រដ្ឋលេខាធិការក្រសួងកសិកម្ម ស្នើឱ្យក្រុមការងារ មានការពិភាក្សា ស្វែងរកបញ្ហាប្រឈម និងដំណោះស្រាយនានា ចំពោះបច្ចុប្បន្នភាពនៃការងារដែលកំពុងកើតមាន សំដៅដល់ការគ្រប់គ្រង និងអភិវឌ្ឍវិស័យព្រៃឈើនៅកម្ពុជា ប្រកបដោយប្រសិទ្ធភាព
នៅមជ្ឈមណ្ឌលបណ្ដុះបណ្ដាលវិស័យព្រៃឈើ និងសត្វព្រៃ (ភ្នំពេញថ្មី) នាព្រឹកថ្ងៃពុធ ទី១៩ ខែមករា ឆ្នាំ២០២២ បានរៀបចំពិធីបូកសរុបលទ្ធផលការងារវិស័យព្រៃឈើឆ្នាំ២០២១ និងទិសដៅអនុវត្ដបន្ត ឆ្នាំ២០២២ ក្រោមអធិបតីភាព ឯកឧត្តម អ៊ុង សំអាត ទីប្រឹក្សាផ្ទាល់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី និងជារដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ឯកឧត្តមបណ្ឌិត កែវ អូម៉ា លីស្ស ប្រតិភូរាជរដ្ឋាភិបាលកម្ពុជាទទួលបន្ទុកជាប្រធានរដ្ឋបាលព្រៃឈើ រួមនឹងវត្តមាន ឯកឧត្តម លោកជំទាវ អស់លោក លោកស្រី ថ្នាក់ដឹកនំាក្រសួង ប្រធានមន្ទីរកសិកម្ម រុក្ខាប្រមាញ់ និងនេសាទរាជធានី-ខេត្ត ចូលរួមផងដែរ។
ឯកឧត្តមបណ្ឌិត កែវ អូម៉ាលីស្ស គូសបញ្ជាក់ថា រដ្ឋបាលព្រៃឈើរៀបចំកិច្ចប្រជុំនេះ គឺដើម្បីធ្វើការត្រួតពិនិត្យ បូកសរុប និងវាយតម្លៃលទ្ធផលការអនុវត្ដការងារក្នុងវិស័យព្រៃឈើ ដែលសម្រេចបានក្នុងឆ្នាំ២០២១កន្លងទៅ។ ឯកឧត្តមបន្ថែមថា ក្នុងកិច្ចប្រជុំនេះ យើងក៏នឹងមានបទបង្ហាញពាក់ព័ន្ធបច្ចុប្បន្នភាព នៃការអនុវត្តការងារ ព្រមទាំងពិភាក្សាអំពីចំណុចខ្លាំង ចំណុចខ្សោយ បញ្ហាប្រឈម សំណូមពរ ដោយស្នើផ្តល់ធាតុចូលសំខាន់ៗសម្រាប់ជាទិសដៅការងារអាទិភាពក្នុងការអនុវត្តការងារឆ្នាំ២០២២ ឱ្យមានប្រសិទ្ធភាពខ្ពស់ ស្របតាមច្បាប់ស្ដីពីព្រៃឈើ កម្មវិធីព្រៃឈើជាតិ ផែនការយុទ្ធសាស្ដ្រអភិវឌ្ឍន៍ជាតិ និងយុទ្ធសាស្ដ្រចតុកោណ ដើម្បីកំណើនការងារ សមធម៌ និងប្រសិទ្ធភាពរបស់រាជរដ្ឋាភិបាលកម្ពុជា ក្រោមការដឹកនាំ ដ៏ត្រឹមត្រូវរបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី សំដៅដល់ការគ្រប់គ្រង និងអភិវឌ្ឍវិស័យព្រៃឈើប្រកបដោយប្រសិទ្ធភាព ។
ក្នុងនាមឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ឯកឧត្តម អ៊ុង សំអាត
