ហុងកុងបិទជើងហោះមកពីប្រទេស៨ ក្រោយរកឃើញអ្នកឆ្លង Omicron ម្នាក់
ហុងកុង នៅថ្ងៃពុធ ទី5 មករា នេះបានប្រកាសហាមប្រាមការហោះហើរមកពីប្រទេសចំនួន៨ និងរឹតបន្តឹងវិធានការកូវីដ ១៩ ខណៈដែលអាជ្ញាធរមានការព្រួយបារម្ភពីការឆ្លងរីករាលដាលជាថ្មីម្តងទៀតនៅក្នុងទីក្រុង។
ការហោះហើរមកពីប្រទេសអូស្ត្រាលី កាណាដា បារាំង ឥណ្ឌា ប៉ាគីស្ថាន ហ្វីលីពីន អង់គ្លេស និងអាមេរិកនឹងត្រូវហាមឃាត់ចាប់ពីថ្ងៃទី ៨ ដលថ្ងៃទី ២១ ខែមករា ឆ្នាំ ២០២២។ នេះជាការបញ្ជាក់របស់មេដឹកនាំហុងកុងលោក ស្រី Carrie Lam ប្រាប់អ្នកសារព័ត៌មាននៅថ្ងៃពុធនេះ។
លោកស្រីថ្លែងថា រដ្ឋាភិបាលនឹងធ្វើការហាមប្រាមការទទួលទានអាហារក្រោយពេលម៉ោង ៦ល្ងាចចាប់ពីថ្ងៃសុក្រ និងបិទអាងហែលទឹក មណ្ឌលកីឡា បារ ក្លឹប សារៈមន្ទីរ និងកន្លែងផ្សេងៗទៀតរយៈពេល ២សប្តាហ៍។ ការធ្វើដំណើរតាមនាវាក៏នឹងត្រូវលុបចោលផងដែរ។
«យើងមិនទាន់ឃើញរលកទី ៥នៃការឆ្លងនៅឡើយទេ ប៉ុន្តែយើងនៅជិតហើយ»។
សូមរម្លឹកថា កាលពីថ្ងៃទី ៣១ ខែធ្នូ ឆ្នាំ កំណត់ត្រាគ្មានអ្នកឆ្លងរយៈពេល ៣ខែជាប់គ្នានៅក្នុងទីក្រុងត្រូវបានបញ្ចប់ ក្រោយពេលអាជ្ញាធរកឃើញករណីឆ្លងវីរុសបំលែងថ្មី Omicron ជាលើកដំបូង។
ចាប់តាំងពីពេលនោះមក អាជ្ញាធរបានព្យាយាមតាមដាន និងធ្វើតេស្តមនុស្សរាប់រយនាក់ ដែលមានទំនាក់ទំនងជាមួយអ្នកជំងឺ និងមានការព្រួយបារម្ភពីការឆ្លងទ្រង់ទ្រាយធំ៕
