ទីភ្នាក់ងារស៊ើបការណ៍សម្ងាត់អាមេរិក CIA បញ្ជាក់ថា “រោគសញ្ញា Havana” មិនមែនជាយុទ្ធនាការដោយមហាអំណាចបរទេសទេ
បរទេស៖ នៅក្នុងការវាយតម្លៃលើការស៊ើបការណ៍សម្ងាត់ថ្មីមួយ ទីភ្នាក់ងារ CIA បានសន្និដ្ឋានថា អ្នកការទូតអាមេរិកដែលមានរោគសញ្ញាឈឺក្បាល និងចង្អោរដ៏អាថ៌កំបាំងដែលគេហៅថា «រោគសញ្ញា Havana»នោះ មិនមែនជាគោលដៅនៃយុទ្ធនាការសកលដោយមហាអំណាចបរទេសទេ។
ការរកឃើញនេះ បានធ្វើឱ្យអ្នកដែលបានធ្លាក់ខ្លួនឈឺមួយចំនួនខកចិត្ត ហើយអ្នកខ្លះនិយាយថា ការវាយតម្លៃរបស់ទីភ្នាក់ងារស៊ើបការណ៍សម្ងាត់ (CIA) មិនអាចជាការសន្និដ្ឋានចុងក្រោយអំពីបញ្ហានេះទេ។ នេះបើតាមសេចក្តីថ្លែងការណ៍ដកស្រង់ដោយកាសែត The Times។ យ៉ាងណាមិញញ នាយក CIA លោក William J. Burns បាននិយាយនៅក្នុងសេចក្តីថ្លែងការណ៍មួយដែលត្រូវបានដកស្រង់ដោយកាសែត The New York Times ថា ខណៈយើងឈានដល់ការរកឃើញបណ្តោះអាសន្នដ៏សំខាន់មួយចំនួន យើងមិនទាន់បញ្ចប់ទេ… យើងនឹងបន្តបេសកកម្មដើម្បីស៊ើបអង្កេតឧបទ្ទវហេតុទាំងនេះ និងផ្តល់ការថែទាំសុខភាពលំដាប់ពិភពលោកសម្រាប់អ្នកដែលត្រូវការ។ បណ្តាញទូរទស្សន៍ NBC News កាសែត The New York Times និង Politico បានដកស្រង់សម្តីមន្ត្រីជាច្រើនដែលបានធ្វើបទបង្ហាញសង្ខេបក្នុងការវាយតម្លៃស៊ើបការណ៍សម្ងាត់របស់ CIA អំពីឧបទ្ទវហេតុដែលបានកើតឡើងជាលើកដំបូងក្នុងចំណោមអ្នកការទូតក្នុងឆ្នាំ២០១៦ ក្នុងរដ្ឋធានីឡាហាវ៉ាន ប្រទេសគុយបា ដែលមន្ត្រីអាមេរិក និងកាណាដា បានត្អូញត្អែរថា ឈឺក្បាលខ្លាំង ចង្អោរ និងការប៉ះពាល់ខួរក្បាល បន្ទាប់ពីឮសំឡេងខ្លាំងៗ។
ចាប់តាំងពីពេលនោះមក មន្ត្រីការទូត និងចារកម្មបានរាយការណ៍ឧបទ្ទវហេតុស្រដៀងគ្នានេះនៅក្នុងប្រទេសនានា រួមមាន អូស្ត្រាលី អូទ្រីស ចិន កូឡុំប៊ី អាល្លឺម៉ង់ និងរុស្ស៊ី។ របាយការណ៍បាននិយាយថា CIA មិនបានបដិសេធថា ករណីប្រហែល២០ ដែលមិនទាន់អាចពន្យល់បាន ហើយដែលកំពុងបន្តស៊ើបអង្កេតនោះ មិនជាប់ពាក់ព័ន្ធរដ្ឋបរទេសទេ៕ ប្រភព៖ AFP និងCNBC