ក្រុមហ៊ុនW&K ធ្វើសន្និសីទសារព័ត៌មាន ស្ដីពី បច្ចេកវិទ្យាឌីជីថល និងប្លុកឆែន
ភ្នំពេញ៖ នាពេលបច្ចុប្បន្នេះ ពិភពលោកកំពុងស្ថិតក្នុងដំណាក់កាលនៃបដិវត្ដន៍ឧស្សាហកម្មទី ៤ ជាសម័យបច្ចេកវិទ្យាឌីជីថល ដែលមានភាពទំនើប និងស្មុគ្រស្មាញ ប៉ុន្ដែមានគុណភាពល្អលើសបច្ចេកវិទ្យាជំនាន់មុនៗ ដូចជាបច្ចេកវិទ្យាAI Fintech និងបច្ចេកវិទ្យាBlock Chainជាដើម។ ថ្វីដ្បិតតែព្រះរាជាណាចក្រកម្ពុជា កំពុងមានភាពជឿនលឿនផ្នែកបច្ចេកវិទ្យាព័ត៌មានវិទ្យាក៏ពិតមែន ប៉ុន្តែពុំទាន់មានបច្ចេកវិទ្យាBlock Chain នៅឡើយនោះទេ។ ហេតុនេះ ក្នុងការចូលរួមក្នុងដំណើរការបដិវត្តន៍ឧស្សាហកម្ម ៤.០នេះ ប្រសិនណាបើយើងអាចចាប់ផ្ដើមមុនគេ គេការចាប់យកបច្ចេកវិទ្យាទាំងនេះ ជាពិសេសបច្ចេកវិទ្យាBlock Chain នោះយើងនឹងមានឱកាសទទួលបាននូវចំណែកទីផ្សារដ៏ធំចំពោះបច្ចេកវិទ្យាដ៏ទំនើបមួយនេះ។ នេះជាការអះអាងរបស់លោក ណា ចុងស៊ិក ប្រធានសមាគមប្លុកឆែនរបស់ប្រទេសកូរ៉េ និងជាប្រធានផ្នែកបច្ចេកវិទ្យានៃក្រុមហ៊ុនW&K តាមរយៈសន្និសីទសារព័ត៌មានស្ដីពីបច្ចេកវិទ្យាឌីជីថល និងប្លុកឆែន នៅសណ្ឋាគារសូហ្វីតែល ភូគីត្រា ក្នុងរាជធានីភ្នំពេញ កាលពីពេលកន្លងទៅនេះ។
លោកបានបញ្ជាក់ថា បច្ចេកវិទ្យា Blockchain មិនត្រឹមតែជាបច្ចេកវិទ្យាបង្កើតឡើងដំបូងដើម្បីដោះដូរ និងបញ្ជាក់ភាពពិតប្រាកដរបស់រូបិយប័ណ្ណឌីជីថល Bitcoin ជាមូលដ្ឋានក្នុងការធ្វើបញ្ជីគណនេយ្យមួយ ដែលមានទម្រង់ជាប្រព័ន្ធសំណុំកុំព្យូទ័រមិនអាចកែប្រែបាននោះទេ ប៉ុន្ដែជាខ្សែស្រឡាយបណ្តុំព័ត៌មាន ប្រទាក់ក្រឡាគ្នា នៅក្នុងសំណុំកុំព្យូទ័រ ដែលអនុញ្ញាតឱ្យមានការត្រួតពិនិត្យបញ្ជីទិន្នន័យនៃកុំព្យូទ័រ ដោយអ្នកប្រើប្រាស់ពីម្នាក់ទៅម្នាក់ ដែលអាផ្ទុកទិន្នន័យបានធំ និងមានសុវត្ថិភាពខ្ពស់។ បច្ចេកវិទ្យា Blockchain អាចប្រើដើម្បីបញ្ជាក់លម្អិតការធ្វើបញ្ជីគណនេយ្យនៅគ្រប់ទម្រង់ណាមួយ ដែលមានលើសពីរូបិយប័ណ្ណឌីជីថលទៅទៀត។
ក្នុងសន្និសីទសារព័ត៌មាននេះដែរ លោក កាង ចេហូ អគ្គនាយកក្រុមហ៊ុនW&K បានបញ្ជាក់ពីទស្សនវិស័យរបស់ក្រុមហ៊ុន ក្នុងការផ្ដល់ជូននូវសេវាកម្មបែបបច្ចេកវិទ្យាសម័យទំនើប ជាពិសេសគឺបច្ចេកវិទ្យាប្លុកឆែន និងសេវាកម្មដែលពាក់ព័ន្ធផ្សេងៗទៀតដល់ប្រជាពលរដ្ឋកម្ពុជា ដើម្បីបង្កើនចំណេះដឹង និងជីវភាពប្រចាំថ្ងៃរបស់គាត់។ តាមរយៈចក្ខុវិស័យនេះ ក្រុមហ៊ុនមានបេសកកម្មស្នូលចំនួន៣សំខាន់ៗគឺ ៖ ១. ផ្ដល់នូវផលិតផល និងសេវាកម្មដ៏ល្អបំផុត ដើម្បីបំពេញតម្រូវការរបស់អតិថិជនឱ្យបានទាន់ពេលវេលា, ២. ផ្តោតលើការអភិវឌ្ឍន៍ចំណេះដឹង ដើម្បីរួមចំណែកអភិវឌ្ឍបច្ចេកវិទ្យាជំនាន់ថ្មី (ប្លុកឆែន) តាមរយៈការសិក្សាស្រាវជ្រាវ ចងក្រង និងផ្សព្វផ្សាយ ចែករំលែកដល់ប្រជាជនកម្ពុជា សម្រាប់ជ័យសហគមន៍ឱ្យមានជីវភាប្រសើរឡើង និងកាត់បន្ថយវិសមភាពសង្គម និងទី៣. សមាហរណកម្មបច្ចេកវិទ្យា ចូលរួមជាមួយរាជរដ្ឋាភិបាល ក្នុងការអភិវឌ្ឍវិស័យបច្ចេកវិទ្យាឌីជីថល នៅកម្ពុជាឱ្យមានភាពរីកចម្រើន និងផ្សារភ្ជាប់កម្ពុជាទៅកាន់ពិភពលោក តាមរយៈការផ្សព្វផ្សាយ និងការធ្វើសមាហរណកម្មបច្ចេកវិទ្យានាយុគសម័យឌីជីថល ៤.០ លើឆាកអន្ដរជាតិ។
លោក កាង ចេហូ បានអះអាងថា គោលបំណងរបស់W&K មិនត្រឹមតែជាការវិនិយោគបែប ក្រុមហ៊ុនប៉ុណ្ណោះទេ ប៉ុន្ដែគឺចង់ជំរុញវិស័យបច្ចេកវិទ្យាប្លុកឆែនដល់កម្ពុជា និងធ្វើឱ្យកម្ពុជាក្លាយជាប្រទេសឈានមុខ មានសេដ្ឋកិច្ចបែបឌីជីថល និងជាអ្នកផ្គត់ផ្គង់ផ្នែកបច្ចេកវិទ្យាដល់បណ្ដាប្រទេសនានាក្នុងតំបន់ ឬក៏ទៅដល់ពិភពលោកតែម្ដង៕