ប្រជាពលរដ្ឋនៅតាមសហគមន៍កំពុងពង្រឹងជីវភាពតាមរយៈការចិញ្ចឹមគោ
ខេត្តកំពង់ធំ៖ ប្រជាសហគមន៍តំបន់ការពារធម្មជាតិអូរចិញ្ជៀន ស្ថិតនៅឃុំសាគ្រាម ស្រុកប្រាសាទបាល្ល័ង្ក ខេត្តកំពង់ធំ ដែលបានទទួលពូជគោពីក្រសួងបរិស្ថានសម្រាប់ចិញ្ចឹមនោះ បានជួយលើកស្ទួយជីវភាពគ្រួសារពួកគាត់កាន់តែប្រសើរជាបណ្តើរៗ។
គិតរហូតមកដល់ពេលនេះ ប្រជាសហគមន៍បានចូលរួមចិញ្ចឹមគោ កំពុងរីកធំធាត់ និងអាចបង្កើតកូនបាននៅថ្ងៃខាងមុខ។
លោក សឿន រី ប្រធាន សហគមន៍ តំបន់ការពារធម្មជាតិអូរចិញ្ជៀន បានឱ្យដឹងថាសហគមន៍របស់លោកបានទទួលគោពីក្រសួងបរិស្ថានចំនួន៤២ក្បាល កាលពីអំឡុងដើមឆ្នាំ២០២១កន្លងមក ហើយលោកបានចែកឱ្យសហគមន៍ចំនួន១៤គ្រួសារ។ ប្រជាពលរដ្ឋមានជីវភាពខ្វះខាត បានទទួលយកគោទៅចិញ្ចឹម ដើម្បីជួយដោះស្រាយជីវភាពគ្រួសារបានមួយកម្រិត។
លោកសឿនរីបានឱ្យដឹងបន្ថែមថា ក្នុងសហគមន៍របស់លោកមានសមាជិក២៧០គ្រួសារ ហើយក្នុងចំណោមនេះប្រជាសហគមន៍ចំនួន៥០ភាគរយហើយដែលចិញ្ចឹមគោសម្រាប់ទុកលក់និងមួយផ្នែកតិចតួចប៉ុណ្ណោះដែលប្រើសម្រាប់ជាកម្លាំងអូសទាញ។គ្រួសារកញ្ញា ម៉ុច មាលា ដែលជាសមាជិកសហគមន៍មួយ ទទួលបានគោចំនួន៣ក្បាល និងកំពុងថែទាំយ៉ាងយកចិត្តទុកដាក់ ធ្វើយ៉ាងណាឱ្យវាឆាប់ធំ និងហុចផលបង្កើតជាកូនចៅសម្រាប់បន្តពូជបានលឿន។
ដោយឡែក លោក សិទ្ធ ភឿក ដែលបានទទួលបានគោចំនួន៣ក្បាលដូចគ្នាដែរ បានសម្តែងការសប្បាយចិត្ត ហើយលោកក៏បានថ្លែងអំណរគុណដល់ក្រសួងបរិស្ថានដែលបានផ្តល់ពូជគោដែលជាផ្នែកមួយជួយដល់គ្រួសាររបស់គាត់។
បុរសរូបនេះបន្ថែមថា”គោដែលខ្ញុំទទួលបានបើគិតពីតម្លៃវាច្រើនណាស់ខ្ញុំមិនអាចទិញវាបានទេ ហេតុនេះខ្ញុំត្រូវតែខិតខំថែទាំ និងចាក់ថ្នាំបង្ការោគជំងឺ ដើម្បីកុំឱ្យឈឺងាប់ដោយប្រការណាមួយ។ គោទាំងនេះខ្ញុំសង្ឃឹមថាវានឹងបង្កើតកូនចៅឱ្យខ្ញុំនៅថ្ងៃខាងមុខ ហើយពេលនោះខ្ញុំលែងព្រួយថាគ្មានគោចិញ្ចឹមដូចគេទៀតហើយ”។
គួរបញ្ជាក់ក្រសួងបរិស្ថានបានផ្តល់ពូជគោកាលពីអំឡុងដើមឆ្នាំ២០២១កន្លងមក ដល់សហគមន៍តំបន់ការពារធម្មជាតិអូរជញ្ជាន ស្ថិតនៅ ឃុំសាគ្រាម ស្រុកបាល្ល័ង ខេត្តកំពង់ធំ ចំនួន៤២ក្បាល ដើម្បីចែកជូនដល់ប្រជាសហគមន៍ចំនួន១៤គ្រួសារ និងសហគមន៍តំបន់ការពារធម្មជាតិអូរបញ្ញាស្ថិតនៅ ឃុំសាគ្រាម ស្រុកបាល្ល័ង ខេត្តកំពង់ធំ ទទួលបានពូជគោចំនួន៤២ក្បាល ដោយក្នុងនេះបានចែកជូនប្រជាសហគមន៍ក្រីក្រចំនួន១៤គ្រួសារដូចគ្នា។
ក្នុងឆ្នាំ២០២០ រហូតដល់ពេលនេះ ក្រសួងបរិស្ថានបានផ្តល់ពូជក្របី២១៦ក្បាល សត្វគោខ្មែរចំនួន ១៥៣ក្បាល គោពូជកាត់ចំនួន៦១ក្បាល គោបាចំនួន ៦ក្បាល ចៀម ២៤៧ក្បាល ពពែ ២៦៧ក្បាល និងពូជជ្រូកឦសាន ចំនួន ៥០ក្បាល ជូនសហគមន៍មូលដ្ឋាន ប្រជាពលរដ្ឋ និងកងទ័ព សម្រាប់ចិញ្ចឹម ដើម្បីពង្រឹងជីវភាពស្នូល។
ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានលើកទឹកចិត្តដល់ប្រជាពលរដ្ឋ ចូលរួមការពារនិងអភិរក្សព្រៃឈើ សត្វព្រៃ ដែលមាននៅក្នុងតំបន់ការពារធម្មជាតិទាំងអស់គ្នា។ ប្រជាលរដ្ឋក៏ត្រូវផ្លាស់ប្តូរមុខរបរដែលធ្លាប់បរបាញ់សត្វមកជាការចូលរួមចិញ្ចឹមសត្វជំនួសវិញ ព្រោះការបរបាញ់សត្វព្រៃជាអំពើល្មើសច្បាប់ ប្រឈមនិងទោសទណ្ឌចំពោះមុខច្បាប់៕ដោយ៖ម៉ាដេប៉ូ
