ក្រសួងមហាផ្ទៃស្នើសុំរាជរដ្ឋាភិបាលដើម្បីឱ្យក្រសួងការបរទេសកម្ពុជា ប្រាប់ទៅកុងស៊ុលកម្ពុជាទាំងអស់កុំឱ្យឈ្មោះ GENSER JARED MATTHEW ចូលមកកម្ពុជា
ភ្នំពេញ៖ ក្រសួងមហាផ្ទៃបានស្នើសុំរាជរដ្ឋាភិបាលដើម្បីឱ្យក្រសួងការបរទេសកម្ពុជាប្រាប់ទៅកុងស៊ុលកម្ពុជាប្រចាំនៅក្រៅប្រទេសទាំងអស់ កុំឱ្យជនជាតិអាមេរិកឈ្មោះ GENSER JARED MATTHEW ចូលមកកម្ពុជាជារៀងរហូត។ ជននេះបានបន្លំខ្លួនធ្វើជាមេធាវីអន្តរជាតិការពារឱ្យជនជាប់ចោទឈ្មោះ សេង ធារី និងបានចូលមកជ្រៀតជ្រែកយុត្តាធិការកម្ពុជា។
អ្នកនាំពាក្យក្រសួងមហាផ្ទៃ ឯកឧត្តមនាយឧត្តមសេនីយ៍ សន្តិបណ្ឌិត ខៀវ សុភ័គ បានមានប្រសាសន៍ប្រាប់ AMS នៅរសៀល ថ្ងៃទី២០ ខែមករានេះថា ឈ្មោះ GENSER JARED MATTHEW កាន់លិខិតឆ្លងដែនទេសចរចូលមកកម្ពុជា ហើយបានប្រើប្រាស់តួនាទីរបស់ខ្លួនជាមេធាវីអន្តរជាតិ និងបានគំរាមកំហែងលើតុលាការកម្ពុជាថែមទៀតផង។ បន្ទាប់មក សមត្ថកិច្ចកម្ពុជា ក៏បានធ្វើការស្រាវជ្រាវទៅឃើញថា ឈ្មោះ GENSER JARED MATTHEW ចូលមកកម្ពុជា គឺជាទេសចរធម្មតាទេ ហើយមកចូលជ្រៀតជ្រែកចូលយុត្តាធិការកម្ពុជាថែមទៀត។
ឯកឧត្តមនាយឧត្តមសេនីយ៍សន្តិបណ្ឌិត ខៀវ សុភ័គ បានបញ្ជាក់ថា “គាត់កាន់លិខិតឆ្លងដែនទេសចរសុំមកកម្ពុជាហើយ ពេលមកគាត់ទៅការពារក្តី ប្រើប្រាស់តួនាទីរបស់ខ្លួនជាមេធាវីអន្តរជាតិ ហើយមិនត្រឹមតែការពារក្តីទេ ចេញមកសំញ៉ែងថា ខ្លួនជាមេធាវីអន្តរជាតិមានសិទ្ធិមានអី…។ បន្ទាប់មកយើងក៏ធ្វើការស្រាវជ្រាវទៅឃើញថា គាត់ចូលមកធ្វើជាទេសចរធម្មតា ហើយមកជ្រៀតជ្រែកចូលយុត្តាធិការរបស់យើងទៀត។ ជាធម្មតាមេធាវីអន្តរជាតិ ប៉ុន្តែវាត្រូវតែមានការអនុញ្ញាតមិនមែន មេធាវីចេះតែបានទាំងអស់ឯណា? វាទាល់តែមានការយល់ព្រមពីតុលាការដែរ។ គាត់ធ្វើខុសពីតួនាទីភារកិច្ចរបស់ខ្លួន។ ហេតុនេះហើយបានជាយើងហាមមិនឱ្យមកកម្ពុជា”។
GENSER JARED MATTHEW និង សេង ធាវី
ឯកឧត្តមនាយឧត្តមសេនីយ៍សន្តិបណ្ឌិត ខៀវ សុភ័គ បន្តថា ក្រសួងមហាផ្ទៃបានស្នើសុំរដ្ឋាភិបាលដើម្បីឱ្យក្រសួងការបរទេសកម្ពុជាប្រាប់ទៅកុងស៊ុលកម្ពុជានៅក្រៅប្រទេសទាំងអស់កុំឱ្យឈ្មោះ GENSER JARED MATTHEWចូលមក កម្ពុជាទៀត ដោយដាក់នៅក្នុងបញ្ជីខ្មៅតែម្តង។ ក្រៅពីជាប់ពាក់ព័ន្ធនឹងសកម្មភាពបំពានដែនយុត្តាធិការកម្ពុជាក្នុងគោលដៅ គំរាមកំហែងដល់ឯករាជ្យភាពតុលាការកម្ពុជាឈ្មោះ GENSER JARED MATTHEW ក៏បានល្មើសនឹងច្បាប់ស្តីពីអន្តោប្រវេសន៍ ដោយបានប្រើប្រាស់ទិដ្ឋាការខុសពីគោលបំណងស្នើសុំចូលមកកម្ពុជាដើម្បីទេសចរ ប៉ុន្តែបានធ្វើសកម្មភាពផ្ទុយពីប្រភេទទិដ្ឋាការដែលបានអនុញ្ញាត។
សូមជម្រាបថា លោក GENSER JARED MATTHEW បានធ្វើដំណើរចូលមកកម្ពុជាកាលពីថ្ងៃទី០៥ ខែធ្នូ ឆ្នាំ២០២១ ដោយប្រើប្រាស់ទិដ្ឋាការទេសចរ ផ្ដល់ដោយស្ថានទូតខ្មែរប្រចាំសហរដ្ឋអាមេរិក និងបានធ្វើដំណើរចេញពីកម្ពុជានៅថ្ងៃទី០៩ ខែធ្នូ ឆ្នាំ២០២១ ឆ្ពោះទៅកាន់ទីក្រុងសេអ៊ូល សាធារណរដ្ឋកូរ៉េ។
គួរបញ្ជាក់ថា បន្ទាប់ពីមកដល់កម្ពុជា លោក GENSER JARED MATTHEW បានតាំងខ្លួនជាមេធាវីអន្តរជាតិដោយចូលរួមឃ្លាំមើលដំណើរការសវនាការលើជនជាប់ចោទឈ្មោះ សេង ធាវី និងបានផ្ដល់បទសម្ភាសន៍ដល់អ្នកសារព័ត៌មាននៅមុខ តុលាការដោយបានហៅសវនាការនោះថាជា សវនាការឆាកល្ខោន។ លើសពីនេះ បុគ្គលខាងលើបានព្រមានរាជរដ្ឋាភិបាលថា នឹងមានបញ្ហា បើហ៊ានឱ្យកញ្ញា សេង ធាវី ជាប់ទោសជាដើម។ល៕
ដោយៈពលជ័យ