លោក Biden រំលឹកពីការព្រួយបារម្ភជុំវិញការវាយប្រហារផ្លូវអាកាស ជាមួយមេដឹកនាំអេត្យូពី
សេតវិមាននិយាយថា ប្រធានាធិបតីអាមេរិកលោក Joe Biden បានលើកឡើងពីការព្រួយបារម្ភពីការវាយប្រហារតាមផ្លូវអាកាសក្នុងជម្លោះនៅតំបន់ទីហ្រ្កេ និងអំពីបញ្ហាសិទ្ធិមនុស្ស ក្នុងអំឡុងពេលការសន្ទនាតាមទូរស័ព្ទជាមួយនាយករដ្ឋមន្ត្រីអេត្យូពីលោក Abiy Ahmed កាលពីថ្ងៃចន្ទ។
សេតវិមាននិយាយនៅក្នុងសេចក្តីថ្លែងការណ៍មួយបន្ទាប់ពីមេដឹកនាំទាំងពីរនិយាយថា៖ «លោកប្រធានាធិបតី Biden បានសម្តែងការព្រួយបារម្ភថាអរិភាពដែលកំពុងបន្ត រួមទាំងការវាយប្រហារតាមអាកាសនាពេលថ្មីៗនេះ បន្តបណ្តាលឱ្យជនស៊ីវិលស្លាប់ និងរងទុក្ខ»។
បុគ្គលិកជំនួយពីរនាក់ប្រាប់ទីភ្នាក់ងារសារព័ត៌មានរ៉យទ័រកាលពីថ្ងៃសៅរ៍ថា ការវាយប្រហារតាមអាកាសនៅតំបន់ទីហ្រ្កេសម្លាប់មនុស្ស ៥៦ នាក់នៅក្នុងជំរុំសម្រាប់ជនភៀសខ្លួន និង ៣០ នាក់បានរងរបួស រួមទាំងកុមារផងដែរ។ ទីភ្នាក់ងារអង្គការសហប្រជាជាតិទទួលបន្ទុកកិច្ចការមនុស្សធម៌និយាយកាលពីថ្ងៃអាទិត្យថា អង្គការជំនួយបានផ្អាកប្រតិបត្តិការរបស់ខ្លួននៅក្នុងតំបន់នៃភាគពាយ័ព្យទីហ្រ្កេ ជាកន្លែងដែលការវាយប្រហារកើតឡើង។
អគ្គលេខាធិការអង្គការសហប្រជាជាតិលោក Antonio Guterres និយាយកាលពីថ្ងៃចន្ទថា អង្គការសហប្រជាជាតិ និងដៃគូរបស់ខ្លួនកំពុងធ្វើការជាមួយអាជ្ញាធរដើម្បីចល័តជំនួយសង្គ្រោះបន្ទាន់ទៅកាន់តំបន់នៃជំរុំជនភៀសខ្លួនក្នុងទីក្រុងទីហ្រ្កេដែលរងការវាយប្រហារតាមអាកាសមួយផ្សេងទៀតកាលពីសប្តាហ៍មុន ដែលសម្លាប់ជនភៀសខ្លួនអេរីទ្រា ៣ នាក់។
មនុស្សរាប់ពាន់នាក់ស្លាប់ និងរាប់លាននាក់ត្រូវផ្លាស់ទីលំនៅចាប់តាំងពីសង្គ្រាមផ្ទុះឡើងនៅក្នុងតំបន់ទីហ្រ្កេនៃភាគខាងជើងប្រទេសអេត្យូពីក្នុងខែវិច្ឆិកា ឆ្នាំ ២០២០ រវាងកងកម្លាំងសហព័ន្ធរបស់លោក Abiy ដែលគាំទ្រដោយសម្ព័ន្ធមិត្តក្នុងតំបន់ និងរណសិរ្សរំដោះប្រជាជនទីហ្រ្កេ (TPLF) ដែលគ្រប់គ្រងតំបន់នេះ។
សេតវិមានក៏បាននិយាយផងដែរថា Biden និង Abiy បានពិភាក្សាអំពី៖ «តម្រូវការដើម្បីដោះស្រាយកង្វល់សិទ្ធិមនុស្សរបស់ប្រជាជនអេត្យូពីដែលរងផលប៉ះពាល់ទាំងអស់ រួមទាំងការព្រួយបារម្ភអំពីការឃុំឃាំងជនជាតិអេត្យូពីក្រោមស្ថានភាពអាសន្ន»។
លោក Abiy ពណ៌នាការសន្ទនារបស់លោកជាមួយលោក Biden នៅលើធ្វីតធឺថា «ស្មោះត្រង់» ហើយនិយាយថា អ្នកទាំងពីរបានពិភាក្សាអំពីការពង្រឹងកិច្ចសហប្រតិបត្តិការ ខណៈដែលមន្ត្រីរដ្ឋបាលជាន់ខ្ពស់របស់សហរដ្ឋអាមេរិកនិយាយថា ការហៅទូរស័ព្ទនេះគឺដូចជាអាជីវកម្ម និងផ្តោតលើបញ្ហា។
ក្រុមសិទ្ធិមនុស្ស និងអង្គការសហប្រជាជាតិបានលើកឡើងពីក្តីបារម្ភអំពីការឃុំខ្លួនជាទ្រង់ទ្រាយធំលើជនជាតិភាគតិចនៅតំបន់ទីហ្រ្កេ។ រដ្ឋាភិបាលរបស់លោក Abiy បដិសេធថា ការឃុំខ្លួនដោយចេតនាជនជាតិភាគតិចណាមួយមិនបានកើតឡើងនោះទេ។
ប្រភព៖ Reuters
