អាល្លឺម៉ង់ខ្វែងគំនិតជាមួយសម្ព័ន្ធមិត្តណាតូ ខណៈពួកគេបដិសេធមិនផ្គត់ផ្គង់អាវុធទៅឱ្យអ៊ុយក្រែន
ប្រទេសអាល្លឺម៉ង់បានច្រានចោលការអំពាវនាវឱ្យផ្គត់ផ្គង់អាវុធទៅឱ្យប្រទេសអ៊ុយក្រែន នៅក្នុងសប្ដាហ៍មួយដែលសហរដ្ឋអាមេរិក និងចក្រភពអង់គ្លេសធ្វើការបញ្ជាក់ម្ដងទៀតនៃការប្ដេជ្ញាចិត្តរបស់ពួកគេក្នុងការជួយយោធាអ៊ុយក្រែនដើម្បីប្រឈមនឹងភាពតានតឹងកើនឡើងជុំវិញការបង្កើនកងទ័ពរុស្សីនៅតាមព្រំដែនរបស់ខ្លួន។
រដ្ឋមន្ត្រីក្រសួងការពារជាតិអាល្លឺម៉ង់លោកស្រីគ្រីស្ទីន លាមប៊្រីកបានប្រាប់កាសែត Welt am Sonntag ថាមាន «ការមូលមតិនៅក្នុងរដ្ឋាភិបាលសហព័ន្ធ» ដែលថាការផ្ដល់អាវុធទៅឱ្យអ៊ុយក្រែន «បច្ចុប្បន្នមិនជួយដោះស្រាយបញ្ហាទេ»។
កាលពីសប្ដាហ៍មុនឯកអគ្គរដ្ឋទូតអ៊ុយក្រែនប្រចាំក្រុងប៊ែរឡាំងលោកអង់ឌ្រី ម៉ែលនីកបាននិយាយថាប្រទេសលោកត្រូវការនាវាចម្បាំងដើម្បីការពារឆ្នេរសមុទ្រខ្មៅ និងសមុទ្រអាហ្សូវពីការវាយប្រហាររបស់រុស្សី ហើយលើឡើងថានាវារបស់អាល្លឺម៉ង់គឺ«ស្ថិតក្នុងចំណោមនាវាដ៏ល្អបំផុតនៅក្នុងពិភពលោក»។
ខណៈពេលដែលលោកស្រីលាមប៊្រីកលើកឡើងថាប្រទេសលោកស្រីគាំទ្រប្រទេសអ៊ុយក្រែន លោកស្រីបាននិយាយក្រុងប៊ែរឡាំងនឹងបដិសេធផ្ដល់ជំនួយអាវុធទេ ហើយបានកត់សម្គាល់ថាប្រទេសរបស់លោកស្រីនឹងផ្ដល់ជំនួយដទៃទៀតដូចជាការសាងសង់មន្ទីរពេទ្យនៅសមរភូមិ និងការជួយព្យាបាលរបួសទាហានអ៊ុយក្រែនជាដើម។ លោកស្រីនិយាយថា៖ «យើងត្រូវធ្វើអ្វីៗគ្រប់យ៉ាងដើម្បីកាត់បន្ថយភាពតានតឹង»។
ក្រសួងការបរទេសអ៊ុយក្រែនបានបង្ហាញភាពខឹងសម្បារចំពោះការប្រកាសរបស់លោកស្រីលាមប៊្រីក ហើយបានកោះហៅឯកអគ្គរដ្ឋទូតអាល្លឺម៉ង់ដើម្បីមកពិភាក្សាបញ្ហានេះ។
«មានការខកចិត្តយ៉ាងខ្លាំងចំពោះជំហររបស់រដ្ឋាភិបាលអាល្លឺម៉ង់លើការមិនផ្តល់អាវុធការពារដល់អ៊ុយក្រែន» រដ្ឋាភិបាលអ៊ុយក្រែនបាននិយាយបែបនេះ ហើយបន្តទៀតថា៖ «សព្វថ្ងៃនេះ ភាពរឹងមាំ និងសាមគ្គីភាពរបស់អ៊ុយក្រែន និងដៃគូ មានសារៈសំខាន់ជាងពេលណាៗទាំងអស់ ដើម្បីទប់ស្កាត់ចេតនាបំផ្លិចបំផ្លាញរបស់រុស្ស៊ី»។
អធិការបតីអាល្លឺម៉ង់លោកអូឡាហ្វ សូល និងរដ្ឋមន្ត្រីការបរទេសអាល្លឺម៉ង់លោកស្រីអាណាលេណា ប៊ែរប៊ូកក៏បានច្រានចោលសំណើរបស់អ៊ុយក្រែនផងដែរ។ រីឯសមាជិកណាតូផ្សេងទៀតដូចជាអាមេរិក អង់គ្លេស ឡាតវី លីទុយអានី និងអេស្តូនីបានធ្វើការប្ដេជ្ញាជួយផ្ដល់អាវុធទៅឱ្យអ៊ុយក្រែន៕
ប្រភព៖ News Week