បានវាយតម្លៃខ្ពស់ និងសូមសម្តែងនូវការកោតសរសើរចំពោះការខិតខំតស៊ូបំពេញភារកិច្ច និងកិច្ចសហការល្អរបស់លោក លោកស្រី ថ្នាក់ដឹកនាំគ្រប់ជាន់ថ្នាក់ ទាំងថ្នាក់កណ្តាល និងថ្នាក់មូលដ្ឋាន ដែលបានរួមចំណែកយ៉ាងសកម្មក្នុងការគ្រប់គ្រង អភិរក្ស និងអភិវឌ្ឍន៍ធនធានព្រៃឈើ និងសត្វព្រៃ ទទួលបានលទ្ធផលល្អប្រសើរ នាឆ្នាំកន្លងមក ។ ឯកឧត្តម ក៏ស្នើឱ្យមានការពិភាក្សា ស្វែងរកបញ្ហាប្រឈម និងដំណោះស្រាយនានា ចំពោះបច្ចុប្បន្នភាពនៃការងារដែលកំពុងកើតមាន សំដៅដល់ការគ្រប់គ្រង និងអភិវឌ្ឍវិស័យព្រៃឈើប្រកបដោយប្រសិទ្ធភាព។
ឆ្លៀតក្នុងឱកាសនោះផងដែរ ឯកឧត្តម អ៊ុង សំអាត ក៏បានលើកយកពីការចាក់វ៉ាក់សុំាងមកបញ្ជាក់ជូនក្នុងកិច្ចប្រជុំផងដែរថា ៖ ក្រោមការដឹកនាំ និងភាពឈ្លាសវៃ របស់សម្តេចតេជោ ហ៊ុន សែន នាយករដ្ឋមន្ត្រី សម្តេចបានខិតខំស្វះស្វែងរកនូវវ៉ាក់សាំងការពារ ទប់ស្កាត់ ពីការឆ្លងរីករាលដាលក្នុងផ្ទៃប្រទេសទាំងមូល ទាំងការអំពាវនាវទិញ ការទទួលជំនួយវ៉ាក់ពីបណ្តាប្រទេសនានា ជាពិសេសវ៉ាក់សាំងពីប្រទេសជាមិត្ត របស់មិត្តចិន ទាំងការទិញ និងការផ្តល់នូវជំនួយមនុស្សធម៌” វ៉ាក់សាំង” ដើម្បីបានចាក់ជូនប្រជាពលរដ្ឋបានទាន់ពេល វេលា។
ឯកឧត្តម ក៏សូមអំពាវនាវដល់ អ្នកដែលមិនទាន់បានចាក់វ៉ាក់់សាំងដូស ទី១ ទី២ និងទី៣ ត្រូវរួសរាន់ទៅចាក់ឱ្យបានគ្រប់ៗគ្នាដើម្បីការពារខ្លួនពីការឆ្លងមេរោគកូវីដ-19 ជាពិសេសមេរោគកូវីដប្រភេទបំប្លែងថ្មី “អូមីក្រុង”ខណៈមេរោគប្រភេទថ្មីនេះមានការឆ្លងរីករាលដាលលឿន និងរហ័សខ្លាំង នៅតាមបណ្តាប្រទេសនានានៅលើពិភពលោក ។
ជាចុងបញ្ចប់ឯកឧត្តម សង្ឃឹម និងជំនឿដ៏មុតមាំថាកិច្ចប្រជុំ “បូកសរុបលទ្ធផលការងារវិស័យព្រៃឈើឆ្នាំ២០២១ និងទិសដៅអនុវត្តបន្តឆ្នាំ២០២២” គឺជាឱកាសដ៏ល្អមួយសម្រាប់មន្ដ្រីរដ្ឋបាលព្រៃឈើទាំងអស់ ចូលរួមចែករំលែកបទពិសោធន៍ បញ្ហាប្រឈម សំណូមពរ ដើម្បីស្វែងរកដំណោះស្រាយ និងកំណត់ទិសដៅអនុវត្តបន្តប្រកបដោយប្រសិទ្ធិភាព និងសក្កិសិទ្ធភាព ស្របតាមគោលនយោបាយកំណែទម្រង់ស៊ីជម្រៅក្នុងវិស័យព្រៃឈើរបស់រាជរដ្ឋាភិបាល ៕